30 Jan 2022, 22:25
ށ. ކޮމަންޑޫގައި 25 ޓަނުގެ އައިސްޕްލާންޓެއް ގާއިމްކުރުމަށް ފެނަކަ ކޯޕަރޭޝަނާ ހަވާލުކޮށްފިއެވެ.
އައިސްޕްލާންޓު ގާއިމްކުރުމުގެ މަޝްރޫޢުގެ އެއްބަސްވުމުގައި މިއަދު ފިޝަރީޒް މިނިސްޓްރީގެ ފަރާތުން ސޮއިކުރެއްވީ އެ މިނިސްޓްރީގެ ފައިނޭންޝަލް ކޮންޓްރޯލާ އީނާޝް ނަސީރެވެ. އަދި ފެނަކައިގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަހްމަދު ސައީދު މުހައްމަދެވެ.
ފިޝަރީޒް މިނިސްޓްރީން ބުނީ ކޮމަންޑޫގައި ގާއިމްކުރާ އައިސްޕްލާންޓާއެކު 50 ޓަނުގެ އައިސް ރައްކާކުރާނެ ނިޒާމެއް ވެސް ގާއިމްކުރާނެ ކަމަށެވެ. މި މަޝްރޫޢު ފެނަކައާ ހަވާލުކޮށްފައިވަނީ ހަ މަސްދުވަހުގެ ތެރޭގައި ނިންމާގޮތަށެވެ. މީގެ އިތުރުން އެ މިނިސްޓްރީން ބުނީ އެ މަޝްރޫޢުއަކީ ދައުލަތުގެ ޕީއެސްއައިޕީގެ ތެރެއިން ކުރިއަށް ގެންދާ މަޝްރޫއެއް ކަމަށެވެ.
ކޮމަންޑޫގައި 25 ޓަނުގެ އައިސްޕްލާންޓެއް އެޅުމާ ގުޅޭގޮތުން މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ އާއި@TeamFenakaއާ ދެމެދު އެއްބަސް ވުމެއްގައި މިއަދު ސޮއި ކުރައްވައިފިpic.twitter.com/dsa1vRCISz
— Min. of Fisheries, Marine Resources & Agriculture (@MoFMRAmv)January 30, 2022
ކޮމަންޑޫ ދާއިރާގެ ބައި އިލްކެޝަން ބޯމަތިވެފައިމިވާ ދަނޑިވަޅުގައި ސަރަކާރުން ދަނީ ވަރަށް ގިނަ އާ މަޝްރޫޢުތަކެއް ފަށަމުންނެވެ. އެގޮތުން ކޮމަންޑޫ ގޮނޑުދޮށް ހިމާޔަތް ކުރުމުގެ މަޝްރޫޢުގެ އިތުރުން މަތި ކޮމަންޑޫއާއި ކޮމަންޑޫ ގުޅާލުމުގެ މަޝްރޫޢު ހިމެނެއެވެ.
މި މަޝްރޫޢުތަކަކީ އެ ދާއިރާގެ ބައި އިލެކްޝަނަށް ނުފޫޒު ފޮރުވުމަށް ކުރިއަށްގެންދާ މަޝްރޫޢުތަކެއް ކަމަށް ބުނެ އަމިއްލަ ފަރާތަކުން ވަނީ އެ މައްސަލަ އެންޓި ކޮރަޕްޝަން ކޮމިޝަން (އޭސީސީ)އަށް ވެސް ހުށަހަޅާފައެވެ.
އަންނަ މަހުގެ ފަސް ވަނަ ދުވަހު ބާއްވަން ހަމަޖެހިފައިވާ ކޮމަންޑޫ ދާއިރާގެ ބައި އިލެކްޝަނުގެ ފޯރި އެ ދާއިރާގައި އަންނަނީ ގަދަވަމުންނެވެ. އިންތިޚާބު ކައިރިވެފައިވަނިކޮށް މިފަދަ މަޝްރޫޢުތައް އެ ދާއިރާގައި ކުރިއަށް ގެންދާތީ އިދިކޮޅު ފަރާތްތަކުން ވަނީ ކަންބޮޑުވުން ފާޅުކޮށްފައެވެ.