22 Nov 2021, 13:08
ބެންކް އޮފް މޯލްޑިވްސް(ބީއެމްއެލް)ގެ އިންޓަނެޓް ބޭންކިން ގެ ހިދުމަތަށް ދިމާވި މައްސަލަ ހައްލުކޮށް ރޭން ފެށިގެން ހިދުމަތް ދޭން ފަށައިފިއެވެ.
ބީއެމްއެލްގެ ބޭންކިން ސިސްޓަމްގެ މުހިންމު އަޕްގްރޭޑް މަސައްކަތެއްގައި ދިމާވި ޓެކްނިކަލް މައްސަލައެއްގެ ސަބަބުން، ބީއެމްއެލްގެ އިންޓަނެޓް ބެންކިންގެ ހިދުމަތް އިއްޔެ ވަނީ ވަގުތީ ގޮތުން ހިދުމަތް މެދުކަނޑާލައިފައެވެ. އެ ހިދުމަތް މެދުކަނޑާލުމަށްފަހު އެމައްސަލަ ހައްލުކޮށް ހިދުމަތް ދޭންފެށީ ރޭ 8:30 ހާއިރުއެވެ.
މިކަމާ ގުޅިގެން ބީއެމްއެލްގެ މެނޭޖަރ ޕަބްލިކް ރިލޭޝަންސް މުހައްމަދު ސައީދު މިއަދު "ސަން"އަށް ވިދާޅުވީ ރޭން ފެށިގެން އިންޓަނެޓް ބޭންކިން އަށް ދިމާވި މައްސަލަ ހައްލުކޮށްފައިވާ ކަމަށެވެ. އަދި އެކަމާ ގުޅިގެން އެންމެ ފަހުން ކުރި އަޕްޑޭޓުގައި މައްސަަލައެއް އުޅޭ ކަމަށް ބީއެމްއެލް އަށް ފާހަގަ ނުކުރެވޭ ކަމަށް އޭނާ ވިދާޅުވިއެވެ.
ހިދުމަތް މެދުކެނޑިފައި ހުރިއިރު އިންޓަނެޓް ބޭންކިން އެޕްލިކޭޝަނުން ބަލާއިރު އެކައުންޓުގައި ފައިސާ ހުރި ކަމަކަށް ނުދައްކައެވެ.
އިންޓަނެޓް ބޭންކިންގެ އިތުރުން ހިދުމަތް މެދުކެނޑިފައިވާ ވަގުތުތަކުގައި ވިޔަފާރި ކުރުމުގައި ވެސް ބީއެމްއެލް ކާޑު މެދުވެރިކޮށް ފައިސާ ނުދެއްކޭގޮތް އިއްޔެ ވަނީ ވެފައެވެ. އެކަން އިއްޔެ ހަވީރު ވަނީ ހައްލުކޮށްފައެވެ.
އެކަމުގެ ސަބަބުން ކަސްޓަމަރުންނަށް ދިމާވި ދަތިތަކަށް ޓަކައި ބީއެމްއެލްއިން ވަނީ މައާފަށް އެދިފައެވެ.