10 Nov 2021, 15:02
ރ. މީދޫ ފުޓްބޯޅަ ދަނޑުގެ މަސައްކަތް ހުއްޓިފައިވާ މައްސަލައިގައި ސުވާލު ކުރުމަށް, ޔޫތު މިނިސްޓަރު އަހުމަދު މަހްލޫފް، ރައްޔިތުންގެ މަޖިލީހަށް ހާޒިރުކުރުމަށް ހުށަހަޅައިފިއެވެ.
ދާއިރާގެ މެންބަރުގެ ހައިސިއްޔަތުން މިނިސްޓަރާ ސުވާލު ކުރަން މަޖިލީހަށް ހުށަހަޅާފައި ވަނީ އިދިކޮޅު ޕީއެންސީގެ ނައިބު ރައީސް އަދި މަޑުއްވަރީ ދާއިރާގެ މެންބަރު އާދަމް ޝަރީފް އުމަރުއެވެ.
އޭނާ މިނިސްޓަރާ ސުވާލުކުރަން ހުށަހެޅުއްވީ މީދޫ ފުޓްބޯޅަ ދަނޑުގެ މަސައްކަތް ހުއްޓިފައިވާ ސަބަބާއި އެ ދަނޑުގެ މަސައްކަތް ކުރިއަށް ނުދަނީ ކީއްވެގެންތޯ ސުވާލު ކުރުމަށެވެ.
މީގެ އިތުރުން ދަނޑުގެ މަސައްކަތް މުޅިން ނިމި ބޭނުންކުރަން ފެށޭނެ ތާރީހަކީ ކޮބައިތޯ ސުވާލު ކުރުމަށް ވެސް އާދަމް ޝަރީފްގެ ހުށަހެޅުއްވުމުގައިވެއެވެ.
އާދަމް ޝަރީފް ވަނީ ރައްޔިތުންގެ މަޖިލީހުގެ ގަވާއިދުގެ 80 ވަނަ މާއްދާގެ (ހ)ގައިވާ ގޮތުގެ މަތީން، ޔޫތު މިނިސްޓަރާ ކުރެވޭ ސުވާލުތަކުގެ ޖަވާބު ލިޔުމުން ވެސް ބޭނުންފުޅުވާ ކަމަށް ވިދާޅުވެފައެވެ.