24 Nov 2021, 14:10
ގެދޮރު އިމާރާތްކުރުމަށް ދޭ ލޯނުގެ އިންޓްރެސްޓު ކުޑަކުރުމަށް ރައްޔިތުންގެ މަޖިލީހުގެ ކުޑަހުވަދޫ ދާއިރާގެ މެންބަރު އަހްމަދު އާމިރު މިއަދު ގޮވައިލައްވައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އަންނަ އަހަރަށް ދައުލަތުން ލަފާކުރާ ބަޖެޓަށް ބަހުސް ކުރައްވަމުން އާމިރު ވިދާޅުވީ ބޯހިޔާވަހިކަމުގައި ހުރި ކަންބޮޑުވުންތަކުގެ ވާހަކައަކީ އަބަދުވެސް ރައްޔިތުން ދައްކަމުން އަންނަ ވާހަކައެއް ކަމަށެވެ.
މިހާތަނަށް އެއްވެސް ސަރުކާރަކަށް އެކަން ރަނގަޅަށް ކޮށްދެވިފައިނުވާ ކަން ފާހަގަކުރައްވާ އާމިރު ވިދާޅުވީ ރާއްޖޭގެ ރަށްރަށުގައި ހުރި ގޯތިތަކުގައި ރައްޔިތުންނަށް ގެދޮރު އިމާރާތް ކުރެވޭނެ ގޮތެއް ފަހިވެފައި ނެތް ކަމަށެވެ.
"އަދި އަލުން ގޯތި ދިނަސް އިމާރާތް ކުރެވޭނެ ގޮތެއް ނެތް، އެ ތާނގައި ހައުސިން ޔުނިޓު އަޅައިފައި ދިގު މުއްދަތަށް ފައިސާ ދައްކާ ގޮތަށް އެ މީހުންނަށް އެކަން ކޮށްދޭށޭ އެކަން ކުރާނޭ،" އާމިރު ވިދާޅުވިއެވެ.
އާމިރު ވިދާޅުވީ ބޯހިޔާވަހިކަމުގެ ފުރުސަތުތައް ފަހިކޮށްދޭނަމަަ، ގެދޮރު އިމާރާތްކުރުމަށް ދޭ ލޯނަށް ފަހި ގޮތްތަކެއް ހޯދައިދޭން ޖެހޭ ކަމަށެވެ.
"ދިވެހިރާއްޖޭގަ ބޯހިޔާވަހިކަމުގެ ފުރުސަތު ދިވެހިރާއްޖޭގެ ބަޔަކަށް ފުޅާ ދާއިރާއެއްގައި ތަނަވަސް ކޮށްދެނީކަމަށްވާނަމަ ގެދޮރު އިމާރާތްކުރުމަށް ދޭ ލޯނު، ވަރަށް އާދޭހާއެކު ދަންނަވަމޭ އިންޓްރެސްޓު ކުޑަކޮށްދެވޭނެ ގޮތެއް ހަދައިދޭށޭ،" އާމިރު ވިދާޅުވިއެވެ.
ގެދޮރު އިމާރާތް ކުރުމަށް ދޭ ލޯނުގެ އިތުރުން އޮޑިދޯނިފަހަރު ބަނުމަށް ދޫކުރާ ލޯނުގެ އިންޓްރެސްޓު ވެސް ކުޑަކުރަން ޖެހޭ ކަމަށް އާމިރު ވިދާޅުވިއެވެ. އަދި މިކަން ކުރެވިދާނެ ވަރަށް ތަފާތު ނިޒާމުތަކެއް ހުރިނަމަވެސް އެކަން ތަންފީޒުނުކުރެވޭ ކަމަށް އޭނާ ވިދާޅުވިއެވެ.