29 Oct 2021, 14:21
ހުޅުމާލެ ދެވަނަ ފިޔަވަހީގައި އެޅި ދާއިމީ ފުރަތަމަ މިސްކިތް ހުޅުވައިފިއެވެ.
އަމިއްލަ ފަރާތަކުން އެޅި މި މިސްކިތަނީ 1994 ވަނަ އަހަރު މަރުވި އަހުމަދު އަމީލް ޖަލީލްގެ ހަނދާނުގައި "މަސްޖިލު ޢަމީލް ޖަލީލް"ގެ ނަމުން ނަންދީގެން އޭނާގެ ދަރިން އިމާރާތް ކުރި މިސްކިތެކެވެ.
މި މިސްކިތް ހުޅުވައިދެއްވީ ހޯމް މިނިސްޓަރު ޝެއިޚް އިމްރާން އަބްދުﷲއެވެ.
މިސްކިތް ހުޅުވުމަށްފަހު މިއަދުގެ ހުކުރު ނަމާދު ކޮށްފައި ވަނީ އެ މިސްކިތުގައެވެ. އެގޮތުން މިސްކިތިގައި މެންދުރު ބަންގި ގޮވީ އިމާމް އަހުމަދު ރަޝީދެވެ. އަދި އިމާމުވެ ހުކުރު ނަމާދު ކުރެއްވީ މަސްޖިދުއް ސުލްތާން މުހައްމަދު ތަކުރުފާނުލް އަޢުޠަމްގެ އިމާމް އައްޝައިހް ނަސްރުﷲ އަލީއެވެ.
ހުޅުމާލެ ދެވަނަ ފިޔަވަހީގައި ހުޅުވި ފުރަތަމަ ދާއިމީ މިސްކިތުގައި ނަމާދު ކުރަނީ -- ފޮޓޯ/ އިސްލާމިކް މިނިސްޓްރީ
އިންސައިޑް ޕްލަސްއިން ޑިޒައިން ކުރި މި މިސްކިތުގެ ބިން ދޫކޮއްފައި ވަނީ އޮކްޓޯބަރު 14، 2018 ގައެވެ.
މި މިސްކިތުގެ ކޮންސްޓްރަކްޝަން އަދި ފިނިޝިންގެ މަސައްކަތްކުރި ކޮށްފައި ވަނީ ޒާން ކޮންސްޓްރަކްޝަން ކޮމްޕެނީ އިންނެވެ. މިސްކިތުގެ މަސައްކަތް ފަށާފައި ވަނީ ނޮވެމްބަރު 11، 2018 ގައެވެ.
ބޮޑުމިނުގައި 16400 އަކަފޫޓް ހުންނަ މި މިސްކިތުގައި 480 މީހުންނަށް ނަމާދު ކުރެވޭނެ ކަމަށް އިސްލާމިކް މިނިސްޓްރީން ބުންޏެވެ.
އަންހެނުންނަށް ވުޟޫކުރުމާއި ނަމާދު ކުރެވޭނެ ގޮތް މިސްކިތުގައި ވަނީ ހަމެޖެހިފައެވެ.
އިސްލާމިކް މިނިސްޓްރީން ބުނީ، ދެ ފްލޯއަށް އިމާރާތްކޮށްފައިވާ މި މިސްކިތުގެ ހަރިއްމަ ތެރޭގައި 600-700 މީހުންގެ ޖާގަ ލިބޭނެ ކަމަށެވެ.
ތިން މަލްޓި ފަންކްޝަނަލް އޭރިއާ ( ލައިބްރަރީ، ކްލާސް އޭރިއާ ) ހިމެނޭ މި މިސްކިތުގެ ވަށައިގެން އެތެރެއަށް ވަދެވޭގޮތަށް ހަމަޖެހިފައިވެއެވެ.