06 Feb 2022, 07:49
މިންހާ އެއްޗެއް ނުބުނުމުން ޝިޒާން މިންހާއާ ގާތަށް ފިޔަވަޅެއް އަޅައިލިއެވެ. މިންހާ އެބުރިލަން އުޅުމާއެކު ޝިޒާން މިންހާގެ ދެ އަތުގެ މުލައްދަނޑީގައި ހިފާ ހުއްޓުވިއެވެ. އެއަށްފަހު އޭނާގެ ޓާކިޝް ގްރީން ކުލައިގެ ދެލޮލުން މިންހާގެ ދެލޮލާ ހަތަރުކަޅިހަމަކޮށްލިއެވެ.
"ކީއްވެ އާހިލްއާ އެކީ ދިޔައީ؟"
ޝިޒާންގެ އެ ސުވާލާއެކު މިންހާއަށް ޝޮކެއް ލިބުނެވެ. އޭނާ އާހިލްއާއެކު ދިޔަކަން ޝިޒާންއަށް އެނގުނީ ކިހިނެއްހެއްޔެވެ؟ އަނެއްކާ އޭނާ ބޭރުގައި އާހިލްއާ އެކު އުޅެނިކޮށް ޝިޒާންއަށް ފެނުނީ ހެއްޔެވެ؟ ފެނުނު ނަމަވެސް، އެއީ އާހިލްކަން ޝިޒާންއަށް އެނގެންވީ ކީވެއްހެއްޔެވެ؟ އަނެއްކާ އާހިލްއާ ޝިޒާންއާ ގުޅުމެއް އޮންނަނީހެއްޔެވެ؟ ޝިޒާން އެ ރަށަށް ދިޔައިރު އޭނާ އެނގެންވީ ކީއްވެހެއްޔެވެ؟ ތަފާތު ސުވާލުތަކުން މިންހާގެ ސިކުނޑި ފުނިޖެހެމުން ދިޔައެވެ. އޭނާއަށް އެ އިން އެއްވެސް ސުވާލެއްގެ ޖަވާބެއް ނުލިބުނެވެ.
ޝިޒާންގެ މޫނުމަތިން ފެނުނު ރުޅިވެރިއަސަރުތަކާ ހިތްހަމަ ނުޖެހުމުގެ އަސަރުތަކުން މިންހާއަށް ބުނާނެ އެއްޗެއް ނޭނގުނެވެ. އެއީ މީގެކުރިން ދުވަހަކުވެސް ޝިޒާންގެ މޫނުމަތިން ފެނުނު އަސަރުތަކެއް ނޫންކަމުން އޭނާއަށް ޝިޒާންއާ ނަޒަރު ވަކިކޮށްލެވުނެވެ. އޭނާ ފަހަތަށް ފިޔަވަޅެއް އަޅައިލުމާއެކު އަނެއްކާވެސް ޝިޒާން އޭނާއާ ދާދިދާތަށް ފިޔަވަޅެއް އަޅައިލިއެވެ. މިންހާ އަނެއްކާވެސް ފިޔަވަޅެއް ފަހަތަށް އަޅައިލިއެވެ. އޭނާ އަޅަމުން ދިޔަ ކޮންމެ ފިޔަވަޅަކަށް ޝިޒާންވެސް ދިޔައީ ފިޔަވަޅެއް ކުރިއަށް އަޅަމުންނެވެ. ޝިޒާންގެ އެ އަމަލުން މިންހާގެ ހިތަށް ބިރުވެރިކަން ވެރިވިއެވެ. ޝިޒާން ކުރަން އެ އުޅޭ ކަމެއް ނޭނގި އޭނާ ވަނީ ހާސްވެފައެވެ.
"ޝި... ޝިޒާން... ކީއް.. ކީއްކުރަން ތިއުޅެނީ؟" މިންހާއަށް ވާހަކަ ދެއްކުނީވެސް އަޅައަޅައި ގަންނަމުންނެވެ. އޭރު އޭނާ ހުރީ ފާރުގައި ޖެހި މަތަވެފައެވެ.
ޝިޒާން އައިސް މިންހާގެ ދެފަރާތުން ފާރުގައި އަތް ޖައްސައިލާ އޭނާއާ ފާރާ ދެމެދު މިންހާ ހައްޔަރުކޮށްލިއެވެ.
"އަހަރެން ނޫޅެން ކަމެއް ކުރާކަށް. އެކަމަކު މިންހާ ބުނެބަލަ! ކީއްވެ އާހިލްއާ އެކީ ދިޔައީ؟" ޝިޒާން އަނެއްކާވެސް ސުވާލުކޮށްލިއެވެ. މިންހާ ދުރު ބަލަން ހުރުމުން އޭނާ މިންހާގެ ދަތް ދޮޅީގައި ހިފާ އޭނާއާ ހަތަރު ކަޅި ހަމަކުރުވިއެވެ.
"ޖަވާބު ދީބަލަ!" ޝިޒާން ބުނެލިއެވެ. ރުޅިއައިސްފައި ހުރިނަމަވެސް، ޝިޒާންގެ ދެލޮލުން މިންހާއަށް އިންތިހާ ވޭން ފެނުނެވެ. އެ ދެލޮލުން އޭނާއަށްޓަކައި ވާ ފުން ލޯބި ފެންނަމުން ދިޔަނަމަވެސް، މިންހާ އެކަން ގަބޫލުކުރާކަށް ތައްޔާރެއް ނޫނެވެ. އޭނާ ވަނީ އާހިލްގެ ލޯބީގައި ބަނދެވި ހައްޔަރުވެފައެވެ. ކުރިމަތިންފެންނަމުންދާ މަންޒަރުތައް ދެނެގަތުމުގެ ގާބިލްކަން ވެސް އޭނާގެ ނެތްފަދައެވެ.
"އަހަރެން..." މިންހާ ވަކި ހިސާބަކަށް ބުނެފައި ހުއްޓައިލިއެވެ.
"މިންހާ!" ޝިޒާން އަނެއްކާވެސް މިންހާއަށް ގޮވައިލިއެވެ. އޭނާ މިންހާގެ ޖަވާބަކަށް އިންތިޒާރުކުރިނަމަވެސް، މިންހާ އެއްޗެއް ނުބުނުމުން އަނެއްކާވެސް ވާހަކަ ދެއްކިއެވެ.
"އޭނަ ކައިރިއަށް މިންހާ ދާން ޖެހުނު ސަބަބަކީ ކޮބާ؟ ކީއްވެ ދިޔައީ؟ މިންހާއަށް އަހަރެންގެ ފަރާތުން ކޮންމެ ކަމެއް އުނިވެގެންތަ؟ އަހަރެން މިންހާ ބޭނުންވާ ކޮން ކަމެއް ކޮށްނުދީގެންތަ؟" ޝިޒާން ތަކުރާރުކޮށް އެއް ސުވާލުތަކެއް ކުރަން ފެށިއެވެ.
"އާނ... އަހަރެން ދިޔައިން އާހިލްއާ އެކީ... އެއީ އަހަރެން އާހިލް ދެކެ ލޯބިވާތީ... އަހަރެން ޝިޒާން ދެކެ ލޯތްބެއްނުވޭ. އަހަރެން ލޯބިވަނީ އާހިލްދެކެ. ހަމަ އެކަނި އާހިލްދެކެ. އަހަރެމެން ދެމީހުން ލޯބިން އުޅެނިކޮށް އަހަރެމެން ދެމީހުންގެ ދެމެދަށް ވަތް މީހަކީ ތީ. އަހަރެންގެ ދިރިއުޅުން ހަލާުކޮށްލި މީހަކީ ތީ." މިންހާއަށް ވެސް ބާރަށް ވާހަކަ ދެއްކުނެވެ. މިންހާގެ އެ ވާހަކަތައް ވިހަ ގަދަ ތީރުތަކެއްހެން ގޮސް ހެރުނީ ޝިޒާންގެ ހިތަށެވެ. ހިތުގައި އުފެދުނު ތޫނު ރިހުމުގެ ސަބަބުން އޭނާއަށް ދެލޯ ވެސް މަރައިލެވުނެވެ. މިންހާގެ ދުލުން އެ ބަސްތައް އިވުމުން އޭނާއަށް އެތައް ތަކުލީފިތަކެއް ލިބިގެން ދިޔައެވެ. ޝިޒާންއަށް ވަމުން ދިޔަގޮތަށް މިންހާއަށް ރަނގަޅަށްވެސް ފަހުމްވަމުން ދިޔައެވެ.
"ޖަސްޓް ޑިވޯސް މީ ޝިޒާން... އެއީ އެންމެ ރަނގަޅު ގޮތް." މިންހާ ބުނެލިއެވެ.
"އައި ހޭވް ޓޯލްޑް ޔޫ ދެޓް އައި ވިލް ނެވަރ ޑިވޯސް ޔޫ." ޝިޒާން އަތް މުށްކަވާފައި މިންހާގެ އެއްފަރާތުން ފާރުގައި ޖެހިއެވެ. ޝިޒާންގެ އެ އަމަލުން މިންހާއަށް އަނެއްކާވެސް ސިހުން ލިބުނެވެ. އޭނާ ޝިޒާންއަށް އެވަރަށް ޖެއްސުން ކުރި އިރުވެސް، އަދި ވަރިއަށް އެދުނު އިރުވެސް، ޝިޒާން ދުވަހަކުވެސް ރުޅިއެއް ނާދެއެވެ. ވީއިރު ޝިޒާން އެގޮތަށް ރުޅިއައުމުން އޭނާއަށް ހައިރާންކަން ލިބިފައިވެއެވެ.
"މީގެ ފަހުން މިންހާ އާހިލްއާ ބައްދަލުކޮށްގެން ނުވާނެ!" ޝިޒާން ފުރަތަމަ ފަހަރަށް މިންހާއަށް ކަމަކަށް މަނާކުރިއެވެ.
"ޝިޒާންއަކަށް އަހަންނަކަށް މަޖުބޫރެއް ނުކުރެވޭނެ." މިންހާ ބުނެލިއެވެ.
"އަހަންނަށް މަޖުބޫރުނުކުރެވެންޏާ ދެން ކާކަށް މަޖުބޫރުކުރެވޭނީ؟ އަހަރެން މީ މިންހާގެ ފިރިމީހާ. އަހަންނަށް މަޖުބޫރުވެސް ކުރެވޭނެ. މަނާވެސް ކުރެވޭނެ. މީގެ ކުރިން ދުވަހަކުވެސް އަހަރެން މިންހާއަށް ކަމެއް މަނާ ކޮށްފައެއް ނޯންނާނެ. އެކަމަކު ތިކަންތައް. އަހަންނަށް އެނގިގެން މިންހާއަކަށް ކުރިއަކަށް ނުގެންދެވޭނެ!" ޝިޒާން މިންހާގެ ދެލޮލަށް ބަލަހައްޓައިގެން ހުރެ ވާހަކަ ދެއްކިއެވެ.
"ދެން ކީއްވެތަ އަހަރެން ވަރިނުކޮށް ތި ހިފައްޓަނީ؟ ވަރިކުރިޔަސް ނުކުރިޔަސް އަހަރެން ބޭނުންތާކަށް ދާނަން." މިންހާވެސް ދޫދޭން ބޭނުންނުވާފަދައެވެ. މީގެ ކުރިން ނާންނަ ރުޅި މިހާރު ޝިޒާން އައުމުން އޭނާއަށް އާދަޔާ ޚިލާފް ހިތްހަމަޖެހުމެއް ލިބިފައިވެއެވެ. އެގޮތަށް ވެސް ރުޅިއައިސްގެން ކެތްކުރެވޭނީ ވަކި ވަރަކަށްތާއެވެ. ވަކި ހިސާބަކުން ޝިޒާން ވެސް ކެތްތެރިކަން ކޮޅުންލައިގެން އޭނާ ވަރިކޮށްލަފާނެއެވެ. އެއީ އޭނާ ބޭނުންވާ ގޮތެވެ. ވީ އެންމެ އަވަހަކަށް ޝިޒާން އޭނާ ވަރިކުރުމެވެ. އާހިލްއާ އޭނާއާ ގުޅެން އޮތް އެންމެ ބޮޑުހުރަހަކީ މިހާރު ޝިޒާންއެވެ.
"ބުނެފީމެއްނު އަހަރެން މިންހާ ވަރިއެއް ނުކުރާނަމޭ، މިންހާއަށް އަދި ވިސްނޭނެ." ޝިޒާން ބުނެލިއެވެ. އޭނާއަށް އިތުރަށް މިންހާގެ ކުރިމަތީގައި ހުންނާނެހާ ހިތްވަރެއް ނުލިބުނެވެ. މިންހާގެ ހިތުން އެއްވެސް ވަރަކަށް އޭނާއަށް ޖާގައެއް ނެތްކަން އެނގި އެހިތުގައި ރިހެމުންދިޔައީ ކެތްކުރަން ދަތިވާވަރަށެވެ. ޝިޒާން މިންހާއަށް ފުރަގަސްދިނެވެ.
"އަދިވެސް އެއްފަހަރު އަހަރެން ބުނާނަން. މިންހާ ވަރިއެއް ނުކުރާނަން" ޝިޒާން އެހެން ބުނެލާފައި ކޮޓަރިން ނުކުމެގެން ދާން ހިނގައިގަތެވެ. ޝިޒާން ކޮޓަރިން ނުކުމެ ދޮރުޖެހިތަން ބަލަން ހުރެފައި މިންހާވެސް ދެބުމަ ގޮށްޖަހާލައިގެން ހުރެ އައިސް އެނދުގައި އިށީނދެލިއެވެ. ޝިޒާންއަށް ޖެހޭނީ އޭނާ ވަރިކުރާށެވެ. އޭނާ އާހިލްއާ ބައްދަލުކުރުމެއް ނުހުއްޓާނެވެ. ޝިޒާން ރުޅި އަންނާނީ އޭނާއާހިލްއާ ބައްދަލުކުރުމުންނެވެ. ވީއިރު، ރުޅިއައިސްގެންވެސް ޝިޒާން އޭނާ އެންމެ އަވަހަށް ވަރިކުރާނެ ގޮތަކީ އެއީއެވެ.
ޝިޒާން މިންހާގެ ކޮޓަރިން ނުކުމެގެން އެ ދިޔަ ގޮތަށް ދިޔައީ އޭނާގެ ކޮޓަރިއަށެވެ. އެނދުމައްޗަށް ވެއްޓިގަތްފައި ޝިޒާން އޭނާގެ ނިތުގައި އަތް ހިންގައިލިއެވެ. އޭރު އޭނާގެ ބޮލުގައި ވެސް ރިއްސަމުންދިޔައެވެ. މިންހާއާ މެދު އޭނާގެ ހިތް ޝަކުވާއިން ފުރެމުންދިޔައެވެ. އޭނާ މިންހާ ދެކެ އެހާ ލޯބިވާއިރު އެ ހަޤީގަތް މިންހާއަށް ނުފެންނަނީ ކީއްވެހެއްޔެވެ؟ މިންހާ އާހިލް ދެކެ އެހާ ލޯބިވަނީ ކީއްވެހެއްޔެވެ؟ ޝިޒާން ފުންނޭވާއެއް ދޫކޮށްލިއެވެ.
ނިދަން އޮށޯއިން ނަމަވެސް، ޝިޒާންއަށް ނިދޭގޮތެއް ނުވިއެެވެ. އޭނާގެ ހިތުގައި ޝަކުވާތައް ދިޔައީ ފުނިޖެހެމުންނެވެ. މިންހާ އޭނާއާ ދޭތެރޭ ކަންތައް ކުރާގޮތުން އޭނާގެ ހިތަށް އެ ލިބޭ ވޭންތައް އޭނާ ދުލުން ބަޔާން ކުރާނީ ކިހިނެއްހެއްޔެވެ؟ އެހުރިހާކަމެއް ހިއްސާކޮށްލާނެ ގާތް މީހަކު ކައިރީގައި ނެތުމަކީ އޭނާއަށް ލިބޭ އެންމެ ބޮޑު އެއް ހިތާމައެވެ. ކޮންމެވެސް ދުވަހަކުން މިންހާގެ ލޯބި އޭނާއަށް ލިބޭނެކަމަށް އަމިއްލަ ހިތަށް ވިސްނައިދެމުން ދިޔަ ވިސްނުން އެއީ ހަޤީގަތެއް ނެތް ބިލާހަކަށް ވަނީ ހެއްޔެވެ؟ މިންހާގެ ދުލުން އެހެން މީހެއްދެކެ ލޯބިވާކަމަށް އިއުތިރާފްވަމުން ދިޔައިރު، އޭނާގެ ހިތަށް ކުރާނެ އަސަރު މިންހާ އަންދާޒާކޮށެއް ނުލިއެވެ. އޭނާ ލޯބިވާކަން އެނގިހުރެއެވެ. މިންހާ އޭނާގެ ހިތަށް އެ ދެނީ ކޮންފަދަ ވޭނެއް ހެއްޔެވެ؟
ޝިޒާން އެރޭ ހަތަރު ދަމު ހޭދަކުރީ އެ ފަދަ ވިސްނުންތަކެއްގައެވެ. ނިދި ވަނީ އޭނާއާ އެތައް ހާސް މޭލެއްގެ ދުރުގައެވެ. މިންހާގެ ޚިޔާލުތައް އޭނާގެ ސިކުނޑިން ނެރިލާނެ ގޮތެއް ޝިޒާންއަކަށް ނުވިސްނުނެވެ. މަނާ ކުރިއެއްކަމަކު މިންހާ އާހިލް ކައިރިއަށް ދާނެކަން ޝިޒާންއަށް ރަނގަޅަށް އެނގެއެވެ. އޭނާގެ ހިތަށް އެންމެ އުނދަގޫވަނީ އެހެންވެއެވެ. މިންހާއަށް ހަޤީގަތް އެނގޭނެނަމަ ކިހާ ރަނގަޅުހެއްޔެވެ؟ މިންހާއަށް ދުވަހަކުވެސް ދެރަގޮތެއް ވާން އޭނާ ނޭދޭކަން އެނގޭނެނަމަ ކޮންފަދަ ހެއްޔެވެ؟
*****
ޖެހިގެން އައި ދުވަހު ޔޫލިން މިންހާގެ ކައިރިއަށް އައެވެ. ހަވީރުގެ ވަގުތުކަމުން ދެމީހުން ނުކުތީ ބަގީޗާއަށެެވެ. އެތަނުގައި އެލުވާފައި ހުރި އުނދޯލީގައި އިށީނދެފައި އެމީހުން ފުރަތަމަ ފެށީ ޔޫލިންގެ ކައިވެނީގެ ވާހަކައެވެ.
"އައިހަމްމެން ފެމެލީ މީހުން ބޭނުންވޭ ޕާޓީއެއް ބާއްވަން." ޔޫލިން ބުނެލިއެވެ.
"އެހެންތަ؟"
"އާނ. ސޯ ވެޑިން ޑްރެސްގެ ކަންތަކުގަ އުޅޭނަން މި ހަފްތާތެރޭގައި. ދެ ހަފްތާ ފަހުން ކައިވެނި އޮތަސް ކައިވެނީގެ ކުރިން ހާދަ ބައިވަރު ކަންތައްތަކެއް ކުރަން އެބަޖެހެޔޭ. އައިހަމްވެސް ބޭނުންވަނީ ކައިވެންޏަށްފަހު ދެމީހުން ވަކިން ދިރުއުޅެން. އެހެންވީމަ ކުރަން ޖެހޭ ބައިވަރު ކަންތައްތައް ހުންނާނެއެއްނު. ތަނެއް ހޯދުމާ. ތަނަށް ބޭނުންވާ އެއްޗެހި ހޯދުމާ..." ޔޫލިން ބުނެލިއެވެ. ޔޫލިން ދައްކަމުން ދިޔަ ކޮންމެ ވާހަކައަކަށް މިންހާ ދިޔައީ ބޯ ޖަހަމުންނެވެ. އޭނާ އިނީ ނެގިމަޑުވެފައެވެ. އެކަން ޔޫލިންއަށް ފާހަގަވުމާއެކު އޭނާ މިންހާގެ އަތުގައި މަޑުމަޑުން ހިފައްޓައިލިއެވެ. އަދި މިންހާއަށް ގޮވައިލިއެވެ.
"މިންނު. ކިހިނެއްވެފަ ތިއިނީ؟ ކަމެއް ވީތަ؟ ޝިޒާން އެއްޗެކޭ ކީތަ؟" ޔޫލިންއަށް ސުވާލުކޮށްލެވުނެވެ.
"ކަމެއް ނުވޭ!" މިންހާ ގަދަކަމުން އޭނާގެ ތުންފަތް މައްޗަށް ހިނިތުންވުމެއް ވެރިކޮށްލަން މަސައްކަތްކުރިއެވެ.
"އަަހަންނަށް އެނގޭ ކޮންމެވެސް ކަމެއްވެއްޖެކަން. ބުނެބަލަ!" ޔޫލިން އަނެއްކާވެސް ސުވާލުކޮށްލިއެވެ. އޭނާ ތަކުރާރުކޮށް ކިޔަން ފެށުމުން އެންމެ ފަހުން ރޭގައި ކަންތައް ހިނގާދިޔަގޮތް މިންހާ ޔޫލިންއަށް ކިޔައިދިނެވެ.
"އަހަރެން އޭރުވެސް ބުނިން މިންނު ކައިރީގައި ތިގޮތަށް ކަންތައް ނުކުރާށޭ!" ޔޫލިން ބުނެލިއެވެ.
"އަހަރެން ބޭނުންވަނީ ވަރިވާށޭ. ރުޅި އައިސްގެންވެސް ވަރިކޮށްފިއްޔާ ރަނގަޅެއްނު" މިންހާ ބުނެލިއެވެ.
"ތީ ރަނގަޅު ގޮތެއް ނޫން. މިންހާ ޝިޒާންގެ އަނތްބެއްގެ ގޮތުގައި ހުރެ އާހިލް އާ ބައްދަލުކުރަން ދިޔުމަކީ ވެސް ރަނގަޅު ކަމެއް ނޫން. ރައްޓެހިވެގެން އެހާ ދުވަސްވީއިރު މިންހާއާ ބައްދަލުކޮށްހުރެފައި ޝިޒާންއާ ކައިވެނިކުރި ފަހުން ބައްދަލުކުރާނީ ކީއްވެހެން މިންހާއަށް ހީވަނީ؟ ތި ދެމެދުގައި މައްސަލަޖެހުން ނޫންކަމެއް ނުވާނެއެއްނު. އެކަން އާހިލްއަށްވެސް އެނގޭނެ. އޭނަގެ މަޤްސަދަކީ ހަމައެކަނި ލޯބިވާތީ މިންނު އާ ބައްދަލުކުރުންހެން މިންނުއަށް ހީވަނީތަ؟" ޔޫލިން މިންހާއަށް ވިސްނައިދޭން މަސައްކަތް ކުރަމުންދިޔައެވެ. އާހިލްއަކީ އެއްއިރެއްގައިވެސް ޔޫލިންއަށް ކަމުދާ ޒުވާނެއް ނޫނެވެ. ވުމާއެކު އާހިލްއާ މެދު ރަނގަޅަށް ވިސްނުން ވެސްއެއީ އޭނާއަށް ކުރެވޭނެ ކަމެއް ނޫނެވެ. އާހިލްގެ މަޤްސަދާ މެދު އޭނާއަށް އަބަދުވެސް ޝައްކުވެއެވެ. މިންހާދެކެ އެހާ ލޯބިވާނަމަ މިންހާ ޝިޒާންއާ ކައިވެނި ކުރުމުގެ ކުރިން ގައިމު ކޮންމެވެސް ގޮތަކުން އާހިލް މިންހާއާ ބައްދަލު ކުރާނެ ނޫންހެއްޔެވެ؟
(ނުނިމޭ)