14 Dec 2021, 10:03
އިންޑޮނޭޝިއާގެ އައްސޭރިފަށަށް 7.3 މެގްނިޓިއުޑުގެ ބާރުމިނުގައި އައި ބިންހެލުމެއްގެ ސަބަބުން އެގައުމުގެ ބައެއް ސަރަހައްދުތަކަށް ސުނާމީ އަރާފާނެ ކަމުގެ އިންޒާރު ދީފިއެވެ.
ޔޫއެސް ޖިއޮލޮޖިކަލް ސާވޭ (ޔޫއެސްޖީއެސް)އިން ބުނީ މިއަދު ހެނދުނު އިންޑޮނޭޝިއާގެ ގަނޑިން 10:20 އެ ބިންހެލުން އައީ އެގައުމުގެ ފްލޯރެސް އައިލެންޑް ކައިރިން ކަނޑުގެ ސަރަހައްދަށް ކަމަށެވެ.
އެގޮތުން ބިންހެލުން އައީ ފްލޯރެސް ކަނޑުގެ 18.5 ކިލޯމީޓަރު އަޑިއަށް ކަމަށް އެ އިދާރާއިން ބުންޏެވެ. އަދި ބިންހެލުމަށް ފަހު 5.6 މެގްނިޓިއުޑްގެ އާފްޓާޝޮކެއް ވެސް އައި ކަމަށް އިންޑޮނޭޝިއާގެ މޫސުމާ ބެހޭ އިދާރާއިން ބުންޏެވެ.
އެ ބިންހެލުމާ ގުޅިގެން، ބިންހެލުން އައި ސަރަހައްދާ 1،000 ކިލޯމީޓަރުގެ ސަރަހައްދަކަށް ސުނާމީ އަރާފާނެ ކަމުގެ އިންޒާރު އެމެރިކާގެ ޕެސިފިކް ސުނާމީ ވޯނިން ސެންޓަރުން ވަނީ ދީފައެވެ.
އެ ބިންހެލުމުގެ ސަބަބުން ބަޔަކަށް އަނިޔާވި ކަމެއް ނުވަތަ ތަނަކަށް ގެއްލުން ލިބުނު ކަމުގެ ރިޕޯޓެއް އަދި ލިބިފައި ނުވާ ކަމަށް ފްލޯރެސް އައިލެންޑްގެ ޑިޒާސްޓާ މިޓިގޭޝަން އޭޖެންސީން ބުންޏެވެ.
އެ ބިންހެލުމުގެ އަސަރު ރާއްޖެއަށް ކުރާނެ ކަމަށް ލަފާ ނުކުރެވޭ ކަމަށް މޫސުމާ ބެހޭ ގައުމީ އިދާރާއިން ވަނީ ބުނެފައެވެ.