24 Dec 2021, 12:23
ސްޕެއިންގެ ފެރާން ޓޮރެސް ޓްރާންސްފާ މާކެޓުގައި ބާސެލޯނާއަށް ބަދަލުވާނެކަމަށް ވާހަކަދެކެވޭތީ، އޭނާ މިހާރު ކުޅެމުން އަންނަ މެންޗެސްޓާ ސިޓީގައި ހުންނަން ބޭނުންނުވާ ކަމަށާއި ޓޮރެސްއަށްޓަކައި އުފާ ކުރާ ކަމަށް ސިޓީގެ ކޯޗް ޕެޕް ގާޑިއޯލާ ބުނެފިއެވެ.
އުމުރުން 21 އަހަރުގެ ޓޮރެސް ބާސެލޯނާއަށް ބަދަލުވާނެކަމަށް އިތުބާރު ހިފޭ މަސްދަރުތަކުން އަންނަނީ ބުނަމުންނެވެ. އަދި އޭނާއަށް ޖުމުލަ 55 މިލިއަން ޔޫރޯ ދިނުމަށް ބާސާއިން އެއްބަސްވެފައިވާ ކަމަށް ވެސް ބައެއް މީޑިއާ ރިޕޯޓްތައް ބުނެއެވެ.
ޓޮރެސް މީގެ ކުރިން ވެލެންސިއާއަށް ކުޅުމަށްފަހު ސިޓީއަށް ކުޅެމުން އަންނަތާ 18 މަސް ދުވަސް ވެއްޖެއެވެ. އޭނާ ވަނީ ސިޓީ އަށް މި ސީޒަނުގައި ދެ ގޯލު ވެސް ކާމިޔާބުކޮށްދީފައެވެ. އަދި ޖުމުލަ 43 ގޭމު ކުޅުނުއިރު ޖުމުލަ 16 ގޯލު ވަނީ ކާމިޔާބުކޮށްދީފައެވެ.
މިއަހަރުގެ ޔޫރޯގައި ތަފާތު ކުޅުމެއް ދެއްކި ޓޮރެސްގެ ޓްރާންސްފާއާ ގުޅިގެން ގާޑިއޯލާ ބުނެފައިވަނީ ބާސާ އަކީ އޭނާ ކުރިން ހަވާލުވެ ހުރި ކުލަބަކަށްވާއިރު އެ ކްލަބަށް ދިއުމަށް ހުށަހެޅުމުން އެކަމާ ދެކޮޅަށް ނިކުންނަން އުނދަގޫވާ ކަމަށެވެ.
"ޓޮރެސް ސިޓީގައި ހުންނަން ބޭނުންނުވާނަމަ އަދި ސިޓީގައި ހުންނަ އިރު އުފާ ނުވާ ނަމަ އެންމެ ރަނގަޅުގޮތަކީ ޓޮރެސް އުފާވާ ކުލަބަކަށް ދިއުން. ކުލަބު ދޫކޮށް ދާން ބޭނުންވާއިރު އަހަރެން އެއްވެސް ކަމަކަށް ހުރަސް އަޅާކަށް ނެތިން. އަހަރެން ޓޮރެސްއަށްޓަކާ އުފާކުރާނަން، " ގާޑިއޯލާ ބުންޏެވެ.
މަޝްހޫރު ކޯޗް ގާޑިއޯލާ ބުނެފައިވަނީ އެކުޅުންތެރިއެއް ބޭނުންވެއްޖެ ހިނދެއްގައި ކުލަބު ދޫކޮށް ދެވޭނެ ކަމަށާއި އެއްވެސް މީހެއްގެ އުފަލަކަށް ހުރަސް އަޅަން ބޭނުން ނުވާ ކަމަށެވެ.
"އަހަރެން އަބަދުވެސް ހިތަށްއަރާ ރިއަލް މެޑްރިޑް އަދި ބާސެލޯނާ އިން ކުޅުންތެރިއަކު ބޭނުންވެއްޖެ ހާލަތުގައި ނޫނެކޭ ބުނަން އުނދަގޫ ވާނޭ. އެއީ ދުނިޔޭގެ އެންމެ ބާރުގަދަ ދެ ކުލަބު،" ގާޑިއޯލާ ބުންޏެވެ.
ފެރާން ޓޮރެސް އާއި ޕެޕް ގާޑިއޯލާ
ކޯޗިންގް ދާއިރާގައި އެތައް ކާމިޔާބީއެއް ހޯދާފައިވާ ގާޑިއޯލާ ބުނީ ޓޮރެސް އޭނާގެ ގާތުގައި ކުލަބު ދޫކޮށް ދާން ބޭނުންވާ ވާހަކަ ބުނި ކަމަށާއި އޭނާ ޖަވާބުގައި ދާށޭ ބުނި ކަމަށެވެ. އަދި އަހަރެން އެއްވެސް ކުޅުންތެރިއަކަށް މަޖުބޫރުކޮށްގެން ޓީމުގައި ނުބައިތިއްބާނެ ކަމަށް އޭނާ ބުންޏެވެ.
ގާޑިއޯލާ އިތުރަށް ބުނީ މި އަންނަ ޖެނުއަރި މަހުގައި އިތުރު ސްޓްރައިކަރެއް ކުލަބަށް ނުގެންނާނެ ކަމަށެވެ.
ބާސެ އިން އަންނަނީ ޓޮރެސްގެ އިތުރުން މޮޅު ކުޅުންތެރިންނަށް ބޮޑު އަގު ހުށަހަޅަމުންނެވެ. އެ ކުލަބުގެ ހާލަތު މިވަގުތު ރަނގަޅު ނޫން ކަމަށްވާއިރު މޮޅު ކުޅުންތެރިންނަށް ފާރަ ލަމުންނެވެ. ބާސާ އިން ވަނީ 21 އަހަރަށްފަހު ޗެމްޕިއަންސް ލީގުގެ ގްރޫޕް ސްޓޭޖުން ގަދަ 16 އަށް ދަތުރުކުރެވޭ ގޮތް ނުވެ ކަޓާފައެވެ.