31 Jan 2022, 12:42
ކައިލް ސަލާމަތުން ހުރި ކަމަށް އަހަރެން އުއްމީދުކުރަން. ޒައިނަބުއަކީ ހަމަ ފައްކާ ގާތިލެއް." މަހުމޫދު އެހެން ބުނުމުން މިކާލް ބޮލުގައި ދެއަތުން ހިފަހައްޓައިލިއެވެ. އެންމެންވެސް އުއްމީދުކުރަމުން ދިޔައީ ކައިލްގެ ފަރާތުން ރަގަޅު ޚަބަރެއް ލިބުމަށެވެ. އެމީހުންނަށް ނޭގުނީ ކައިލް ހިލހިލާގައި އެލުވާ ލެޔާ ތަތްތެޅި އަމިއްލައަށް އެއްވެސް ކަމެއް ނުކުރެވޭފަދަ ހާލެއްގައި އޮތްކަމެވެ.
***
"ކަލޭގެ ވަގުތު ޖެހުނީތީ ހިތާމަކުރަން. ވާހަކަދައްކަން ދެކޮޅު ހެދީ. ކަލޭ ބަނޑަށް ނޫނީ ޒަޚަމްތަކުގެ ސަބަބުން މަރުވެގެންދާނެ. އެކަމަކު ޝޯޓްކަޓެއްނަގަން އަހަރެން އެހީވާނަން........" ހައިތަމް އޭނަގެ ބަޑިއަށް ވަޒަން ލައްވަންފެށިއެވެ. ހަތިޔާރު ގުދަންކޮށް ގެންގުޅުމަކީ ހައިތަމް ކުރާ އަނެއް ގާނޫނީ ކުށެވެ. އަސްކަރިއްޔާގައި އޭނައަށް ލިބުނު ބާރު ނަހަމަގޮތުގައި ބޭނުންކޮށްލަނީއެވެ.
"ޑޯންޓް ޔޫ ޑެއާ......" ވަށައިގެން ޖަހާފައިވާ ހިިލިހިލާތައް ހަލާކުކުރަން މަސައްކަތްކުރަމުން ކަރުފަޅައިގެންދާ ހާ ބާރަށް އިސްހާގު ހަޅޭއްލަވައިގަތެވެ. "ކައިލް.........."
އެކަމަކު ކައިލްގެ ލޯވަނީ މެރިފައެވެ. އޭނަ އަދި ނޭވާލާކަން އެނގެނީ ކޮންމެ ނޭވާއާއެކު ކުޑަކޮށް ކޮނޑު ހަރަކާތްކުރާތީއެވެ.
"މަންމާ. އަޅުގަނޑު މާފުކޮށްފިން. މަންމަ އުޅުނީ ދަތި ދިރިއުޅުމެއް. މަންމައަށް ވެދެވުނީ ނުބައި އާއިލާއަކަށް.. މަންމަ އަޅުގަނޑަށް މާފުކުރޭ. މަންމަ އެ މޮންސްޓާސްއިންގެ ފަރާތުން ސަލާމަތްކޮށް ނުދެވުނީތީ. ފޮގިވް މީ މަމް. މަންމަ އެތައް އަހަރެއްވާންދެން އެމީހުންގެ ފަރާތުން އަޅުގަނޑަށް ހިމާޔަތްދީ ސަލާމަތްކޮށްދިން އެކަމަކު މަންމައަށް ހެދިގޮތަށް ހެދިޔަދިނީތީ......."
"ހައިތަމް. މަހުމޫދު ގެއްލުވާލުމުގެ ޒިންމާ އުފުލަން ޖެހޭނީ ތި އާއިލާއިން. ވިންޓަރފެލްއިން މަޖުބޫރުކޮށްގެން މަހުމޫދު ކައިލްގެ މަންމަ މަރައިލީ." އިސްހާގުއަށް އިތުރަށް ކެތެއްނުކުރެވުނެވެ. އެއްވެސް ހެއްކެއް ނެތަސް އޭނައަށް އެނގޭ އެއްޗެއް ހަޅޭއްލެވިއެވެ.
"އެހުރިހާކަމެއް އެނގެއެއްނު. ދެން ކީއްވެ ތިމީހުންގެ ވިޔަފާރިއަށް ގެއްލުން ދިނީމަ ހައިރާންވެގެން ތި ސުވާލުކުރަނީ؟" އިސްހާގު ކުޅު ޖެހިއެވެ. ހައިތަމް ޗޮކެއް ކަނޑައިލިއެވެ.
"ވީއިރު ކަލޭވެސް މި ޒުވާނާގެ ނަފްސާނީ މައްސަލައެއް ހުރިކަމުގެ ޔަގީންކަން މަށަށް ތިދިނީ. ނަފްސާނީ ބަލިމީހެއްގެ ގާތުން ގަބޫލުކުރެވޭފަދަ ޖަވާބެއް ލިބިދާނެކަމަށް އުއްމީދުކޮށްގެންވެސް އަހަރެން ނުވާނެ." ހައިތަމް ކައިލްއަށް ބަޑިއަމާޒުކުރިއެވެ.
"ހުއްޓާލާ....." އާވާގެ ހަޅޭކުގެ އަޑާއެކު ހައިތަމްއަށް ބަލައިލެވުނީ ރުޅިވެރި ނަޒަރަކުންނެވެ. އަދި ދަތްކުނޑިވިކައިގެންފާ ދަތްދޮޅި ވާންކޮށްލެވުނެވެ." ކީކޭ ހިތަށް އަރައިގެން މިތަނަށް ތިއައީ އާވާ...."
"އޭނަ މިތަނުން ނެރޭ..." ހައިތަމް އޭނަގެ މީހުންނަށް އަމުރުކުރިއެވެ.
އޭރު އާވާ ކައިލްއަށް ބަލަހައްޓައިގެން ހުރީ ހައިރާންވެ އިންތިހާ ދަރަޖައިގެ ހާސްކަމާއިއެކުއެވެ. ކައިލް މަރުވީހެއްޔެވެ؟ އޭނައަށް އާދެވުނުލެއް ލަސްވީހެއްޔެވެ؟ އާވާއަށް އެއްވެސް ސަމާލުކަމެއް ނުދީ ހައިތަމް ބަޑި އުފުލައިލިއެވެ. އެއްވެސް ރަހުމެއްނެތި ހައިތަމް ޓްރިގަރަށް ފިތައިލިއިރު ކައިލް މަރުވާ މަންޒަރު ލޮލުގެ ކުރިމަތިން ދެކެން ކުޅަދާނަ ނުވެގެން ކަރުނަ އޮހޭ ހާލު އިސްހާގުވެސް ލޯ މަރާލައިފިއެވެ. ވަގުތުވެސް ހުއްޓުނުފަދައެވެ. ދުނިޔެވެސް އެނބުރެމުންގޮސް ހުއްޓުނުފަދައެވެ. ހުރިހާ އެއްޗެއްވެސް އެސިކުންތުކޮޅު ގަނޑުވިއެވެ. އޭނަގެ ބައްޕަ ހުއްޓުވަން ގޮސް ކުރިމައްޗަށް އެރުމާއެކު ވަޒަން އެރީ ސީދާ އާވާގެ މެޔަށެވެ.
ބަޑީގެ އަޑާއެކު ކައިލްއަށް އިތުރު ކަމެއް އިހުސާސެއްނުވިއެވެ. ގައިގަ ބާކީ ހުރި ކުޑަ ހަކަތަކޮޅު ބޭނުންކޮށްގެން އޭނަ ލޯ ހުޅުވައިލިއެވެ. ކުރިމަތިން ފެނުނު މަންޒަރުން ކައިލްގެ ހިތްވެސް ވެއްޓިގެން ދިޔައެވެ. އަމިއްލަ ހަށިގަނޑުގައި އަޅަމުން ދިޔަހާ ވޭން ހަނދާން ނައްތައިލެވި ޝޮކެއް ލިބުނެވެ. ކައިލްއަށް ބަލަން ހުރެވުނީ އާވާ ލައިގެން ހުރި ހެދުން ލެއިން ކަޅިވާތަން ފެނިފައެވެ.
"ޑޭޑް......" އާވާ ވާހަކަދައްކަން މަސައްކަތްކުރިއެވެ. އެކަމަކު އަނގައިންވެސް ލޭ އަންނަން ފެށުމުން އޭނަ ކޮށި އަރައިގަތެވެ. ހައިތަމް އަވަސްއަވަހަށް އެސްފިޔަ ޖަހައިލިއެވެ. ފެންނަ މަންޒަރު ދޭހައެއްވެސް ނުވިއެވެ. ދެންމެ މި ވީ ކިހިނެއް ހެއްޔެވެ؟ އޭނަގެ ތުރުތުރުލަމުން ދިޔަ އަތުން ބަޑި ސޮއްސާލައިގެން ވެއްޓި ތަޅުންމަތީގައި ޖެހި މައިތިރިވިއެވެ. އޭގެ އެއްވެސް ކުށެއްނެތެވެ.
ހައިތަމް ދުވެފައިގޮސް އާވާގެ ކައިރިއަށް ކުޑަކަކޫމައްޗަށް ތިރިވިއެވެ.
"އާވާ. ލޯ ހުޅުވަބަލަ..." އާވާގެ ކުޑަ ކުޑަ ހަށިގަނޑު އަތުތެރެއަށް ލަމުން ހައިތަމް އަށް ބުނެވުނެވެ.އާވާ ދުނިޔެއަށް އައި ފުރަތަމަ ދުވަހު އެ ޗަބީ ވަށް މޫނުކޮޅު ފެނުނު މަންޒަރު ހައިތަމްގެ ލޮލުގެ ކުރިމަތިން ވިދުވަރެއްފަދައިން ދިޔައެވެ.
"ކައިލް....އަހަރެންގެ ބޭބެ...." އާވާ ވާހަކަދައްކަން މަސައްކަތްކުރީ މުށުތެރޭގައި އޮތް ކަރުދާސް ދައްކަން އަތް އުފުލައިލަމުންނެވެ. އެވެސް ރޫ ޖެހި ލެއިން ތަތްތެޅިފައެވެ.
އެހާވަރުން އޭނަގެ ދަރިފުޅު ދައްކަން ގެނައި ކަރުދާހަށް ނަޒަރު ހުއްޓައިލެވުނުއިރު ނޯރާ، ނާޔަލް، އަދ އައިޒަކް އެތެރެއަށް ވަދެގަތީ މެޑިކަލް ޓީމަކާއިގެންނެވެ.ހުރިހާ ކަމެއް ފެންނަމުން ދިޔައީ ފުސްކޮށެވެ. ހައިތަމް އޭނަގެ މަރުވަމުން ދިޔަ އަންހެންދަރިފުޅު އަތްދަނޑިމަތީގައި އަދި ލޯ އެ ޑީއެންއޭ ނަތީޖާއަށް ހުއްޓިފައި ވަށައިގެންވާ އެއްވެސް ކަމެއް ނޭގި އެވަގުތުކޮޅު ސިކުނޑީގެ ތެރެއިން ކޮންމެވެސް ބަޔެއް އަބަދަށްޓަކާ ތަޅުލެވިގެން ދިޔަފަދަ އިހުސާސެއް ކުރެވުނެވެ.
***
"ކައިލް....."ނޯރާ ކައިލްގެ މޫނުގައި ދެއަތުން ހިފަހައްޓައިލެވުނުއިރު ރޮވިއްޖެއެވެ. އޭނަގެ ދެއަތްތިލަ ތެމުނީ ހޫނު ލެއިންނެވެ. ކައިލްއަށް ބީހުމުގެ އިހުސާސެއްނުވެއެވެ. އޭނަވަނީ އައްސިވެފައެވެ. އޭނަގެ ނަޒަރު ހުއްޓިފައިވީ އާވާގެ ހަރަކާތެއް ނެތް ހަށިގަނޑަށެވެ. ލެއިން ތެމިފައިވާ އާވާ ފެނުމުން އައިޒަކްވެސް ހުއްޓުން އެރިއެވެ.
އައިޒަކްއަށް ނާޔަލް ގޮސް އާވާ އުފުލައިލިތަން ފެނުނެވެ. ދެން ބަލައިލެވުނީ ބޮޑު ބޭބެެގެ މޫނާއި ތަޅުންމަތީގައި އޮތް ބަޑިއަށެވެ. ނޯރާއާއި ނާޔަލް އަދި އެހެން އެންމެންވެސް އަވަސްވެގަތީ ކައިލް، އާވާ އަދި އިސްހާގުއަށް އަވަސް ފަރުވާ ބޭނުންވާތީ ސްޓްރެޗާއަށް ލުމަށެވެ. އެކަކުވެސް ޝޮކަކަށްގޮސް ނޫނީ ރުއިމުގާ އެންމެ ސިކުންތުކޮޅެއްވެސް ބޭކާރުކުރާކަށް ނަހަދައެވެ. ނާޔަލްއާއި ނޯރާ އެމީހުންގެ ވާޖިބު އަދާކުރީ އޭގެ އެންމެ ފުރިހަމަ ގޮތުގައެވެ.
***
ކައިލް ލަސްލަހުން އެކަމަކު އެއްވަރަށް ނޭވާލަމުން ދިޔައެވެ. ވައިރުތަކާއި ހޮޅިތަކުގެ ތެރެއިން ކައިލްގެ މޫނަށް ބަލަން ހުރެފައި ނޯރާ ގާތަށް ދިޔައެވެ. އަދި ކްލިނިކަލް އަންގި ލައްވާފައިވި އަތުން ކައިލްގެ އަތުގައި ހިފަހައްޓައިލިއެވެ. ކިތަންމެ މަޑުން ކަމުގައިވިޔަސް ނޯރާގެ ހުރިހާ ލޯތްބަކާއެކުގައެވެ.
އެހުރިހާ ވައިރުތަކާއެކު ކައިލްގެ އުމުރު ދުވަހުވެސް ފެނުނު އެންމެ ނާޒުކް އަދި ބަލިކަށިހާލެވެ. އެ ރަންމުށިކުލައިގެ ލޮލަށް އިރުގެ އަލި އެޅޭނެ ދުވަހެއް ދެކެން އޭނަ ދުޢާކުރިއެވެ. ކައިލްއަށް އިހުސާސްވާނެ ގޮތެއް ދެނެގަންނަން އޭނައަށްވެސް އުދަގުލެވެ. އަމިއްލަ އާއިލާއިން މަންމަ މަރައިލާ އަދި އޭނައަށް އެހާ ބޮޑު ވަރުކޮށް ހޮސްޕިޓަލުގައި އެނދުމަތިކުރީއެވެ. އެއްވެސް މީހަކަށް އުފުލަން ފަސޭހަކަމެއް ނޫނެވެ. ނޯރާއަށް ފެނުނުގޮތުން ހައިތަމްވެސް ހުރީ ވަރަށް ބޮޑަށް ޝޮކަކަށް ގޮސްފައެވެ. ހީވާގޮތުން ކައިލްއަކީ އަމިއްލަ ދަރިފުޅުކަން ހައިތަމްއަކަށްވެސް ނޭގެއެވެ. އަނާލިއާ މަރައިލެވުނީކަންވެސް ނޭގޭ ހެއްޔެވެ؟ ނޯރާ ވިސްނައިލިއެވެ. ހައިތަމްއަށް އެނގުމުން އޭނަ އެކަން ނަގައިގަންނާނީ ކިހިނެއް ހެއްޔެވެ؟ކައިލްގެ އެސްފިޔަތައް ތަޅުވަައިލުމުން ނޯރާގެ މޫނު ދިއްލުނެވެ. އޭނަގެ ދުޢާ އިޖާބަވީއެވެ. އެލޯ އެންމެ ފަހުން ހުޅުވާލައިފިއެވެ. ޓޮޕަޒް ޖަވާހިރުފަދައިން އެދެލޯ ވިދައެވެ.
"ކައިލް...."ނޯރާއަށް ބުނެވުނެވެ."ދެ ދުވަސްވާންދެން ނިދިއްޖެ. މިހާރު ކިހިނެއްތަ؟"
އެވަގުތު ނޯރާއަށް ހާސްކަމާއެކު އަތް ދަމައިގަނެވެން އުޅެވުނީ އޭނަ ކައިލް އަތުގައި ހިފަހައްޓައިގެންކަން ރޭކާލުމުންނެވެ. ނަމަވެސް ކައިލް އެ އަތުން ދޫކޮށެއް ނުލިއެވެ.
"އާވާ......ޑިޑް ޝީ މޭކް އިޓް؟" ކައިލްގެ އަޑު މަޑުކަމުން ނޯރާއަށް ކިރިޔާ އެބުނި އެއްޗެއް ދޭހަވީއެވެ. އާވާގެ ނަން އިވުމާއެކު ނޯރާގެ މޫނުން އުޖާލާކަން ކެނޑުނެވެ.
"އާވާ އިޒް ސްޓިލް ވިތް އަސް..." ނޯރާ ކައިލް ގާތު ބުނަން ބޭނުންނުވީ ޑޮކްޓަރުން އުއްމީދު ކަނޑައިލި ވާހަކައާއި ނޭވާލަނީ ހަމައެކަނި ވެންޓިލޭޓަރުގެ އެހީގައި ކަމެވެ. ކައިލްގެ އަތް ނޯރާގެ އަތުން ދޫވެ އަނެއްކާވެސް އެދެލޯ މެރިއްޖެއެވެ.
***
ވިންޓަފެލް ވަށައިލީ ހަލާކެވެ. ހުރިހާ އެއްޗެއް ކުދި ކުދިވެގެން ފައިބައިގަތެވެ. ވިންޓަފެލްގެ މެމްބަރުންގެ ހިނިތުންވުންތައް ގެއްލިއްޖެއެވެ. އެމީހުންގެ މޫނަކީ މޮޅިވެރިކަމާއި ހިތާމައިގެ ތަސްވީރެވެ.
އެ ބަދުނަސީބުން ފުރިގެންވީ ދުވަހު ހައިތަމް އެ ޑީއެންއޭ ރިޕޯޓްފެނި އޭނަގެ ގެއަށް މަންމަގެ ގާތަށް ދިޔައީ ހެދުން އާވާގެ ލެއިން ތަތްތެޅިގެން ހުރެއެވެ. ޒައިނަބުގެ އޮފީހަށް ހައިތަމް ވަންތަން ފެނި އަޑުކޮޅަށް ހަޅޭއްލަވައިގަނެވުނެވެ. ހައިތަމްގެ ލައިގެން ހުރިހެދުން އެހާ ހަޑިވެފައިވާއިރު އޭނަ ހީވަނީ ވަރުބަލިކަމާއިއެކު އެތައް ޒަމާނެއްވާންދެން ތަންމަތީގައި އޮވެފައި އައި މީހެއްހެންނެވެ.
"ހައިތަމްއަށް ކިހިނެއްވީ؟ މަގޭ ދަރިފުޅާ. އަނިޔާއެއް ވީތަ؟"
ހައިތަމް އެ ލެއިން ކަޅިވެފައިވާ ރިޕޯޓް ޒައިނަބުގެ މޭޒުމަތީގައި ބޭއްވިއެވެ. ޒައިނަބު އެއަށް ބަލާލާފައި ދެވަނަ ސިކުންތުކޮޅުގައި އެ ވީދާ ކުދިކުދިކޮށްލާފައި ހޫރުވައިފިއެވެ." އިޓްސް ނޮންސެންސް..." ޒައިނަބު ހައިތަމްއާއި ހަތަރުކަޅިހަމަ ނުކުރަން މަސައްކަތްކުރަމުން ހަރުކަށިގޮތަކަށް ބުނެލައިފިއެވެ. އޭނަ މަސައްކަތްކުރަމުން ދިޔައީ އަޑުގައިވި ތުރުތުރުއެޅުން ފަރުދާ ކުރުމަށެވެ.
"ވީއިރު އޭރުވެސް އެހުރިހާކަމެއް އެނގޭ..."ހައިތަމް ރޮއިގަތެވެ. ހައިރާންކަމާއެކުގައެވެ." އަހަރެން އެހުރިހާ ކަމެއް ކުރަން ޖެއްސީ....މަގޭ ދަރިފުޅަށް..." އެންމެފަހުގެ ލަފުޒުތައް ހަޅޭކަކާއިއެކު ކިޔައިލިގޮތުން ޒައިނަބުއަށް ލިބުނު ސިހުމާއެކު އަތް ތުރުތުރުލައިގަތްގޮތަށް ޖޯޑުގައި ހުރި ސައި އޭނަގެ އަގުބޮޑު ހެދުމަށް ބަންޑުންވިއެވެ.
"އެއްވެސް ކަމެއް ބަދަލުވާނެތަ؟ ދަރިފުޅާ..." ޒައިނަބު ގޮނޑިން ތެދުވެގެން ހައިތަމްއާއި ދިމާލަށް ހިނގައިގަތެވެ. ހައިތަމް މަންމައަށް ބަލަން ހުރީ ބަސްހުއްޓިފައެވެ. މަންމަގެ ލޮލުން އެވަގުތު ފެނުނީ ހަމަޖެހޭ މީހެއްގެ ލޮލުގައި ހުންނާނެ އަސަރެއް ނޫނެވެ.
"މަންމައަކަށްވެސް ކުރިއަކުން ނޭގޭ. އާވާގެ ކައިވެނި އޭނަގެ ބޭބެއަކާއި ކުރުވަން އުޅޭހާ މޮޔައެއްނުވާނެ ދޯ....."
"އެކަމަކު އެނގުނު....އޭނަގެ ފުރާނަ ނަގައިލަން އަމުރުކުރިއިރު އެއީ މަގޭ ދަރިފުޅުކަން އެެނގިހުރެ...."ހައިތަމްގެ އަޑު ކެނޑުނެވެ." އަމިއްލަ މާމަ ދަރިފުޅު...."
"އަހަރެމެންގެ އާއިލާގެ ކުރިއެރުން ހުއްޓުވާ ކޮންމެ އެއްޗެއް ނައްތައިލަން ޖެހޭނެ. އެއީ ހައިތަމްގެ ބައްޕަ ދުނިޔޭގައި ހުންނެވިނަމަވެސް ބޭނުންވެލައްވާނެގޮތް. ބައްޕައަށް އެފަދަ ކަންތައް ހެންޑްލް ނުކުރެވުނީ ބައްޕަގެ ހިތް ބަލިވީމަ. އެހެންވެ ބައްޕަ އެހާ އަވަހަށް ދުނިޔެ ދޫކޮށް ދިޔައީ. މިފަދަ ދުނިޔެއެއްގައި އެފަދަ ބަލި ހިތަކާއިއެކު ވެރިކަމެއް ނުކުރެވޭނެ...."ޒައިނަބުގެ ތުންފަތަށް ވެރިވީ ހައިތަމްއަށް ބީރައްޓެހި ހިނިތުންވުމެކެވެ."އެކަމަކު އަހަރެމެންނަށް ވެވިދާނެ ދަރިފުޅާ. ހައިތަމްއާއި މަންމައަށް...އަހަރެމެންގެ ބާރު ފުދޭވަރަކަށް ގަދަ. އަހަރެމެން އަތުގައި ފައިސާ އެބަހުރި. އަނާލިއާ ނައްތައިލިފަދައިން އެ ޝައިތާނީ ދަރިވެސް ނައްތާލަންވީ. އެމީހުން ދުނިޔެއަށް އައީ އަހަރެމެންގެ ދިރިއުޅުމަށް ދަތިކުރަން. މިފަދަ ދަތި ދުނިޔެއެއްގައި ސަލާމަތުން ތިބެން އަހަރެމެންގެ އަތްތައް ހަޑިކުރަން ޖެހޭ ފަހަރުވެސް އަންނާނެ...."
"މަންމާ. މަންމަ ބުނީމެއްނު އަނާލިއާއަށް ބައްޔެއް ޖެހިގެން ޖަލުގައި ހުއްޓާ މަރުވީއޭ...." ހައިތަމްގެ ހިތް އަވަސްވެފައިވާއިރު ދެލޮލަށް ރަތްކަމެއް ވެރިވެފައި ހުއްޓެވެ. ޒައިނަބު ދެލޯ ފުޅާކޮށްލަމުން އަނގަމަތީ އަތް އެޅިއެވެ. މޮޔަވެފައި ހުރިވަރުން އޮޅިގެން އެބުނެވުނީ އޭނަ ދުވަހަކުވެސް ހައިތަމްއަށް އަޑު އިއްވަން ބޭނުންވި ޖުމްލައެއް ނޫނެވެ.
"މަންމާ. އަނާލިއާއަށް ކީއްކުރީ؟"ހައިތަމްގެ އަޑު ނުރައްކާތެރި ދަރަޖައަކަށް ފިނިވިއެވެ. އޭނަ ޒައިނަބުއާއި ދިމާލަށް ހިނގައިގަތުމުން ފަހަތަށް ޖެހިލެވުނެވެ.
"ހައިތަމް.. މަގޭ ދަރިފުޅު..""
"އޭނައަށް ކީއްކުރީހޭ މަންމާ..." ހައިތަމަ ޒައިނަބުގެ ކޮނޑުގައި ހިފާ ތަޅުވައިގެންފާ ހަޅޭއްލަވައިގަތެވެ.
"އަހަރެން އޭނަ މަރައިލީ..." ޒައިނަބު ކިތަންމެ މަޑުން ބުނިކަމުގައިވިޔަސް ހަރުކަމެއް ހުއްޓެވެ. ޒައިނަބު ހުރިހާކަމެއް ކުރީ އޭނަގެ އާއިލާގެ ކުރިމަގަށްޓަކައެވެ. އަމިއްލަ ދަރިންނަށްޓަކައެވެ. އެއީ ލަދުގަންނަން ޖެހޭ ކަމެއް ނޫނެވެ. އެކަމަކު ހިތަށް މިވާންފެށީ ކޮން އުދަގޫތަކެއް ހެއްޔެވެ؟ ހައިތަމް އޭނަގެ މަންމަގެ ކޮނޑުން އަތްދޫކޮށްލިއިރު މޫނުން ފެނުނީ ހިތްދަތިކަމުގެ އިންތިހާއެވެ. އޭނަގެ ބެލުމުގައި ހުރީ ގޮތްހުސްވުމެވެ. އެދެލޯ ކަރުނުން ބަރާވިއެވެ. ހައިތަމް ހަޔާތުގައި ލޯބިވެވުނު ހަމައެކަނި އަންހެނަކީ އަނާލިއާއެވެ. އޭނައަށް ޒުވާން ދުވަސްވަރު އެކަން ރަގަޅަށް ނަގައިނުގަނެވުނީއެވެ. ހުރިހާކަމެއް ގޯސްވީ އޭނަ މަސްތުހާލުގައި ހުރެ ހިނގި އެކްސިޑެންޓަށްފަހުގައެވެ. މަންމަގެ އާދަޔާ ޚިލާފު ނުފޫޒު އަދި އޭނަގެ އާއިލާގެ ނަން ހަޑިވެދާނެތީ ޖަލަށް ދާން ޖެހުނުކަމުގެ ބިރު އެންމެފަހުން ނިމުނީ އަނާލިއާ ހައްޔަރުވެގެންނެވެ. އެމީހުން ކުށްވެރިކުރީ އެފަދަ ކަމެއް ދުވަހަކުވެސް ނުހިންގާނެފަދަ ކުށެއްނެތް އިންސާނެކެވެ. އަނާލިއާ ހައްޔަރުކުރުމުން ހައިތަމް ހީކުރީ ދުވަސްކޮޅެއް ފަހުން އަނާލިއާ ޖަލުން ދޫކޮށް އޭނަގެ ގާތަށް އަނބުރާ އަންނާނެކަމުގައެވެ.
ހައިތަމް ޚިޔާލުކުރީ ވިންޓަރފެލްގެ ނުފޫޒު ނުފޯރާ އެކަހެރި މަޑުމައިތިރި މާހައުލަކަށް ދިރިއުޅުން ބަދަލުކުރުމަށެވެ. އަށާވީހަކަށް އަހަރުފަހުން އަދިވެސް ހައިތަމްއަށް އަނާލިއާގެ އެލަދުރަކި ހުނުމުގެ އަޑު ކަންފަތަށް އިވެއެވެ. އެއީ ހައިތަމް އެމީހުންގެ އާއިލާ ފުރިހަމަވާނީ ފަސް މީހުންނާއެކުގައި ކަމުގައި ބުނުމުންނެވެ. އޭނަ ބޭނުންވަނީ ތިން އަންހެންކުދިންނެވެ. ތިންކުދިން ބޭނުންވަނީ ކީއްވެކަން އަނާލިއާ އެހުމުން ހައިތަމް ބުނީ އޭނަ އެދެނީ އެއް ކުއްޖަކަށް އަނާލިއާގެ ކުރެހުމުގެ ހުނަރު ވާރުތަވުމަށެވެ. އަނެއްކުއްޖާއަށް އަނާލިއާގެ ހިތްހެޔޮކަން ލިބުމަށެވެ. ތިންވަނަ ކުއްޖާއަށް އަނާލިއާގެ ސްމާޓްކަމެވެ. އެކަމަކު ކަންތައް ވެގެން ދިޔައީ ހީނުކުރާ ގޮތަކަށެވެ.
އަނާލިއާގެ މަރުގެ ޚަބަރު އިވުމުން ހައިތަމްއަށް ފުން އަސަރުތަކެއް ކުރިއެވެ. ހިތާމައަށް ދުވަހަކު ނިމުމެއްނާންނާނެކަމަށް ހައިތަމް ދެކުނެވެ. އޭނަގެ މަންމަގެ މެދުކެނޑުމެއްނެތް ހުށަހެޅުންތަކާއި މުއްސަދިކަމާއި ބާރުގެ ވާހަކަ ދައްކަމުންގޮސް ހައިތަމް އަމިއްލަ ފައިމައްޗަށް ތެދުކުރުވިއެވެ. އޭގެ ފަހުން ދުންޔަވީ އުފާތަކާއި ފަޚުރުވެރިކަން ފަދަ ކަންތައްތަކަށް ގޮސް ހުސްވެ ހައިތަމް ދުވާލާއި ރޭގަނޑު މަސައްކަތްކުރަން ފެށިއެވެ.
އެހުރިހާ ކަންތައްގަނޑުގެ ތެރެއަށް ގެއްލި އެންމެފަހުން އޭނަ އެ ލަދުރަކި ހިނިތުންވުމާއި އޭނަ އެއް އިރެއްގައި ނުހަނު ލޯބިން ހިފެހެއްޓި އެ ނާޒުކް ހިމަ އިނގިލިތައް ހަނދާންނެތިއްޖެއެވެ. އޭނަ ލަވެންޑަރ މަލުގެ ވަސްވެސް ހަނދާން ނައްތާލައިފިއެވެ.
އޭނަ މަންމައަށް ނަޒަރު ހުއްޓާލައިގެން ހުރިއިރު އެނގުނީ އޭނަގެ އަމިއްލަ މަންމަ އޭނައަށް ހަދަމުން ދިޔައީ ދޮގުކަމެވެ. އަނާލިއާ މަރުވީއެއް ނޫނެވެ. މަރައިލެވުނީއެވެ. އެވެސް ހައިތަމްގެ މަންމައެވެ. އަނާލިއާ ބަނޑުބޮޑުއިރު އެ އުދަގޫތަކާއި ބުރަތައް އުފުލަން ޖެހުނީ ހަމަ ޒައިނަބުގެ ސަބަބުންނެވެ.
އަނާލިއާ ބަނޑުބޮޑުވީ ކޮންއިރަކު ހެއްޔެވެ؟ އޭނަ ނުބުނީ ކީއްވެހެއްޔެވެ؟ ކާރު އެކްސިޑެންޓި ރޭގައިވެސް އަނާލިއާ އިނީ އޭނަގެ ދަރިފުޅަށް ބަލިވެއެވެ. ކުއްލި ހަނދާންތަކުން އޭނަގެ ހިތުގައި ރިއްސައިލިއެވެ. އެރޭ ފަދައިން އަނާލިއާ ދުވަހަކުވެސް އެހާ ދެރަވެ ޖަޒުބާތީ ވީކަމެއް ނޭގެއެވެ. އެހާ ބާރަށް ނުދުއްވަން އާދޭސްކުރަމުން ދިޔައިރު ހައިތަމް ބޮއިގެންކަން އެނގުމުން ރޮއިހެދިއެވެ. އެހުރިހާ އިރެއްގައިވެސް އޭނަ އިނީ ބަނޑުގައި ދެއަތް އަޅައިގެންނެވެ. އަނާލިއާ ހޮޑުވެސް ލިއެވެ. ހައިތަމް މޮޔައެއްފަދައިން ސުވާލުކުރީ ކުއްލިއަކަށް "ކާރ ސިކްނެސް" ވީ ހެއްޔޭއެވެ. އަދި ކާރު ތެރެއަށް ހޮޑުލުމުން އެކަމާވެސް މައްސަލަޖެއްސިއެވެ.
ކުއްލިއަކަށް ހައިތަމްގެ ފައިން ވާގި ހުސްވެ ކަކޫމައްޗަށް ތިރިވެވިއްޖެއެވެ. ކައިލްގެ މޫނު ލޮލުގެ ކުރިމައްޗަށް އައުމުން ހަގީގަތުގައިވެސް އޭނައާއި ވައްތަރުވިއެވެ. ހައިތަމްގެ ލޮލުގެ ކުލަ ގެއްލިފައިވިޔަސް އޭނަ ޅަ ދުވަސްވަރު ހުރީ ހަމަ އެކުލައިގައެވެ. އޭނަ ހަނދާންވީ ދެއަތުން ކައިލްގެ ގަޔަށް ބޭލި އެތިފަހަރުތަކެވެ. ލޭ އޮހޮރުވައިލިވަރެވެ. އަދި އަމިއްލައަށް އޭނަގެ ބަޑީގެ ޓްރިގަރަށް އޮބައިލުމުން އާވާ މަރާއި ހަގުރާމަކުރަމުންދާކަމެވެ. އެވީ ކިހިނެއްހެއްޔެވެ؟ އިސްތަށިގަނޑުގައި ދެއަތުން ހިފަހައްޓައިލަމުން ކުޑަކުއްޖެއްފަދައިން އޭނަ ރޮމުން ދިޔައެވެ.
"ހައިތަމް. ދަރިފުޅާ. ހަމަޖެހިބަލަ..." ޒައިނަބުވެސް ރޮއިގެންފާ ދަރިފުޅު ކައިރިއަށް ތިރިވެ ހައިތަމްގެ އިނގިލިތައް އިސްތަށިގަނޑުން ނެއްޓުވިއެވެ."މަންމައަށް ބަލައިލަބަލަ. ކައިލް ދަރިއަކަށްވިއްޔާ ކޮންކަމެއްތަ؟ ތަފާތުވާނީ ކޮންކަމެއްތަ؟އޭނަ އުޅުނީ އަހަރެމެންނަށް އަނިޔާދޭން. އަހަރެމެންގެ ވިޔަފާރި ހަލާކުކުރަން. އޭނަގެ ޕްލޭނަކީ އަހަރެމެންގެ އާއިލާ ބަރުބާދުކުރުން...."ޒައިނަބު ބުމަކޮށް ޖަހައިލަމުން ފިނިގޮތަކަށް ބުނެލިއެވެ." ދެން އެ ޒުވާން ކުއްޖާ އަހަރެމެންގެ އާއިލާ ބަރުބާދުވިޔަދޭން ދޫކޮށްލަންވީ؟ އެއީ ހައިތަމް ބޭނުންވާގޮތަކީ؟"
ހައިތަމްގެ ލޯ ބޮޑުވީވަރުން ބޭރަށް ފުންމައިލަފާނެ ފަދައެވެ. އޭނަގެ ނަޒަރު މަންމަގެ މޫނަށް ހުއްޓުނެވެ. މަންމަ ހަމަ ހަގީގަތުގައިވެސް ދުނިޔެއިން މޮޔަވެއްޖެއެވެ.
"މަންމާ. މަންމަ އޭނަގެ މަންމަ މަރައިލީ. އޭނަގެ ދިރިއުޅުން ބަރުބާދުކޮށްލީ. ހަމައެކަނި ކައިލްގެ އެއްނޫން. އަނާލިއާގެ ހަޔާތްވެސް ބަރުބާދުކޮށްލީ. ދެން އުއްމީދުކުރީ ކޮން ކަމަކަށްތަ؟"
"ހައިތަމް. އަޑުއަހާބަލަ......." ޒައިނަބު ފެށިއެވެ. ހައިތަމް މިފަހަރު އިހުތިރާމެއްނުކޮށް ޒައިނަބުގެ ވާހަކަ ހުއްޓުވިއެވެ.
"ނޫން މަންމާ. އަހަރެން އިތުރަށް ބޭނުމެއްނޫން އެއްވެސް ވާހަކައެއް އަހަން. މަންމަ އަހަރެންގެ ދިރިއުޅުން ހަލާކުކޮށްލައިފި..." ހައިތަމް ލެއިން ތެމިފައިވާ އަމިއްލަ ދެއަތަށް ބަލައިލިއެވެ. އޭނަ އެފަދަ އެތިފަހަރެއް އަންނާނެކަމަށް އުއްމީދުކުރިއެވެ. ނަމަވެސް ކޯތާފަތްމަތީގައި ޒައިނަބު ޖެހި ބާރު އެތިފަހަރުން ތަދުވިއެވެ. އޭނާގެ ހިތަށެވެ.
"ކަލޭގެ ތި ހިތްވަރު....ލަދެއް ނެތް.....އެދުވަހު އެކްސިޑެންޓްވުމުން ސަލާމަތްކޮށްދިނީ އަހަރެން ކަލޭގެ މަންމަ ކަން ހަނދާން ނައްތައިލީތަ؟ އަހަރެންގެ ސަބަބުން މިއަދު ތިހިރަ މަގާމަށް އާދެވުނީ. ހުރިހާ މުއްސަދިކަމެއް ހުރިހާ ބާރެއް އަހަންނާއި ނުލައި އަމިއްލައަށް ހޯދޭނެކަމަށް ހީކުރީ؟ އަހަރެން ނުދެނަހުރިން އަހަރެން ވިހެއީ މިހާ ޝުކުރުވެރިވާން ނުދަންނަ ދަރިންކަމެއް....."
ޒައިނަބު ކުއްލިއަކަށް ބަލައިލީ ޝޮކެއް ލިބުނުފަދައިންނެވެ. އޭނައަށް ހީކުރެވުނީ ރަގަޅަށް ހެއްޔެވެ؟ ހައިތަމް ބާރަށް ހެނީއެވެ. އޭނަގެ ދަރިފުޅު މޮޔަވީހެއްޔެވެ؟
"އަދިވެސް މަންމައަކަށް ނުވިސްނޭ ދޯ..." ހައިތަމްގެ ލޮލުން ކަރުނަ އޮހެމުން ދިޔައިރު އެލޮލުން ފެނުނީ މޮޔަކަމެވެ." އަހަރެންގެ އެކްސިޑެންޓް ފޮރުވި ރޭ އަހަރެންގެ ދިރިއުޅުން މަންމަ ހަލާކުކޮށްލީ. އަދަބު ލިބެން ވީ އަހަންނަށް. ޖަލަށް ދާން ޖެހުނީ އަހަރެން. މަންމަ ނުފޫޒާއި ބާރުގެ ބޭނުންކޮށްގެން ސަލާމަތްކުރީ އެކަމަކު އެއީ އަހަރެންގެ ބަރުބާދީ. އަނާލިއާއަށް ކުރި ބޭއިންސާފީއާއި ނިކަމެތިކަން އަނބުރާ އައިސް ޖެހުނީ..."
" މަންމަ ދުވަހަކުވެސް އަހަރެންގެ ގާތުން އަހަރެން އުޅެނީ އުފަލުން ހެއްޔޭ އެހިންތަ؟ އެހުރިހާ ފައިސާއާއި މަތީ މަގާމާއެކު އެންމެ ފަހަރަކުވެސް އަހަރެން ހީހެދިތަން ފެނުނުތަ؟ އަނާލިއާގެ މަރަށްފަހު ދުވަހަކުވެސް ހަގީގީ އުފާވެރިކަން ލިބުނުތަ؟ އެހުރިހާ ނުބައި އަމަލުތައް އަހަރެން ބަދަލުކޮށްލީ. އަހަންނަކީ ކުރިން މިކަހަލަ މީހެއްނޫން. މަންމަ އަހަރެން ބަދަލުކުރީ. މަންމާ. މަންމަ ބޭނުންވާފަދަ މީހަކަށް އަހަރެން ހެދީ. އެކމަަކު.....މިއީ މަށެއްނޫން....." ހައިތަމް ރޮމުން ދިޔައިރު އޭނަގެ އަތްވެސް ރޫރޫ އަޅައެވެ." އަހަރެން ބޭނުމެއްނޫން މިމީހާއަށް ވާން......."
"އާވާ...." ހައިތަމް ހަޅޭއްލަވައިގަތެވެ. އޭނަގެ ދެއަތުން ކުށެއްނެތި ޒަޚަމްކޮށްލެވުނު ކުޑަ ދަރިފުޅު ދުނިޔެއާއި ވަކިވުމުގެ ކުރިން ދެކެން ބޭނުމެވެ. ޒައިނަބުއަށް ހިންދިރުވައިލުން އުދަގޫވިއެވެ. ހައިތަމް ތެދުވުނެވެ.
"ކޮންތާކަށް ތިދަނީ؟" ޒައިނަބު ބިރުގަތެވެ. ހައިތަމް ޖަވާބެއްނުދީ ނުކުތްވަގުތު ޔަޒީދުވެސް ދޮރުމަތިން ފެނުނެވެ. ޔަޒީދު އެހުރިހާ ވާހަކަތަކެއް އަޑު އެހިއެވެ. ޒައިނަބުއާއި ދިމާލަށް އިރުކޮޅަކު ބަލަން ހުރުމަށްފަހު ޔަޒީދުވެސް ފުރަގަސްދީފައި ދާން ހިނގައިގަތެވެ. ޔަޒީދުއަށްވެސް އޭނަގެ މަންމަ ވިސްނައިދިނީ އަނާލިއާ މަރައިލި މީހަކީ މަހުމޫދުކަމުގައެވެ. އެކަމަކު އެއީ ބުހުތާނު ދޮގެކެވެ. އޭނަގެ ފަހަރީގެ ހަގީގީ ގާތިލަކީ އޭނަގެ އަމިއްލަ މަންމައެވެ. ޔަޒީދުއާއި ހައިތަމްވެސް އަނެއްހެން ކުށެއްނެތީއެއް ނޫނެވެ. އެކަމަކު މަންމަފަދައިން ކުށަކާ ނުލާ މީހަކު މަރާލާފައެއްނުވެއެވެ. ހުރިހާ މަރުތަކެއްގެ ފަހަތުގައިވާ މާސްޓަރމައިންޑަކީ ޒައިނަބުއެވެ. ހުރިހާ ބާރެއް އޮތް މީހަކީ އެއީއެވެ.
***
ދެދަރިން އޭނައާއި ދުރަށް ހިނގައިގަތުމުން އޭނަގެ ދުވަސްވީ ނިކަމެތި ހަށިގަނޑަށް ހުސްކަމެއް އިހުސާސްވިއެވެ. ސިކުނޑި އެކި ދިމާލަށް ދަތުރުކުރަން ފެށުމުން އެ ރޫޖެހިފައިވާ ކޯތާފަތުން ތިރިއަށް ދެމެންފެށީ ހޫނު ކަރުނައެވެ. ކައިލްއަކީ އޭނަގެވެސް ފުރަތަމަ މާމަ ދަރިފުޅެވެ. ހަގީގަތަކީ ކުރިއަކުން އޭނައަށްވެސް އެކަން އެނގިފައެއްނެތެވެ. އެނގުނުނަމަ ކައިލްއާއިމެދު ތަފާތުކޮށް ކަންތައް ކުރެވުނީސްހެއްޔެވެ؟ އެނގުނުނަމަ އެކުއްޖާ އޭނަ ބަލާބޮޑުކުރީސްހެއްޔެވެ؟އެއީ އޭނަގެ މާމަ ދަރިފުޅުކަން އެނގުނުއިރު މާ ލަސްވެއްޖެއެވެ. ގޯސްހެދިއްޖެއެވެ. އަދި ހައިތަމް ގާތަކު އެވާހަކަ ނުބުނެވުނެވެ. އޭނަގެ މަންމަފަދައިން ކައިލްވެސް ދުނިޔެއިން ވަކިވެއްޖެއްޔާ ހުރިހާކަމެއް ރަގަޅުވާނެކަމުގައި ޒައިނަބު އުއްމީދުކުރިއެވެ. މިއީ އުމުރުން ހަތްދިހަ އަހަރުގައި އޭނަ އާއި ދިމާވާނެކަމަށް ހީކުރިފަދަ ކަންތައް ގަނޑެއް ނޫނެވެ.
"ޒާފިރާ. މޮޅުވެއްޖެ..."ޒައިނަބު ދެލޯ މަރައިލިއިރު އަޑުވެސް ތުރުތުރުލިއެވެ. ޒައިނަބު ހަނދާންވީ އޭނަގެ ފިރިމީހާގެ ނަސޭހަތްތަކެވެ. އަބަދުވެސް ބުނަމުން އައީ ކާމިޔާބުވާނީ މުއުމިނުންނަށް ކަމުގައެވެ. ހަގީގީ ކާމިޔާބުގެ އަހުލުވެރިންނަކީ ﷲގެ ރަހުމަތް ލިބޭ މީހުންކަމުގައެވެ. އޭނަ އެކަން ހަނދާން ނެތުނީ ކިހިނެއްހެއްޔެވެ؟ އޭނަ އެންމެ ފަހަށް ނަމާދުކުރީ އަދި ހެއްދެވި ފަރާތަށްސަޖިދައެއް ޖެހީ ކޮންއިރަކުހެއްޔެވެ؟ މި ވަގުތީ ދުނިޔެ ފަހާ ދުވުމުގައި އުޅެނިކޮށް ހަގީގަތްމަތިން އޭނަ ހަނދާންނެތިއްޖެއެވެ. އޭނަގެ މޮޔަކަން އިހުސާސްކުރެވުނީ އުމުރުން ހަތްދިހައަށް އެޅީމައެވެ. ފައިސާއާއި ބޭނުންހާ ކަމެއް ފުރިހަމަކޮށްދިން އޭނަގެ ދަރިން މިއަދު އޭނަގެ ފަރާތުން އެއްވެސް އެއްޗެއް ބޭނުމެއްނުވިއެވެ. އެމީހުންގެ ލޮލުން ބުނީ އޭނައަކީ ގާތިލެއްކަމަށެވެ. އޭނަގެ އަތުގައި މިއަދު އެކައްޗެއްވެސްނެތެވެ. އެއިން އެއްވެސް އެއްޗެއް މުހިއްމެއްވެސް ނުވިއެވެ. ފައިސާއަކުން އޭނަގެ ދަރިން އަނބުރާ ނުގެނެވޭނެއެވެ. އެއިން އެކުދިންގެ ލޯތްބެއް ވެސް ނުގަނެވޭނެއެވެ. އޭނައަށްވެސް އުފާވެރިކަމެއް ނުގަނެވޭނެއެވެ.
ޒައިނަބު ތެދުވާން މަސައްކަތްކުރިއެވެ. ފައި ހަރަކާތެއް ނުކުރިއެވެ. އަމިއްލައަށް ތެދުވުން ފަސޭހަކަމަކަށް ނުވިއެވެ. ބުރަކަށީގައި ރިއްސައިގަތެވެ. އޭނަ ސަޖިދައަށް ތިރިވީ ވިސްނުމަކާނުލައެވެ. އެކަނި ތެދުވެ އުޅެވޭވަރަށްވުރެ އޭނަ މާ ދުވަސްވެއްޖެއެވެ. އޭނަ ދުޅަހެޔޮކަންމަތީގައި ހުރިއިރު އެންމެ ނަމާދެއްވެސް ނުކުރެވުނެވެ. ސަޖިދަކުރަން ބޭނުންވިޔަސް އެންމެ ފުރިހަމަގޮތުގައި އެކަމެއްވެސް ނުކުރެވޭނެއެވެ. މިހާރު ނަމާދުކުރެވޭނީ ގޮނޑިއެއްގައި އިށީދެގެން އިނދެއެވެ. އޭނަ ރަގަޅަށް ހުރިއިރު ނަމާދުނުކުރެވުނުކަމުގެ ޚިޔާލުތައް ހިތުގައި ދާއިމަށް ހުރި ރިހުމެއްގައި ކަމުގައިވިއެވެ. އޭނަ ހަތްދިހަ އަހަރުވާންދެން ކުރީ ކީއްހެއްޔެވެ؟ އޭނަ އާޚިރަތަށްޓަކާ ދެން މަސައްކަތްކުރެވޭނީ ކިތައް އަހަރަށް ނޫނީ ކިތައް ދުވަހަށް ހެއްޔެވެ؟ އޭނަގެ ރަގަޅު އަމަލުތަކުން ނުބައި އަމަލުގެ ފަތް ލުއި ކުރެވިދާނެހެއްޔެވެ؟
ބިރުވެރިކަން ޒައިނަބުގެ ހިތުގައި ހިނގައިގަތެވެ. އޭނަ ތަކުރާރުކޮށް އެންމެ ލަފުޒެއް ކިޔަމުން ދިޔައެވެ.”رب اغفر لي“
ކައިވެނި ބޭއްވުމަށް ހަމަޖެހިފައިވި މަންޒިލްގައި އެކަމަށް އެތައް ދުވަސްވާންދެން ތައްޔާރުކުރެވުނުތަން ސްނޯގެ ތޫފާނެއްގައި އުދުހިގެން ދިޔައީ ވަރުގަދަ ހަމަލާއެއްގައެވެ. ސްނޯގެ ބޮޑެތި އެތިކޮޅުތައް އެ އަގުބޮޑު ހިތްގައިމު ތަނުގެ އެތިކޮޅުތަކަށް ހަމަލަދީ ހަލާކުކޮށް ބިމާ ހަމަކޮށްލަން މާ ގިނައިރުތަކެއް ނުނެގިއެވެ. އެއީ ޒައިނަބުގެ ބުރަ މަސައްކަތުން އާއިލާގެ އިއްޒަތާއި ގަދަރުހިފަހައްޓަން އޭނަ ކުރި މަސައްކަތް އެދުވަހު ބިމާ ހަމަވީ ގޮތުގެ މިސާލެކެވެ.
***
އެހާދިސާތައް ހިނގިތާ ހަފްތާއަކަށްވުރެ ދުވަސްވެއްޖެއެވެ. ކައިލް އާއި އިސްހާގު ހޮސްޕިޓަލުން ދޫކޮށްލެވުމުން ދެމީހުން އެއްކޮށް ހިނގާފައި ހޮސްޕިޓަލުގެ އިމާރާތުން ނުކުތެވެ. އެވަގުތު މިކާލްއަށްވެސް އެހިސާބަށް ފޯރިކަމުން އޭނަ ދުވެފައި އައީ ދެތަށި ހޫނު ކޮފީ ހިފައިގެންނެވެ.
"ދެމީހުން ހޮސްޕިޓަލް ގައުން ނޫން އެހެން ހެދުމެއްގައި ފެނުމުން ވަރަށް ހިތްހަމަޖެހިއްޖެ...." އެންމެ ގާތް އެކުވެރިޔާ ކައިލްއާއި ބޮޑުބޭބެ އިސްހާގު ދުޅަހެޔޮކަންމަތީގައި ހިނގާފައި އަންނަތަން ފެނުމުން މިކާލްއަށް ބަޔާންނުކުރެވޭފަދަ އުފަލެއް ލިބުނެވެ."ގޯޝް. މިއަހަރު ގެ ސްނޯއެހެން އަހަރުތަކަށްވުރެވެސް ފިނި."
މިކާލްގެ ކޮންމެ ލަފުޒަކާއެކު އަނގައިން އާވި ނިކުންނަމުން ދިޔައެވެ. އޭނަ ހީކަރުވައިގެންގޮސް ހަލާކުވަނީއެވެ.
"މިކާލް ކާރުގެނައިކަން ރަގަޅު. އަހަރެން ދާން ޖެހޭ ތަނެއް އެބައޮތް...."ކައިލް ކާރާއި ދިމާލަށް ހިނގައިގަތީ އެއް އަތުން ކޮފީތަށީގައި ހިފަހައްޓާލައިގެންނެވެ. ދެފަރާތުގައި ފުނިޖެހިފައިވާ ސްނޯގެ ސަބަބުން މަންޒަރު ނިކަން ހިތްގައިމެވެ.
"ކޮންތަނަކަށްތަ؟"
"ވިންޓަރފެލް..."ކައިލް ކުރުކޮށް ބުނެލިއެވެ.
"އެކަމަކު ދެންމެ ހޮސްޕިޓަލުން ތި ނުކުތީ...ކައިލް..."
"އެމީހުން އިންތިޒާރުގައި ތިބޭނެ. އެހާ ގިނައިރުވާންދެން މާމަ އިންތިޒާރުކުރަން ނުޖެއްސޭނެއްނު....."ކައިލް އެހެން ބުނުމާއެކު"މާމަ" އޭ ކިޔާ މުޚާތަބުކުރަން ޒައިނަބުގެ ސޫރަ ނުވެސް ގުޅެއޭ ހިތަށް އެރިއެވެ. އެ ސޫރައާއި އެ ނަން އެއްގޮތަކަށްވެސް ނުގުޅެއެވެ.
"ފުލުހުން އައުމުން އެމީހުންގެ ވާހަކަ ބުނެ ރިޕޯޓްނުކުރީ ކީއްވެތަ؟ އެމީހުން ކައިލްއަށްއަނިޔާވީގޮތާއި އާވާގެ ގަޔަށް ބަޑީގެ އުންޑަ އެރިގޮތެއް އެހިއެއްނު އެކަމަކު ހައިތަމްއާއި ޒައިނަބުގެ ނަން ބުނަން ދެކޮޅުހެދި. އެ އާއިލާ އެއްކޮށް ޖަލަށް ލެވުނީހެއްނު. މިހާރު ފުދޭވަރަކަށް ހެކިވެސް އެބަހުރި..." ކައިލް މިކަންތައް ގެންދާގޮތް މިކާލްއަށް އެއްގޮތަކަށްވެސް ގަބޫލެއްނުކުރެވުނެވެ. ހަގީގީ ކުށްވެރިން މިނިވަންކަމާއެކު އުޅެން ދޫކޮށްލީއެވެ.
"މިއޮތް ގަދަ ފިނީގައި ބޭކާރު ވާހަކަދައްކަން ހުރެ ފިނިވެގެން މަރުވާނީތަ؟" އިސްހާގު މިކާލްގެ ކަންފަތުގައި ހިފާ ދަމައިލިއެވެ." ކާރު އަވަހަށް ސްޓާޓްކުރޭ. ކައިލް ވިންޓަރފެލްއަށް ދާން ބޭނުމިއްޔާ ދާނެ. އެކަކަށްވެސް އޭނަ ނުހުއްޓުވޭނެ.."
ނުނިމޭ