30 Jan 2022, 19:32
މޯލްޑިވްސް އިންޓަގްރޭޓެޑް ޓޫރިޒަމް ޑިވެލޮޕްމެންޓް ކޯޕަރޭޝަން (އެމްއައިޓީޑީސީ)އިން އިންތިޒާމުކޮށްގެން ބާއްވާ ސަވާދީއްތަ ދަތުރުގެ ޑިޖިޓަލް ޕާޓްނަރެއްގެ ގޮތުގައި ދިރާގު ހަމަޖައްސައިފިއެވެ.
ރާއްޖޭގެ ފަތުރުވެރިކަމަށް 50 އަހަރު ފުރުމުގެ މުނާސަބަތުގައި ބާއްވާ ސަވާދީއްތަ ދަތުރަކީ ދުނިޔޭގެ އެކި ކަންކޮޅުތަކުން ދަތުރުވެރިން ބައިވެރިވެގެން ކުރިއަށްދާ ހަރަކާތެކެވެ.
އަންނަ ފެބްރުއަރީ މަހުގެ ފަސް ވަނަ ދުވަހު ފަށާ މި ދަތުރު ފެށުމަށް ހަމަޖެހިފައިވަނީ ރާއްޖޭގެ އެންމެ އުތުރުން ހއ. އަތޮޅުންނެވެ. އަދި ތިން ހަފްތާގެ މުއްދަތެއްގެ ތެރޭ ބ. އަތޮޅާ ހިސާބަށް ދަތުރުކުރުމަށް ވަނީ ހަމަޖެހިފައެވެ. މި ދަތުރުގައި މީހުން ދިރިއުޅޭ 11 ރަށަކަށް ޖައްސާނެއެވެ.
އެމްއައިޓީޑީސީން ބުނިގޮތުގައި މި ދަތުރުގެ އަމާޒަކީ ރާއްޖޭގެ ސަގާފަތާއި ތަރިކައާއި މުއްސަނދި ތާރީހު ޕްރޮމޯޓުކުރުމެވެ. މީގެ އިތުރުން ޔޮޓް ޓުއަރިޒަމަށް އޮންނަ ތަރުހީބު އިތުރުކުރުމަކީ ވެސް ދަތުރުގެ އަމާޒެއް ކަމަށް އެ ކުންފުނިން ބުންޏެވެ.
އަދި މި ދަތުރުގައި ބޮޑަށް ކިޔައިދިނުމަށް ހަމަޖެހިފައިވަނީ ބޮޑުތަކުރުފާނުގެ ވާހަކަ ކަމަށާއި، ދަތުރުގެ ނަން ވެސް ނިސްބަތްވަނީ އެ ތަކުރުފާނަށް ކަމަށް އެމްއައިޓީޑީސީން ބުންޏެވެ.
ރާއްޖޭގެ ފަތުރުވެރިކަމުގެ ރަން ޔޫބީލް ފާހަގަކުރުމަށް ގިނަ މަސައްކަތްތަކެއް ކުރަމުން އަންނަ އިރު، ދިރާގުން އަންނަނީ މިފަދަ ގިނަ ކަންކަމުގައި އެހީތެރިކަން ފޯރުކޮށްދެމުންނެވެ.