24 Nov 2021, 14:14
އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ބަޖެޓު ދިރާސާ ކުރާ ކޮމިޓީން ގެނައި ބަދަލުތަކާއެކު ދައުލަތުގެ ބަޖެޓު މަޖިލީހުން މިއަދު ފާސްކޮށްފިއެވެ.
ފިނޭންސު މިނިސްޓްރީން ހުށަހެޅީ ދަރަނި ނުވަތަ ލޯނު އަނބުރާ ދެއްކުމަށް ކުރާ ހޭދަ އާއި ބޭރުގެ މާލީ އިދާރާތަކަށް ދައްކާ ރައުސްމާލާ އެކު ބަޖެޓުގެ ޖުމްލަ އަކީ 36.9 ބިލިއަން ރުފިޔާ ކަމަށެވެ.
ކޮމިޓީން ވަނީ ދައުލަތުން ހުށަހެޅި ބަޖެޓަށް އިތުރު 73.8 މިލިއަން ރުފިޔާ އިތުރުކުރުމަށް ފާސްކޮށްފައެވެ. އެއާއެކު ދައުލަތުން ހުށަހެޅި ބަޖެޓުގައި 34 ބިލިއަން ރުފިޔާގައި އިން ބަޖެޓުގެ ޖުމުލަ ހަރަދު، 34.10 ބިލިއަން ރުފިޔާއަށް ބޮޑުވިއިރު، ޖުމުލަ ބަޖެޓު ވަނީ 36.99 ބިލިއަން ރުފިޔާ އަށް ބޮޑުވެފައެވެ.
ކޮމިޓީން ބަޖެޓަށް އިތުރުކުރި 73.8 މިލިއަން ރުފިޔާއަކީ 82 ރަށެއްގެ ޕީއެސްއައިޕީގެ މަޝްރޫއުތަކަށް ޖުމުލަ 57.4 މިލިއަން ރުފިޔާގެ އިތުރުން މިނިސްޓްރީ އޮފް ފިނޭންސުގެ ހާއްސަ ބަޖެޓުން ސިޔާސީ ޕާޓީތަކަށް އިތުރުކުރަން 73،782 ރުފިޔާއާއި ރައްޔިތުންގެ މަޖިލިސް އިދާރާގެ ނިއު ޕޮލިސީ އިނީޝިއޭޓިވްސްއަށް 7 މިލިއަން ރުފިޔާގެ އިތުރުން ހަތް މިނިވަން މުވައްސަސާއެއްގެ ބަޖެޓެވެ.
https://sun.mv/159174
ކޮމިޓީން ހުށަހެޅި ބަޖެޓުގެ ރިޕޯޓު ފާސްކުރުމަށް މަޖިލީހުގައި މިއަދު ނެގި ވޯޓުގައި 64 މެންބަރުން ވަނީ ބަޖެޓު ފާސްކުރުމަށް ވޯޓު ދީފައެވެ. ބަޖެޓު ފާސްކުރުމާ ދެކޮޅަށް ވޯޓު ދީފައިވަނީ އަށް މެންބަރުންނެވެ.
ކޮމިޓީން ފާސްކޮށްފައި ހުށަހެޅި ބަޖެޓު ރިޕޯޓަށް 43 މެމްބަރުން ވަނީ ބަހުސްކޮށްފައެވެ. 20 ގަޑިއިރަށް ވުރެ ގިނައިރު ކުރިއަށް ގެންދިޔަ މި ބަހުސްގައި ސަރުކާރު މެންބަރުން ވަނީ ބަޖެޓަށް ތާއީދުކުރައްވައި ވާހަކަދައްކަވައިފައެވެ.
އެހެންނަމަވެސް އިދިކޮޅު މެންބަރުން ވަނީ ބަޖެޓުގައި ހުރި ދަރަނީގެ މައްސަލަތަކާއި ރިކަރަންޓު ހަރަދު އިތުރުވުމުގެ ކަންބޮޑުވުން ފާޅުކުރައްވައިފައެވެ.
ބަޖެޓު 2022
އާމްދަނީ އާއި ހިލޭ އެހީގެ ގޮތުގައި އަންނަ އަހަރު ލިބޭނެ ކަމަށް ބަޖެޓުގައި ވަނީ 24.3 ބިލިއަން ރުފިޔާއެވެ. އެހެން ކަމުން، މިއީ 9.7 ބިލިއަން ރުފިޔާގެ ޑެފިސިޓް ނުވަތަ ދަރަނި ބަޖެޓެކެވެ. އުފެއްދުންތެރިކަމުގެ ނިސްބަތުން މިއީ 11.1 ޕަސެންޓުގެ ޑެފިސިޓެކެވެ.
އަންނަ އަހަރުގެ ބަޖެޓު ފައިނޭންސް ކުރުމަށް ޖުމުލަ 13.4 ބިލިއަން ރުފިޔާ ހޯދަން ޖެހެއެވެ. އެއީ ބަޖެޓު ޑެފިސިޓްގެ ގޮތުގައި ހިމެނޭ 9.7 ބިލިއަން ރުފިޔާއާއި ލޯނު އަނބުރާ ދެއްކުމަށް ބޭނުންވާ 2.8 ބިލިއަން ރުފިޔާއާއި އެހެނިހެން ގޮތްގޮތުން ބޭނުންވާ 805 މިލިއަން ރުފިޔާއެވެ. އެ ފައިސާ ހޯދާ ގޮތަކީ؛
200 މިލިއަން ޑޮލަރު: ބޭރަށް ބޮންޑާއި ސުކޫކު ވިއްކައިގެން
- 187 މިލިއަން ޑޮލަރު: މަޝްރޫއުތަކުގެ ލޯން ޑިސްބާސްމަންޓް
- 50 މިލިއަން ޑޮލަރު: ގްރީން ނުވަތަ ބުލޫ ބޮންޑު ވިއްކައިގެން
- 50 މިލިއަން ޑޮލަރު: ބަޖެޓު ސަޕޯޓަށް
- 771 މިލިއަން ރުފިޔާ: ދައުލަތުގެ ކުންފުނިތައް ޕްރައިވެޓައިޒް ކޮށްގެން
ބަޖެޓު ހަރަދު
ދަރަނި ނުވަތަ ލޯނު އަނބުރާ ދެއްކުމަށް ކުރާ ހަރަދާއި ބޭރުގެ މާލީ އިދާރާތަކަށް ރައުސްމާލުގެ ގޮތުގައި ދައްކާ ފައިސާ ނުހިމަނައި އަންނަ އަހަރު ދައުލަތުގެ ޖުމްލަ ހަރަދަކީ 34 ބިލިއަން ރުފިޔާއެވެ. ޖުމުލަ ހަރަދު ބެހިގެންވާ ބައިތަކަކީ؛
ރިކަރަންޓް ހަރަދު: 24.8 ބިލިއަން ރުފިޔާ (67 ޕަސެންޓު)
- ޕީއެސްއައިޕީ: 6.2 ބިލިއަން ރުފިޔާ (17 ޕަސެންޓު)
- އެހެނިހެން ކެޕިޓަލް ހަރަދު: 5.8 ބިލިއަން ރުފިޔާ (16 ޕަސެންޓު)
ބަޖެޓުގެ މައިގަނޑު ހަރަދުތައް ބެހިފައިވާ ގޮތަށް ބަލާއިރު 26 ޕަސެންޓު ހަރަދަކީ މުވައްޒަފުންނަށް ހިނގާ ހަރަދެވެ. އެއީ 9.7 ބިލިއަން ރުފިޔާއެވެ. ޖުމުލަ ހަރަދުގެ 12 ޕަސެންޓު ހަރަދު ހިނގަނީ އޮފީސް ހިންގުމަށެވެ. އަދި 17 ޕަސެންޓު ހަރަދަކީ ޕީއެސްއައިޕީއެވެ. މީގެ އިތުރުން 13 ޕަސެންޓު ހަރަދުވާނީ ސަރުކާރުން ދޭ އެހީ، އިޝްތިރާކާއި ސަބްސިޑީއަށެވެ.
ބަޖެޓުގެ އާމްދަނީ
އަންނަ އަހަރު ދައުލަތަށް ޖުމުލަ އާމްދަނީ އާއި ހިލޭ އެހީގެ ގޮތުގައި ލިބޭނެ ކަމަށް ލަފާކޮށްފައި ވަނީ 24.2 ބިލިއަން ރުފިޔާ އެވެ. އެއީ ޓެކްސްގެ ގޮތުގައި 15.3 ބިލިއަން ރުފިޔާ އާއި ޓެކްސް ނޫން އާމްދަނީގެ ގޮތުގައި ހަ ބިލިއަން ރުފިޔާގެ އިތުރުން ހިލޭ އެހީ އަދި އެހެނިހެން އާމްދަނީގެ ގޮތުގައި 2.91 ބިލިއަން ރުފިޔާއެވެ.