Last Updated: 4 year 2 month ago
ސާފް ޗެމްޕިއަންޝިޕުގައި މިރޭ ރާއްޖެއާއި ބަންގްލަދޭޝް ބައްދަލު ކުރާ މެޗަކީ ދެ ޓީމަށް ވެސް މުބާރާތުގައި ކުރިއަށް ދިއުމަށް ފައިނަލެއް ފަދަ މުހިއްމު މެޗެކެވެ.
މިރޭގެ މެޗުން ރާއްޖެ ބަލިވެއްޖެ ނަމަ މުބާރާތުގެ ފައިނަލަށް ދިއުމުގެ ދޮރު ރާއްޖެއަށް ބަންދުވާނެއެވެ. އަނެއްކޮޅުން އެންމެ ފަހު މެޗުގައި 10 މީހުންނާ އެކު ކުޅެ އިންޑިއާ ބަލިކުރި ބަންގްލަދޭޝް މިރޭގެ މެޗުން މޮޅުވެއްޖެ ނަމަ ހަތް ޕޮއިންޓާ އެކު މުބާރާތުގެ ފައިނަލަށް އެއް ފިޔަވަޅު ގާތް ކުރާނެއެވެ.
ފުރަތަމަ މެޗުގައި ބަންގަލަދޭޝްއިން ސްރީލަންކާއާ ދެކޮޅަށް ކުޅެ މޮޅުވީ 0-1 އިންނެވެ. ބަންގަލްދޭޝއިން ދެވަނަ މެޗުގައި 1-1 އިން އިންޑިއާ އެއްވަރުކޮށްފައިވާ އިރު ރާއްޖެ ފުރަތަމަ މެޗުގައި ބަލިވީ 0-1 ނޭޕާލް އަތުންނެވެ. ރާއްޖެއިން އެ މެޗުގައި މޮޅު ކުޅުމެއް ދެއްކި ނަމަވެސް ގޯލެއް ޖެހުމުގެ ނަސީބު ނުލިބުނީއެވެ.
ރާއްޖެ އާއި ބަންގްލަދޭޝް އެންމެ ފަހުން ގަލޮޅު ދަނޑުގައި ބައްދަލުކުރީ 2016 ވަނަ އަހަރު ރަހުމަތްތެރިކަމުގެ މެޗެއްގަ އެވެ. ބަންގްލަދޭޝްގެ އެތައް ހާސް ސަޕޯޓަރުންނެއް ކުޅިބަލަން ދަނޑަށް ވަންއިރު ރާއްޖޭން މެޗް ކާމިޔާބުކުރީ 5-0 އިންނެވެ.
ރާއްޖޭން ސާފް ޗެމްޕިއަންޝިޕް މުބާރާތުގައި 1997 ވަނަ އަހަރު ވާދަކުރަން ފެށިއިރު ފުރަތަމަ ނުކުންނަން ޖެހުނީ ވެސް ބަންގްލަދޭޝްއާ އެވެ. އެމެޗު ނިމުނީ 1-1 އިން އެއްވަރު ވެގެންނެވެ. އެއަށް ފަހު ރާއްޖޭން ބަންގާޅާ ދެކޮޅަށް ކުޅުނީ 2003 ވަނަ އަހަރުގެ މުބާރާތުގަ އެވެ.
ބަންގްލަދޭޝްގައި ސާފް ޗެމްޕިއަންޝިޕް މުބާރާތް ބޭއްވި އެ އަހަރު އެ ގައުމުން ވަނީ މުބާރާތުގައި ރާއްޖެ ދެ ފަހަރު ބަލިކޮށްފަ އެވެ. ގުރޫޕް ސްޓޭޖުގައި 1-0 އިން ރާއްޖެ ބަލިކުރިއިރު، ފައިނަލުގައި ބަންގްލަދޭޝް މޮޅުވީ ޕެނަލްޓީ ޖަހައިގެންނެވެ. އެއަށް ފަހު ރާއްޖެ އާއި ބަންގްލަދޭޝް ސާފް ޗެމްޕިއަންޝިޕުގައި ވާދަކުރި ދެ މެޗުވެސް ކާމިޔާބުކުރީ ދިވެހިރާއްޖެ އެވެ.
