04 Jan 2022, 22:10
ނ. އަތޮޅު ރިސޯޓަކަށް ސީޕްލޭނެއް ޖައްސަން އުޅުމުގެ ތެރޭގައި ގިނަ އަދަދެއްގެ ކިރު ދޫނިތަކެއް މަރުވި މައްސަލަ ބަލަމުންދާކަމަށް އެންވާރަމެންޓަލް ޕްރޮޓެކްޝަން އެޖަންސީ (އީޕީއޭ)އިން ބުނެފިއެވެ.
ކިރު ދޫންޏަކީ ހިމާޔަތްކޮށްފައިވާ ދޫނީގެ ބާވަތެއްކަމުން އެއްފަހަރާ ގިނަ އަދަދެއްގެ ދޫނި މަރުވުމަކީ ގިނަބައެއްގެ ކަންބޮޑުވުން މިކަމުގައި އޮތްކަމެކެވެ.
އީޕީއޭގެ ޑިރެކްޓަރ ޖެނެރަލް އިބްރާހިމް ނައީމް "ސަން"އަށް މިރޭ ވިދާޅުވީ ސީޕްލޭން އެގޮތަށް ޖެއްސުމަކީ އެ ބޯޓު ވެސް އަދި ބޯޓުގައި ތިބި ދަތުރުވެރިން ވެސް ނުރައްކަލަށް ހުށަހެޅިދާނެ ކަމެއްކަމަށެވެ.
މިފަދަ ހާދިސާތައް ހިނގުމަށް މެދުވެރިވާ ސަބަބުތައް ދެނެގަންނަން ޖެހޭކަމަށާއި އަދި މިފަދަ ހާދިސާތައް ތަކުރާރުވިޔަ ނުދިނުމަށް ފިޔަވަޅުތައް ހަރުކަށިކުރަން ޖެހޭކަމަށްވެސް އޭނާ ވިދާޅުވިއެވެ.
"ދޫނީގެ ރައްކާތެރިކަމާއި އިންސާނުންގެ ރައްކާތެރިކަމަށްޓަކައި މިކަން ހައްލު ކުރަންޖެހޭ.
މިކަން ދިމާވާ ގޮތް ބެލުމަށްފަހު މިކަންކަން ނުވާނެ ގޮތަކަށް ކަންކަން ބައްޓަންކުރަން ޖެހޭ،" ނައީމް ވިދާޅުވިއެވެ.
އޭނާ ވިދާޅުވީ އެ މައްސަލައިގައި މިހާރު ކުރިއަށްދަނީ މައުލޫމާތު އެއްކުރުމުގެ މަސައްކަތް ކަމަށެވެ. އަދި މިކަމުގައި ބަޔަކު ކުށްވެރިވާނަމަ ގާނޫނާއި ގަވައިދުގެ ތެރެއިން ފިޔަވަޅު އަޅާނެކަމަށް ވެސް ވިދާޅުވިއެވެ.
މީގެ ކުރިންވެސް ގިނައިން ދޫނި އެއްވާ ތަންތަނުގައި ސީޕްލޭން ޖައްސާކަމުގެ ޝަކުވާ ލިބިފައިވާކަމަށް ނައީމް ވިދާޅުވިއެވެ.
ގަވާއިދުތަކުގައި ވާގޮތުން ހިމާޔަތްކޮށްފައިވާ ދޫންޏަކަށް އެއްވެސް ބާވަތެއްގެ ގޯނާއެއް ކޮށްފިނަމަ ކުރި ގޯނާގެ ކުޑަ ބޮޑު މިނަށް ބެލުމަށްފަހު 30،000 ރުފިޔާ އާއި 50،000 ރުފިޔާ އާ ދެމެދުގެ އަދަދަކުން ޖޫރިމަނާކުރެވޭނެއެވެ.