14 Dec 2021, 18:24
އިންޑިއާގެ ކޮންފެޑެރޭޝަން އޮފް އިންޑިއަން އިންޑަސްޓްރީ (ސީއައިއައި)ގެ ޕާޓްނާޝިޕް ސަމިޓުގައި ދިވެހިރާއްޖެއާ ބެހޭ ގައުމީ ސެޝަނެއް ބާއްވަން ހަމަޖެހިއްޖެއެވެ.
މި ޕާޓްނާޝިޕް ސަމިޓަކީ އިންޑިއާގެ އެންމެ އިސް ޗެމްބާ އޮފް ކޮމާސް އާއި އިންޑިއާގެ މިނިސްޓްރީ އޮފް ކޮމާސް އެންޑް އިންޑަސްޓްރީގެ ފަރާތުން އަހަރަކު އެއްފަހަރު ބާއްވާ ޕްރިމިއާ ބިޒްނަސް އިވެންޓެކެވެ.
މި މަހުގެ 13 އިން 15 އަށް ކުރިއަށްދާ މި ޕާޓްނާޝީޕް ސަމިޓްގެ ތެރެއިން ރާއްޖެއަށް ހާއްސަ ސެޝަން އޮންނާނީ 15 ވަނަ ދުވަހުގެ ހަވީރު 03:00 އިން 04:00 އަށެވެ.
ރާއްޖެއަށް ހާއްސަ ސެޝަންގައި ކީނޯޓް އެޑްރެސް ދެއްވުމަށް ހަމަޖެހިފައިވަނީ މިނިސްޓާ އޮފް އިކޮނޮމިކް ޑިވެލޮޕްމެންޓް ފައްޔާޒް އިސްމާޢިލްއެވެ. މި ސެޝަންގައި އިންޑިއާއި ދިވެހިރާއްޖެއަށް ކަނޑައަޅައިފައި ހުންނަވާ ހައިކޮމިޝަނާ މުނު މަހާވަރުގެ އިތުރުން ރާއްޖެއިން އިންޑިއާއަށް ކަނޑައަޅައިފައި ހުންނަވާ ސަފީރު ޑރ. ހުސެއިން ނިޔާޒް ވެސް ވާހަކަފުޅުދައްކަވާނެއެވެ.
އިންޑިއާ އެމްބަސީގެ އޮފިޝަލަކު "ސަން"އަށް ވިދާޅުވީ މި އިވެންޓުގެ ޒަރީއާއިން ދުނިޔޭގެ ލީޑަރުންނާއި އެކިއެކި މަލްޓިލެޓަރަލްތަކަށް ނިސްބަތްވާ ވެރިންނާއި، ގްލޯބަލް ސީއީއޯއިންގެ އިތުރުން އިލްމުވެރިން އެއްތަނަކުން ބައްދަލުވެ، އެ ބޭފުޅުންގެ ހިޔާލު ބަދަލުކޮށްލުމަށް އެކި ސެޝަންތަކުން ފުރުސަތު ލިބިގެންދާނެ ކަމަށެވެ.
ރާއްޖެއަށް ހާއްސަކޮށްގެން ބާއްވާ ސެޝަންއަކީ މި ޕާރްޓްނާޝިޕް ސަމިޓުގައި ޙާއްސަ ކުރެވިގެންދާ އަށް ސެޝަންގެ ތެރެއިން އެއް ސެޝަން ކަމަށް އޮފިޝަލް ވިދާޅުވިއެވެ.
އޮފިޝަލް އިތުރަށް ވިދާޅުވީ މިއީ އިންޑިއާއާއި ދިވެހިރާއްޖެއާ ދެމެދުގައި ކުރިއަރަމުން އަންނަ ވިޔަފާރިއާއި އިޤްތިސާދީ ގުޅުން ފާހަގަކޮށްދޭ ކަމެއް ކަމަށާއި މިކަމުން އެނގިގެން ދަނީ ދެ ޤައުމަށް ވެސް ފައިދާ ކުރާނެފަދައިން ވިޔަފާރިތަކަށް ދެ ގައުމުގެ ވެސް ޝައުގުވެރިކަން ހުރިކަން ކަމަށެވެ.
"އެގޮތުން 2021 ވަނަ އަހަރު ތެރޭ ދެ ގައުމުގެ ދެމެދު ހިނގާ ބައިލެޓަރަލް ވިޔަފާރީގެ އަގު 300 މިލިއަން އެމެރިކާ ޑޮލަރަށް ވުރެ އިތުރުވެގެން ދާނެ ކަމަށް އަންދާޒާކުރެވިފައިވާއިރު، މިވެގެންދާނީ ދެ ގައުމުގައި ވެސް މިހާތަނަށް ހިނގާފައިވާ ބައިލެޓަރަލް ވިޔަފާރީގެ އެންމެ ބޮޑު އަދަދަށް،" އޮފިޝަލް ވިދާޅުވިއެވެ.
އޮފިޝަލް ވަނީ 2020 ވަނަ އަހަރުން ފެށިގެން އިންޑިއާއަކީ ރާއްޖޭގެ ދެވަނަ އަށް އެންމެ ބޮޑު ވިޔަފާރި ޕާޓްނާ ކަން ފާހަގަކުރައްވައިފައެވެ. އެގޮތުން މާކެޓްގެ 13 އިންސައްތަ އިންޑިއާ ހިއްސާވާއިރު، ފަތުރުވެރިކަމުގެ މާކެޓުގެ 23 އިންސައްތަ ޙިއްސާއަކީ އިންޑިއާ މެދުވެރިކޮށް ރާއްޖެއަށް އެތެރެވާ ފަތުރުވެރިން ކަން ފާހަގަކުރިއެވެ.
މީގެ އިތުރުން ސެޕްޓެމްބަރ 2020ގައި ފެށިގެންދިޔަ ކާގޯ ވެސެލްގެ ޚިދުމަތަކީ ވެސް ބައިލެޓަރަލް ޓްރޭޑަށް ލިބުނު ބޮޑު ކުރިއެރުމެއް ކަން ފާހަގަކުރައްވާ އޮފިޝަލް އިތުރަށް ވިދާޅުވީ މިއީ އިންޑިއާއިން އެމް.އެސް.އެމް.އީ އެކްސްޕޯޓް ކުރުމަށް ފަހި ވެގެންދިޔަ އެއް ސަބަބު ކަމަށާއި އިންޑިއާ ހައިކޮމިޝަނުން އަންނަނީ އިންޑިއާގައި ދިވެހިރާއްޖޭގެ ކަނޑުމަސް އެކްސްޕޯޓް ކުރެވޭނެ ހާއްސަ މާކެޓްތައް އިންޑިއާގެ މާކެޓު ތެރެއިން ހޯދަމުން ކަމަށެވެ.
ހަމައެހެންމެ އިންޑިއާއާއި ރާއްޖޭގެ ބަދަހިވަމުން އަންނަ ތަރައްޤީގެ ޕާޓްނަޝިޕްގެ ސަބަބުން ވިޔަފާރީގެ ގުޅުންތައް އިތުރަށް ފުޅާ ވެގެން ގޮސްފައިވާ ކަން އޮފިޝަލް ފާހަގަކުރެއްވިއެވެ.
"ޕެންޑެމިކްގެ ސަބަބުން ހުއްޓުމަކަށް އައިސްފައިވާ ނުވަ އުމްރާނީ މަޝްރޫޢުގެ އިތުރުން، ރަށްރަށުގައި ހިންގަމުން އައި 40 އޮޑް ގްރާންޓް މަޝްރޫޢު ވަނީ އިންޑިއާގެ އެހީއާއެކު އަލުން ފެށިގެން ގޮސްފައި،" އޮފިޝަލް ވިދާޅުވިއެވެ.
ރާއްޖެއަށް ހާއްސަކޮށްގެން ބާއްވާ ސެޝަނުގައި ރާއްޖޭގައި ގާއިމުވެފައި ތިބި އިންޑިއާގެ ފަސް ކުންފުންޏެއްގެ އެންމެ އިސްވެރިންގެ ފަރާތުން ކުރެވިފައިވާ ތަޖުރިބާ ހިއްސާ ކުރެވިގެންދާނެއެވެ. އެއީ ތާޖް ހޮޓެލް، ސްޓޭޓް ބޭންކް އޮފް އިންޑިއާ، އެފްކޮންސް އިންފްރާސްރަކްޗާ، އެޓްމޮސްފިއާ ގްރޫޕް އަދި ސްރީ އަވަންތިކާއެވެ.
ހަމައެހެންމެ އިކޮނޮމިކް މިނިސްޓްރީގެ ފަރާތުން "އިކޮނޮމިކް އައުޓްލުކް އެންޑް އިންވެސްޓްމެންޓްސް އޮޕޮޗިއުނިޓީޒް އިން ދަ މޯލްޑިވްސް"އާ ބެހޭގޮތުން ވެސް މި ސެޝަނުގައި މައުލޫމާތު އޮޅުންފިލުވައިދޭނެއެވެ.