10 Nov 2021, 23:18
ދިވެހިރާއްޖޭގެ ގައުމީ ޔުނިވާސިޓީ (އެމްއެންޔޫ)އިން "ފަހި އެމްއެންޔޫ" ނުވަތަ "ގެޓިން ޓު ނޯ އެމްއެންޔޫ"ގެ ނަމުގައި ސިލްސިލާ ޕްރޮގްރާމެއް ފަށައިފިއެވެ.
އެ ޕްރޮގްރާމުގެ މަގްސަދަކީ އާންމުންނަށް އަދި ސްކޫލުތަކުގެ ދަރިވަރުންނަށް އެމްއެންޔޫގެ ތަސައްވާރާއި އެ ޔުނިވާސިޓިން ދޭ ހިދުމަތްތަކާއި ފުރުސަތުތަކާއި، އެތަނުގައި ހުރި ވަސީލަތްތަކާއި ދަރިވަރުންނަށް އުފާވެރި މާހައުލެއް ގާއިމުކޮށްދޭން އެމްއެންޔޫއިން ކުރަމުންދާ މަސައްކަތްތައް ތައާރަފު ކުރުމެވެ.
އެ ޕްރޮގްރާމުގެ ތެރެއިން ކެރިއާ ގައިޑެންސް ވެސް އެމްއެންޔޫއިން ފޯރުކޮށްދޭނެއެވެ.
އެ ޕްރޮގްރާމުގައި އެންމެ ފުރަތަމަ ބައިވެރިވީ ސީއެޗްއެސްސީގެ ދަރިވަރުންނެވެ. އެމްއެންޔޫގެ ހުރިހާ ފެކަލްޓީތަކާއި ސެންޓަރުތަކުން ވަނީ ސީއެޗްއެސްސީގެ ދަރިވަރުންނަށް އެމްއެންޔޫގެ މައުލޫމާތު ފޯރުކޮށްދީ، ދަރިވަރުންގެ ސުވާލުތަކަށް ޖަވާބު ދީ، ކުރިމަގުގައި އިތުރަށް ކިޔެވުމަށް އިހުތިޔާރު ކުރާނެ ރޮނގުތައް ކިޔައިދީފައެވެ.
އެމްއެންޔޫއިން ރާވާފައިވަނީ ކޮންމެ ހަފުތާއެއްގެ އަންގާރަ ދުވަހު މި ޕްރޮގްރާމު ސިލްސިލާކޮށް ކުރިއަށް ގެންދިއުމަށެވެ.
ފަހި އެމްއެންޔޫ ޕްރޮގްރާމުގެ ތެރެއިން--
އެގޮތުން ގްރޭޓާ މާލެ އޭރިއާގައި އޭ ލެވެލްއަށް ކިޔަވާ ހުރިހާ ސްކޫލްތަކުގެ (ޕްރައިވެޓް ސްކޫލްތައް ވެސް ހިމެނޭ ގޮތަށް) ދަރިވަރުން ޔުނިވާސިޓީއަށް ޒިޔާރަތް ކުރާނެ ކަމަށް އެމްއެންޔޫއިން މައުލޫމާތު ދެއެވެ.
އެ ޕްރޮގްރާމުގެ ދަށުން މިއަދު މާލެ ސަރަހައްދުގެ 11 ސްކޫލެއްގެ ގްރޭޑް 8، 9 އަދި 10ގެ ދަރިވަރުންނަށް ހާއްސަ ކެރިއާ ގައިޑެންސް ޕްރޮގްރާމެއް ވަނީ ކުރިއަށް ގެންގޮސްފައެވެ.
ޔުނިވާސިޓީގެ 11 ޓީމަކުން ކުރިއަށް ގެންދިޔަ އެ ހަރަކާތުގައި ކެރިއާ ގައިޑެންސް ފޯރުކޮށްދިން ސްކޫލުތަކުގެ ތެރޭގައި ހިމެނެނީ؛
ތާޖުއްދީން ސްކޫލް
- ހިރިޔާ ސްކޫލް
- އިމާދުއްދީން ސްކޫލް
- މުހްޔިއްދީން ސްކޫލް
- ދަރުމަވަންތަ ސްކޫލް
- ކަލާފާނު ސްކޫލް
- އަމީނިއްޔާ ސްކޫލް
- ހުރަވީ ސްކޫލް
- ޖަމާލުއްދީން ސްކޫލް
- އިސްކަންދަރު ސްކޫލް
- ޣާޒީ ސްކޫލް
އެމްއެންޔޫގެ ޓީމުތަކުން ސްކޫލުތަކުގެ ދަރިވަރުންނަށް ކެރިއާ ގައިޑެންސް ފޯރުކޮށްދެނީ--
މިއަހަރުގެ ތެރޭގައި އެމްއެންޔޫގެ ޓީމުތައް އަތޮޅުތެރޭގެ އެކި ސަރަހައްދު ތަކަށް ޒިޔާރަތް ކޮށްގެން، ފަހި އެމްއެންޔޫ ޕްރޮގްރާމު ކުރިއަށް ގެންދިއުމަށް ވެސް އެ ޔުނިވާސިޓީން ވަނީ ރާވާފައެވެ.
ފަހި އެމްއެންޔޫ ޕްރޮގްރާމަކީ އެ ޔުނިވާސިޓީގެ ތަސައްވަރާ އެއްގޮތަށް ޔުނިވާސިޓީއިން ނުކުންނަ ދަރިވަރުންނަކީ ފުޅާ ދާއިރާއެއްގައި ވިސްނާ، ސިކުނޑި ހުޅުވިފައި ތިބި ބިނާ ކުރުވަނިވި ހިދުމަތްތެރި، އަނެކުންނާއި ދޭތެރޭ ވިސްނާ، އަމިއްލައަށް އިސްނަގައިގެން ގައުމު ބިނާ ކުރާނެ ހިދުމަތްތެރި ދަރިންތަކެއް އުފެއްދުމުގެ އަމާޒުގައި ހިންގާ ޕްރޮގްރާމެކެވެ.