މިރޭ މާލޭތެރޭގެ އެކި ސަރަހައްދުތަކަށް ނުކުމެ ހަމަނުޖެހުން ހިންގަން މަސައްކަތް ކުރާ މީހުންނާއި ފުލުހުންނާއި ފުލުހުންގެ ތަކެއްޗަށާއި ވެހިކަލްތަކަށް ގެއްލުންދޭ މީހުންނާ މެދު ފިޔަވަޅު އަޅަމުންދާނެ. އިތުރަށް ހަމަނުޖެހުން ހިންގާނަމަ އެބަޔަކާމެދު ވެސް ފިޔަވަޅު އަޅާނެ ކަމަށް ފުލުހުން ވަނީ ބުނެފައި.

ޑިފެންސް މިނިސްޓަރު ދިރިއުޅުއްވާގެ، މ، ސީނު ކަރަންކާ ގޭގެ ކައިރީގައި ސިފައިންނާއި ފުލުހުން އަދިވެސް މަޑުކޮށްލައިގެން އެބަތިބި. އެއްވި މީހުން ވަނީ އެކި ސަރަހައްދަށް ފަހާލާފައި. އެއްވި މީހުން އެނބުރި ލޮނު ޒިޔާރާތްކޮޅާ ދިމާއަށް ހިނގައްޖެ ކަމަށް ވެސް ބުނޭ.

މުޒާހަރާ ވަނީ ރޫޅާލާފައި. ފުލުހުންގެ އަމުރަށް ނުކިޔަމަންތެރިވި މީހަކު ވަނީ ހައްޔަރުކޮށްފައި. އަދިވެސް އިތުރު މީހުން ދުރަށް ފޮނުވާލަމުންދާއިރު ދުރު ހިސާބުތަކުގައި މީހުންތައް މަޑުކޮށްގެން އެބަތިބި

މިރޭ މާތެރޭގައި ހަރަކާތްތެރިވަމުންދާ މީހުން ފުލުހުންގެ ވެހިކަލަކަށް ވަނީ ހަމަލާދީ ބިއްލޫރިގަނޑު ތަޅާލައި ގެއްލުންތައް ދީފައި. އިތުރަށް މާލެތެޜޭގައި ހަމަނުޖެހުން ހިންގަން މަސައްކަތް ކުރާ ފަރާތްތަކާމެދު ފިޔަވަޅު އަޅާނެ.

މިހާރު ސިފައިންނާއި ފުލުހުން ދަނީ ހަރަކާތްތެރިވަމުން.

އެކަކު ވަނީ ހައްޔަރުކޮށްފައި. އަދިވެސް ގާއުކަމުން އެބަދޭ. ބައެއް ދިމަ ދިމާއިން ފުލުހުންނާ ދިމާއަށް ފެން ޕެކެޓް ވެސް އުކަމުން އެބަދޭ.

ބީއެމްއެލް ކައިރިން މިހާރު ވަނީ ގޮސްފައި. ކޮންމެސް ވަރަކަށް ޓްރޭޑާށް ހޮޓެލް ކައިރީ މީހުން އަޑު އުފުލަމުންދޭ. ގިނަ ބަޔަކު ތިބީ މިނިސްޓަރު ނާޒިމް ދިރިއުޅުއްވާ ގޭގެ ކައިރީގައި. އެ ސަރަހައްދުގައި ގިނަ އަދަދެއްގެ ފުލުހުން ވެސް އެބަތިބި ވަރަށް ގިނަ ދިމާއިން މިހާރު ގާއުކަމުން އެބަދޭ.

އެކި ދިމަ ދިމާއިން ފުލުހުންނާއި ދިމާއި ގަލާއި ފުޅި އުކަމުން އެބަދޭ.

ޑިފެންސް މިނިސްޓަރު ނާޒިމް ދިރިއުޅުއްވާ ގޭގެ ކައިރީގައި ރަޔަޓް ފުލުހުން، އެއްވެފައިވާ މީހުން ފަހަތަށް ޖައްސަން މަސައްކަތް ކުރަމުން އެބަދޭ. މުޒާހަރާ ކުރާ މީހުން ގޮވަމުން ދަނީ އަވަސް އިންތިހާބެއް ބޭއްވުމަށް.

މިނިސްޓާ ނާޒިމްގެ ގޭ ކައިރީގައި ފުލުހަކުވެސް އަދި ސިފައިންގެ މީހަކުވެސް ނުފެނޭ. މުޒާހަރާހައި ހަމަނުޖެހުމެއް ނުހިނގާ.

ޑިފެންސް މިނިސްޓާ ނާޒިމްގެ ގެކޮޅު ކައިރިއަށް އެއްވެ މުޒާހަރާ ފަށައިފި. އެމީހުން އަންނަނީ ނާޒިމާ ދެކޮޅަށް ރުޅިވެރިކަމުގެ ޝުއޫރު ފާޅުކުރަމުން.

އެމްޑީޕީގެ ސަޕޯޓަރުން ސަރުކާރަށް ފާޑު ކިޔަމުން މަގުތަކުގައިވެސް ދަނީ ހިނގަމުން. އެގޮތުން އެމްޑީޕީގެ ސަޕޯޓަރުން ގަޑިބުރު ކައިރިން މަޖިދީ މަގަށް އަޅައިފި.

އެމްޑީޕީގެ ސަޕޯޓަރުން މިރޭ މުޒާހަރާއަށް ނުކުމެފައި ވަނީ ރައީސް ޑރ. މުހައްމަދު ވަހީދު ހަސަން މަނިކުގެ ސަރުކާރު ހުއްޓުވުމަކަށް ގެނައުމަށްޓަކައި މަސައްކަތްތަކެއް ކުރަން އެމްޑީޕީގައި އެދިވަޑައިގެންނަވާނެ ކަމަށް ކުރީގެ ރައީސް މުހައްމަދު ނަޝީދު ވިދާޅުވެފައި ވަނިކޮށް. ނަޝީދު ވިދާޅުވެފައި ވަނީ ރާއްޖޭގެ ރައްޔިތުންނަށް މި ސަރުކާރުން ކުރަމުންގެންދާ އަނިޔާތައް އެމްނެސްޓީ އިންޓާނޭޝަނަލް ފަދަ ޖަމާއަތްތަކުން ވެސް ގާތުން ބަލަމުން ގެންދާ ކަމަށާއި މިސަރުކާރު ހުއްޓުވުމަކަށް ގެނައުމަށްޓަކައި ދުވަހެއް ކަނޑައެޅުމަށް އެމްޑީޕީގައި އެމަނިކުފާނު އެދިވަޑައިގެންނަވާނެ ކަމަށް.

މުލިއާގެ ފަޅިން ވެލާނާގެ ސަރަހައްދުގައި ތިބި މީހުން ފަރީދީ މަގުން ހިލާލީގެއާ ދިމާލަށް ހިނގައިގެންފި.

އިންތިހާބެއް އަވަސްކުރުމަށް އެމީހުން ހަރުއަޑުން ގޮވަމުން އަންނަ އިރު ރަޔަޓް ގިޔަރުގައި ތިބި ސިފައިން ވަނީ ދެ މަގުވެސް ބަންދުކޮށްލާފައި. އަދި އިންޒާރެއް ނުދޭ. މުޒާހަރާ ފެންނަނީ ސުލްހަވެރިކޮށް.

އެމްޑީޕީގެ ގިނަ އަދަދެއްގެ މެންބަރުން މިހާރު ތިބީ ވެލާނާގެއާ ހިސާބުގައި އަމީރު އަހުމަދު މަގުގައި. އެމްޑީޕީގެ ސަޕޯޓަރުން މުލިއާގެއާ ވީ ފަޅީގައިވެސް އެބަތިބި.