29 Jan 2022, 18:10
ހއ. އުތީމުގައި ހުންނަ ބޮޑުތަކުރުފާނުގެ ހަނދާނީ މަރުކަޒުގައި ދާރުލްއާސާރަކާއި ކެފޭއަކާއި ސުވެނިއާ ފިހާރައެއް އަޅައިދޭނެ ފަރާތެއް ހޯދުމަށް އެ މަރުކަޒުން އިއުލާނުކޮށްފިއެވެ.
މިއީ އެ މަސައްކަތް ކުރާނެ ފަރާތެއް ހޯދުމަށް އިއުލާނުކުރި ތިންވަނަ ފަހަރެވެ. މިދިޔަ އަހަރުން ފެށިގެން އެކަމަށް އިއުލާނު ކުރަމުން އައި ނަމަވެސް އެކި ސަބަބުތަކާ ހުރެ، ވަނީ މަސައްކަތް ބަޔަކާ ހަވާލުކުރެވޭ ގޮތް ނުވެފައެވެ.
ބޮޑުތަކުރުފާނުގެ ހަނދާނީ މަރުކަޒުގެ އެސިސްޓެންޓު ޑިރެކްޓަރު އަލީ ސިފާމް "ސަން"އަށް ވިދާޅުވީ ދާރުލްއާސާރު ހެދުމަށް ހަމަޖެހިފައިވާ އިމާރާތަކީ ކުރިން ސްކޫލެއްގެ ގޮތުގައި ބޭނުންކުރި އިމާރާތެއް ކަމަށެވެ.
"އެތަނުގައި ތިން ކްލާސްރޫމެއް މިހުންނަނީ، އެ ތިން ކްލާސްރޫމް އެއްކޮށްލައިގެން މިއުޒިއަމް ހެދުމަށް ނިންމާފައި ވަނީ،" ސިފާމް ވިދާޅުވިއެވެ.
މީގެ އިތުރުން އެތަނަށް ޒިޔާރަތްކުރާ މީހުންނަށް ހިދުމަތް ދިނުމަށް ކެފޭއަކާއި ސުވެނިއާ ފިހާރައެއް ހެދުމަށް ވެސް ހުޅުވާލާފައިވާނެ ކަމަށާއި، އުންމީދަކީ މިއަހަރު ތެރޭގައި ހުރިހާ މަސައްކަތެއް ވެސް ނިންމާލުން ކަމަށް އޭނާ ވިދާޅުވިއެވެ.
އަދި މި ފިޔަވަހީގައި ކުރަން ހަމަޖެހިފައިފައިވާ މަސައްކަތަކީ އިމާރާތަށް ގެންނަން ޖެހޭ ބަދަލުތައް ގެނައުން ކަމަށާއި، އެތެރޭގެ ފަރުމާ ކުރުމާ އެހެނިހެން މަސައްކަތްތައް ކުރާނީ ދެވަނަ ފިޔަވަހީގައި ކަމަށް ވެސް ސިފާމް ވިދާޅުވިއެވެ.
"މިހާރު މި ކުރެވޭ މަސައްކަތަކީ އެ ތަނުގެ ދެފާރެއް ތަޅާލުމާ، ބައްދަން ޖެހޭ ދޮރުތައް ބެއްދުމާ، އާ ދޮރު ހަރުކުރުމާ، ދެން ކޮރިޑޯގަ މުށި ޖެހުމާ އެކަހަލަ މަސައްކަތްތަކެއް މިހުރީ" އޭނާ ވިދާޅުވިއެވެ.
ބޮޑުތަކުރުފާނުގެ ހަނދާނީ މަރުކަޒަށް ކޮންމެ އަހަރަކު ހަހާހެއްހާ މީހުން ޒިޔާރަތް ކުރެއެވެ. މީގެ ތެރެއިން ހާހެއްހާ މީހުންނަކީ ބިދޭސީން ކަމަށް އެ މަރުކަޒުން ބުނެއެވެ.