05 Oct 2021, 09:32
އަހުމަދިއްޔާ ސްކޫލުގައި ހޭދަކުރެއްވި 34 އަހަރު ދުވަހުގެ ތެރޭގައި ގިނަ ހިދުމަތްތަކެއް އެ ސުކޫލަށް ކޮށްދެއްވައިފިއެވެ. އިންގިލާބީ ބަދަލުތަކެއް އަހުމަދިއްޔާއަށް ގެނެސްދެއްވައިފިއެވެ.
"މަދަރުސްތުލް އަހުމަދިއްޔާ"ގެ ގޮތުގައި އޮތް އަހުމަދިއްޔާ އިންޓަނޭޝަނަލް ސުކޫލަކަށް ބަދަލު ކުރެއްވުމަށް ބުރަ މަސައްކަތްތަކެއް ކުރައްވާ އެކަން ކާމިޔާބު ވެސް ކުރައްވައިފިއެވެ. މިހާރު އެއީ އަހުމަދިއްޔާ އިންޓަނޭޝަނަލް ސުކޫލެވެ.
ރާއްޖޭގެ ތާރީހުގައި ވެސް އެންމެ ނަތީޖާ ރަނގަޅު ސުކޫލުތަކުގެ ލިސްޓުގެ އެންމެ އުހުގައި އަހުމަދިއްޔާގެ ނަން ފަވާލުމުގެ އެއް މޭސްތިރިއަކީ އެއީއެވެ.
އެންމެ ފުރަތަމަ އަހުމަދިއްޔާއާ ގުޅިވަޑައިގެންނެވީ ވަގުތީ ޓީޗަރެއްގެ ގޮތުގައެވެ. އެއީ އިނގިރޭސި މާއްދާ ކިޔަވައިދެއްވުމަށެވެ.
އެއީ އަހުމަދިއްޔާގެ ހުރިހާ ދަރިވަރުންގެ ވެސް ލޯބި ހޯއްދަވައިފައިވާ މުހައްމަދު ރަޝީދެވެ. މިއަދު އަހުމަދިއްޔާ އިންޓަނޭޝަނަލް ސުކޫލްގެ ޕްރިންސިޕަލެވެ.
ތައުލީމީ ދާއިރާއަށް ފުރަތަމަ ޓިއުޝަން ކްލާސްތަކުން!
ރަޝީދުގެ އާއިލާއަކީ އެހާ ތަނަވަސް އާއިލާއެއް ނޫނެވެ. އެހެންކަމުން ކިޔަވައި ނިންމަވާލެއްވުމަށްފަހު އޭނާ ބޭނުންފުޅުވީ ސިފައިންގެއަށް ވެންނެވުމަށެވެ. އޭނާގެ ބައްޕާފުޅަކީ ވެސް ސިފައިންގޭގައި މަސަައްކަތް ކުރެއްވި ބޭކަލެކެވެ.
އެހެން ނަމަވެސް ކަން ދިމާވި ގޮތުން ސިފައިންގެއަށް ވަނުން ލަސްވަމުން ދާތީ އެ ހިޔާލު ރަޝީދު ދޫކޮށްލެއްވިއެވެ. އަދި އަވަހަށް ވަޒީފާއެއް ހޯއްދެވުމުގެ މަސައްކަތް ފެށްޓެވިއެވެ.
އެ ދުވަސްވަރު އާއިލާގެ ހާލަތު ހުރި ގޮތުން މަތީ ތައުލީމު ހާސިލު ކުރުމުގެ މާ ބޮޑު ފުރުސަތެއް ވެސް ރަޝީދަށް ލިބިވަޑައިނުގެންނެވިއެެވެ.
ވަޒީފާއެއް ހޯއްދަވަން އެންމެ ފުރަތަމަ މަަސައްކަތް ކުރައްވަން ފެށްޓެވީ "ކިނާރާ ޓިއުޝަން ކުލާހު"ގައެވެ. އާންމު ބަހުރުވައިން ނަމަ "މަޖީދުގޭ"ގައެވެ.
"މަޖީދުގޭގައި އުޅެމުން އަޅުގަނޑަށް ފުރުސަތެއް ލިބުނީ، އޭރު މާލޭގަ ހާއްސަ ކުލާސްތައް ހިންގާނެ، އެއީ ސަނަދު ނަގާ ކްލާސްތައް. ސަނަދު ނަގާ މާލޭގެ އެންމެ މަޝްހޫރު އެއް ކުލާހަކީ ވުޑުވިލާން. އެއީ އެގެއަށް ކިޔާ ނަން. އެހެން ނަމަވެސް އެތަނުގެ އަސްލު ނަމަކީ ޕްރޮގްރެސިވް ކްލާސް. އެތަނުން ވެސް އަޅުގަނޑަށް ފުރުސަތު ލިބުނު،" ތައުލީމީ ދާއިރާއަށް ވަދެވުނު ގޮތް ރަޝީދު "ސަން"އާ ހިއްސާކުރެއްވިއެވެ.
މަޖީދުގެއާއި ހާއްސަ ކްލާސްތަކުގައި ކިޔަވައިދެއްވަން އުޅުއްވުމުގެ ތެރޭގައި އަހުމަދިއްޔާގައި ވަގުތީ ޓީޗަރެއްގެ ގޮތުގައި މަސައްކަތް ކުރުމުގެ ފުރުސަތު ރަޝީދަށް ލިބިވަޑައިގަތެވެ. އޭނާ އެންމެ ފުރަތަމަ އަހުމަދިއްޔާއާ ގުޅިވަޑައިގަތީ 1987 ވަނަ އަހަރުއެވެ. އޭނާ ކިޔަވައިދެއްވަން ފުރަތަމަ ފެއްޓެވީ އިނގިރޭސިއެވެ.
އަހުމަދިއްޔާގައި މަސައްކަތް ކުރެއްވި ދުވަސްވަރު ސަރުކާރުގެ އެހެން ވަޒީފާއެއް ވެސް ރަޝީދަށް ލިބިވަޑައިގަތެވެ. އެއީ "ނުރަސްމީ ތައުލީމު ދޭ މަރުކަޒު"ގެ އެސިސްޓެންޓް ޕްރޮޖެކްޓް އޮފިސަރ ޓްރެއިނީއެއްގެ މަގާމެވެ.
"ނުރަސްމީ ތައުލީމީ މަރުކަޒުގައި އުޅުނު ދުވަސްވަރު އަޅުގަނޑަށް ފުރުސަތު ލިބުނު އަޅުގަނޑު ބަލަހައްޓަމުން ދިޔަ މަސައްކަތާ ގުޅޭ ގޮތުން އިތުރު ތައުލީމު ހާސިލު ކުރަން. އެއީ ލޯންގް ޓާމް ކޯސްތަކެއް ނޫން، ޝޯޓް ޓާމް ވޯކްޝޮޕްތަކެއްގައި އަޅުގަނޑު ބައިވެރިވިން. އެގޮތުން އިންޑޮނޭޝިއާ، ތައިލެންޑް ކަހަލަ ތަންތަނުން ހައެއްކަ މަސްދުވަހުގެ ޓްރެއިނިން ޕްރޮގްރާމްތަކެއް ހެދިން،" ތައުލީމީ ދާއިރާގައި ފުރަތަމަ މަސައްކަތް ކުރައްވަން ފަށްޓަވާ ލިބިވަޑައިގެންނެވި ތަޖުރިބާ ރަޝީދު ހިއްސާ ކުރެއްވިއެވެ.
އަހުމަދިއްޔާއާ ގުޅިވަޑައިގެން ދުވަހުން ފަށައިގެން ވެސް ސުކޫލަށް ވަރަށް ބޮޑު ލޯތްބެެއް ރަޝީދުގެ ހިތުގައި އާލާވިއެވެ. އެހެންކަމުން ސުކޫލުގެ ހުރިހާ މަސައްކަތްތަކެއްގައިހެން އޭނާ ޝާމިލުވެވަޑައިގެން އުޅުއްވައެވެ.
އެ ދުވަސްވަރު ރަޝީދު މަސައްކަތް ކުރެއްވީ އޭނާގެ މުސްތަގުބަލު އަހުމަދިއްޔާގައި ބިނާ ކުރެއްވެވޭތޯއެވެ. އެހެން ކަމަކަށް ވުރެ ބޮޑަށް ވިސްނުންފުޅު ބެހެއްޓެވީ އަހުމަދިއްޔާގެ ތަރައްގީއަށެވެ. ސުކޫލުގެ ކުރިއެރުމަށެވެ.
އަހުމަދިއްޔާގައި ރަޝީދު އެންމެ ގިނަ ދުވަހު ކިޔަވައިދެއްވީ އިނގިރޭސިއާއި ސޯޝަލް ސްޓަޑީޒްއެވެ. އަދި ކުރެހުމަކީ އަބަދުވެސް ރަޝީދު ކުރައްވާ ހިތްވާ ކަމަަކަށް ވާތީ، ދަށް ގުރޭޑްތަކުގެ ދަރިވަރުންނަށް ކުރެހުން ވެސް ކިޔަވައިދެއްވިއެވެ.
ފުލުފުލުގައި ގިނަ ކުރިއެރުންތަކެއް!
ކިޔަވައިދެއްވުމުގައި މާ ގިނަ ދުވަސްތަކެއް ރަޝީދު ހޭދައެއް ނުކުރައްވައެވެ. ރަޝީދުގެ މަސައްކަތްތައް އަހުމަދިއްޔާގެ ވެރިންނަށް ކަމު ގޮސް، އޭނާ ސުކޫލު ހިންގުމުގެ ދާއިރާއަށް ބަދަލު ކުރެއްވިއެވެ. އޭގެ ފަހުން އޭނާ ބޮޑަށް މަސައްކަތް ކުރެެއްވީ ސުކޫލު ހިންގުމުގެ މަަަސައްކަތުގައެވެ.
"އެންމެ ފުރަތަމަ ޓީޗަރަކަށް ހުއްޓާ ބަދަލު ކުރެއްވީ ސުޕަވައިޒަރަކަށް. ސުޕަވައިޒަރަކަށް ކުޑަ ދުވަަސްކޮޅަކު މަސައްކަތްކޮށްފައި ސީނިއާ ސުޕަވައިޒަރަކަށް. އެއީ 1990ގެ އަހަރުތަކުގެ ތެރޭގައި. ދެން އަޅުގަނޑު ބަދަލުވީ އެސިސްޓެންޓް ޕްރިންސިޕަލަކަށް،" އަހުމަދިއްޔާގައި އޭނާ ހޭދަކުރެއްވި ފުރަތަމަ ދުވަސްކޮޅުގެ ހަނދާން ރަޝީދު އާ ކުރެއްވެވިއެވެ.
އެސިސްޓެންޓް ޕްރިންސިޕަލެއްގެ ގޮތުގައި ގިނަ ދުވަސްތަކެއް ވަންދެން ރަޝީދު އަހުމަދިއްޔާގައި މަސައްކަތް ކުރެއްވެވިއެވެ.
ރަޝީދު އެންމެ ފުރަތަމަ، އަހުމަދިއްޔާއާ ގުޅިވަޑައިގެންއިރު ސުކޫލުގެ ޕްރިންސިޕަލަކަށް ހުންނެވީ އަހުމަދިއްޔާގެ ފުރަތަމަ ޕްރިންސިޕަލް އަބްދުއްރަޝީދު އަލީއެވެ. ނަމަވެސް ރަޝީދު ސުކޫލާ ގުޅިވަޑައިގެންތާ އަހަރެއްހާ ދުވަހުގެ ތެރޭގައި އަބްދުއްރަޝީދު އިސްތިއުފާ ދެއްވިއެވެ.
އޭގެ ފަހުން، ރަޝީދު ސުކޫލުގެ ހިންގުމުގައި މަސައްކަތް ކުރެއްވި ދުވަސްވަރު ސުކޫލުގެ ޕްރިންސިޕަލަކަށް ހުންނެވީ އަބްދުއްސަމީއު ހަސަންއެވެ. އެންމެ ގިނަ ދުވަހު ރަޝީދަށް މަސައްކަތް ކުރެއްވެވުނީ އަބްދުއްސަމީއުގެ އަރިހުގައެވެ.
"އަޅުގަނޑުގެ މަގާމުތައް ބަދަލުވަމުން މިއައީ އަބްދުއްސަމީއުގެ ޕްރިންސިޕަލްކަމުގެ ދައުރުގައި. އަބްދުއްސަމީއު އަޅުގަނޑުގެ މަސައްކަތްތައް ވަރަށް ބޮޑަށް ފާހަގަ ކުރައްވާ ތައުރީފް ކުރައްވާ، އަޅުގަނޑަށް ކުރިއަށްދާނެ މަގު ވަރަށް ބޮޑަށް ހުޅުއްވައިދެއްވި،" ރަޝީދު ވިދާޅުވިއެވެ.
އެސިސްޓެންޓް ޕްރިންސިޕަލެއްގެ ގޮތުގައި ރަޝީދު ހަތަރުވަރަކަށް އަހަރު ހުންނެވިއެވެ. އޭގެ ފަހުން ދެން ހުންނެވީ ސީނިއާރ އެސިސްޓެންޓު ޕްރިންސިޕަލެއްގެ މަގާމުގައެވެ.
އޭގެ ފަހުން 2000ވަނަ އަހަރު ރަޝީދު އަހުމަދިއްޔާގެ ޑެޕިއުޓީ ޕްރިންސިޕަލެއްގެ މަގާމަށް ބަދަލު ކުރެވުނެވެ. އޭނާ ޑެޕިއުޓީ ޕްރިންސިޕަލެއްގެ ގޮތުގައި މަސައްކަތް ކުރައްވަނިކޮށް ސުކޫލުގެ މެނޭޖްމަންޓަށް ކުޑަވަރެއްގެ ބަދަލެއް އައެވެ.
އަބްދުއްސަމީއު 2000ވަނަ އަހަރުގެ މެދަކާ ހިސާބުން އިސްތިއުފާ ދެއްވުމާ ގުޅިގެން ސުކޫލާ ހަވާލުވެ ވަޑައިގެންނެވީ އަހްމަދު ސައީދު[ގަހާ ސައީދު]. ގަހާ ސައީދުގެ އަރިހުގައި ވެސް އަޅުގަނޑު ޑެޕިއުޓީ ޕްރިންސިޕަލެއްގެ ގޮތުގައި މަސައްކަތް ކުރަމުން ގޮސް ގަހާ ސައީދު ވެސް އަމިއްލަ ބޭނުމަކަށް އިސްތިއުފާ ދެއްވީމަ އޭރު ސުކޫލުގެ ޕްރިންސިޕަލެއް ނެތް. އެހެން ނަމަވެސް އޭރު ސުކޫލުގެ ހިންގުން ހަވާލު ކުރައްވާފަ އޮތީ ސުކޫލުގެ އެހެން ޑެޕިއުޓީ ޕްރިންސިޕަލަކާ
އޭރު ސުކޫލު ވަގުތީ ގޮތުން ހިންގުމާ ހަވާލުވެ ހުންނެވި ޑެޕިއުޓީ ޕްރިންސިޕަލް ވެސް މާ ގިނަ ދުވަސްތަކެއް ނުވެ އިސްތިއުފާ ދެއްވީއެވެ.
އޭގެ ފަހުން މައްޗަންގޮޅި އަވަށް ކުރިއަރުވާ ކޮމިޓީން 2007ވަނަ އަހަރު ސުކޫލް ހިންގުމުގެ ހުރިހާ މަސްއޫލިއްޔަތެއް ރަޝީދާ ހަވާލު ކުރެއްވެވިއެވެ. ހުރިހާ މަސްއޫލިއްޔަތަކާ ހަވާލުވެވަޑައިގެންނެވުމަށްފަހު ދޮޅު އަހަރެއްހާ ދުވަހު އެކްޓިން ޕްރިންސިޕަލެއްގެ ގޮތުގައި ހުންނެވިއެވެ.
އެއަށްފަހު ސުކޫލުގެ ޕްރިންސިޕަލްކަމުގެ މަގާމާ ރަސްމީކޮށް ރަޝީދު ހަވާލުވެވަޑައިގަތީ 2009ވަނަ އަހަރުގައެވެ. އޭގެ ފަހުން މިއަދާ ޖެހެންދެން ވެސް އޭނާއަކީ އަހުމަދިއްޔާގެ ޕްރިންސިޕަލެވެ. އެހެންކަމުން މިހާރު އަހުމަދިއްޔާގެ ހިންގުމާ ރަޝީދު ހަވާލުވެ ހުންނެވިތާ 14 އަހަރުވީއެވެ.
މައްޗަންގޮޅިއަށް ގިނަ ހިދުމަތްތަކެއް ކޮށްދެވުން، ބޮޑު އުފަލެއް!
ރަޝީދު ވިދާޅުވީ އޭނާ އަހުމަދިއްޔާއާ ގުޅިވަޑައިގެންއިރު އަހުމަދިއްޔާއަކީ ވަރަށް ކުޑަ ސުކޫލެއް ކަމަށެވެ.
އޭރު މާލޭގެ ކޮންމެ އަވަށެއްގައި އަވަށު މަދަރުސާއެއް ހުރެއެވެ. ހަތަރު އަވަށުގެ މަދަރުސާ ވެސް ފެށިގެން އައީ ވަރަށް ފޯރީގައެވެ. ތައުލީމީ ގޮތުން ވެސް އޮތީ އަވަށު ވާދަވެރިކަމެއް ފެށިފައެވެ.
ރަޝީދަށް ތައުލީމީ ދާއިރާގައި ލިބުނު އެންމެ ބޮޑު ހިތްހަމަޖެހުމަކީ އޭނާގެ ޕްރިންސިޕަލްކަމުގެ ދަށުގައި އަހުމަދިއްޔާގެ ކުރިއެރުމަށް ގިނަ މަސައްކަތްތަކެއް ކޮށްދެވުމެވެ.
"މާލޭގެ ހަތަރު އަވަށުގައި ހުރި އަވަށު މަދަރުސާތައް ގާތްގަނޑަކަށް އުވިގެން ދިޔައީ. އެއީ މާފަންނުގައި ވެސް މިހާރު އޮންނަނީ ޕްރީސުކޫލެއް، ގަލޮޅުގައި ވެސް ޕްރީސުކޫލެއް. ހެންވޭރު ނުވަތަ އަމީރުއަހްމަދު ވެސް ޕްރީސުކޫލެއް. އެހެން ނަމަވެސް އަހުމަދިއްޔާ މިއަދު މިއޮތީ ރާއްޖޭގެ އެންމެ ދުވަސްވީ ސުކޫލްތަކާ އެއްހަމައަކަށް ގެނެވިފައި،" ރާއްޖޭގެ އެންމެ ދުވަސްވީ ސުކޫލްތަކަށްވުރެ ރަނގަޅު ނަތީޖާތަކެއް އަހުމަދިއްޔާއިން ހޯދުމަކީ ރަޝީދަށް ލިބޭ ވަރަށް ބޮޑު އުފަލެކެވެ.
އަހުމަދިއްޔާ، އިންޓަނޭޝަނަލް ސުކޫލަކަށް ބަދަލުވީ ވެސް ރަޝީދުގެ ޕްރިންސިޕަލް ކަމުގެ ދައުރުގައެވެ. 2015ވަނަ އަހަރު އެކަން ހާސިލުވުމަކީ ވެސް އޭނާއަށް ލިބޭ އުފަލެކެވެ. އަދި މިއަދު ރާއްޖޭގެ އެންމެ ކުދިން ގިނަ އެއް ސުކޫލަށް އަހުމަދިއްޔާ ވުމަކީ ވެސް އޭނާއަށް ލިބޭ ހިތްހަމަޖެހުމެކެވެ.
ރަޝީދު ވިދާޅުވީ އަހުމަދިއްޔާ މިއަދު މިއޮތީ ކޮންމެ ދިމާލަކަށް ދޫކޮށްލިޔަސް އަމިއްލައަށް ކުރިއަށްދާނެ ގޮތްތަކެއް ރޭވިފައި ކަމަށެވެ.
އަހުމަދިއްޔާއަކީ ރާއްޖޭގެ އެންމެ ނަތީޖާ ރަނގަޅު އެއް ސުކޫލެވެ. މާލޭގެ އެންމެ ކުދިން ގިނަ އެއް ސުކޫލެވެ. މިހާރު ވެސް އަހުމަދިއްޔާގައި 3000އެއްހާ ކުދިން އެބަ ކިޔަވައެވެ.
ޕްރީސުކޫލް ފަށައިގެން ގޮސް ގްރޭޑް 12އާ ހަމައަށް ވެސް އަހުމަދިއްޔާގައި ތައުލީމް ހާސިލު ކުރެވެއެވެ. އަހުމަދިއްޔާއަކީ ޓީޗަރުންގެ އާބާދީއަށް ބެލި ނަމަވެސް މިހާރު އެންމެ ޓީޗަރުން ގިނަ ސުކޫލެވެ.
"މި ހުރިހާ ކަންތައްތަކެއް މިތަނުގެ އެތެރޭގައި އަޅުގަނޑުގެ މޭސްތިރިކަމުގެ ދަށުގައި ކޮށްދެވުނީތީ، މައްޗަންގޮޅިއަށް ވަރަށް ގިނަ ހިދުމަތްތަކެއް ކޮށްދެވުނީތީ. އަޅުގަނޑު ތައުލީމީ ދާއިރާގައި 34 އަަހަރު މެދު ނުކެނޑި އެއް ސުކޫލަކަށް ހިދުމަތް ކޮށްދެވުނީތީ ވަރަށް އުފާވޭ. އެއީ އަޅުގަނޑުގެ ހަޔާތުގައި އަޅުގަނޑަށް ލިބުނު އެންމެ ބޮޑު އުފާ،" ރަޝީދު ވިދާޅުވިއެވެ.
ހިތްދަތި ދުވަސްތަކާ ވެސް ކުރިމަތިލާން ޖެހުނު!
އަހުމަދިއްޔާގައި ރަޝީދު ހޭދަކުރެއްވި ދިގު ތާރީހުގައި ހިތާމަވެރި ބައެއް ކަންކަމާ ވެސް ކުރިމަތިލައްވަން ޖެހިވަޑައިގެންނެވިއެވެ. ދަތިތަކާ ކުރިމަތިވެލެއްވިއެވެ.
އެގޮތުން 2000ވަނަ އަހަރުގެ ތެރޭގައި ސުކޫލުގެ މެނޭޖްމަންޓަށް އައި ބަދަލުތަކާ ގުޅިގެން ރަޝީދަށް އޭނާގެ މަސައްކަތްތަކުން ކޮންމެވެސް ވަރަކަށް އެކަހެރިވެވަޑައިގެން ހުންނަވަން ޖެހުނެވެ.
"އަހުމަދިއްޔާގެ ބައެއް ކަންކަމާ ތަންކޮޅެއް ދުރަށް ޖެހިލައިފައި ހުންނަން ޖެހުނު. އެހެން ނަމަވެސް ﷲ އިރާދަ ކުރެއްވިއްޔާ މިއަދު އެ ހުރަސްތައް ގިރާކޮށް އަހުމަދިއްޔާގެ ޕްރިންސިޕަލް ކަމުގައި މިހުރީ. އަޑިގަނޑަކަށްފަހު އުސްގަނޑެއް އަންނާނެ،" ރަޝީދު ވިދާޅުވިއެވެ.
ރަޝީދު ވިދާޅުވީ އޭނާ މިހާރު އަހުމަދިއްޔާގެ ޕްރިންސިޕަލްކަމުގެ މަގާމުގައި ހުންނަވަނީ ވަރަށް ހިތްހަމަޖެހިގެން ކަމަށެވެ. ތައުލީމީ ވަޒީރުކަމަށް ވަޑައިގަންނަވާ ހުރިހާ ވަޒީރުން ވެސް ރަޝީދުގެ މަސައްކަތްތައް ވަރަށް ބޮޑަށް ބަލައިގަންނަވައެވެ.
މިއަހަރުގެ އޯލެވެލް އިމްތިހާނުގެ ނަތީޖާ ލިބުމުން ވެސް އެޑިއުކޭޝަން މިނިސްޓަރު ޑރ.އާއިޝަތު އަލީ، ރަޝީދަށް ފޯނުން ގުޅުއްވާ މަރުހަބާ ދެންނެވިއެވެ. އެފަދަ ކަންކަމުން ރަޝީދަށް ވަރަށް ބޮޑު ހިތްވަރެއް ލިބެއެވެ.
ޖާގައިގެ ގޮތުން ދަތި ސުކޫލެއް، ބޮޑު ގޮންޖެހުމެއް
މާލޭގެ ގިނަ ސުކޫލުތަކަކީ ޖާގައިގެ ގޮތުން ތަނަވަސް ސުކޫލުތަކެކެވެ. ސަރުކާރުގެ ދުވަސްވީ ސުކޫލުތަކުގައި ބޮޑު ޖާގައެއް އޮވެއެވެ. އެހެން ނަމަވެސް އަހުމަދިއްޔާގެ ހާލަތު ވަރަށް ބޮޑަށް ވެސް ތަފާތެވެ.
ޖާގައިގެ ގޮތުން ކިތަންމެ ދަތި ސުކޫލެއް ނަމަވެސް އަހުމަދިއްޔާއަކީ އާބާދީގެ ގޮތުން ބޮޑު ސުކޫލެކެވެ. އެންމެ ތުއްތު އުމުރުގެ ކުދިން [ބޭބީ ނާސަރީ]އިން ފަށައިގެން ގުރޭޑް 12އާ ހަމައަށް އެ ސުކޫލުގައި ކިޔަވައިދެއެވެ.
އަހުމަދިއްޔާއަށް ކުރިމަތިވާ އެންމެ ބޮޑު ގޮންޖެހުމަކީ ޖާގައިގެ ދަތިކަމެވެ. ރަޝީދު ވިދާޅުވީ ސުކޫލަށް އަމިއްލައަށް މިކަން ހައްލު ނުކުރެވޭނެ ކަމަށެވެ. މިކަން ހައްލުވާނީ އަމިއްލަ ފަރާތަކުން ނުވަތަ ސަރުކާރުން އެހީތެރިކަމެއް ފޯރުކޮށްދެވުމުން ކަމުގައި އޭނާ ވިދާޅުވިއެވެ.
"ތުއްތު ކުދިންނަށް ކިޔަވައިދިނުން ބިނާވެފައި މި އޮންނަނީ، ކުޅުމުގެ ތެރެއިން އުނގަންނައިދިނުމަށް. އެހެން މިކަން އޮތް އިރުގައި މި ސުކޫލުގައި ނެތް ކުދިން ސުކޫލް ތެރެއަށް ނެރެ ކުޅެލާ، މި މާހައުލުގައި ދަސްކޮށްދެވޭނެ ޖާގައެެއް،" ރަޝީދު ވިދާޅުވިއެވެ.
އެ ގޮންޖެހުމާ ގުޅިގެން އަހުމަދިއްޔާއަށް އިތުރު ޖާގައެއް ހަމަޖެހޭތޯ ސަރުކާރުގެ އިދާރާތަކަށް މިހާރު ވެސް ވަނީ ދަންނަވާފައެވެ.
"އަޅުގަނޑު ވަރަށް ބޮޑަށް އެބަ މަސައްކަތް ކުރަން އަހުމަދިއްޔާއަށް ޖާގައެއް ހަމަޖެހޭތޯ. އަޅުގަނޑު އުއްމީދު ކުރަނީ ކައިރި މުސްތަގުބަލެއްގައި އަހުމަދިއްޔާއަށް ވެސް މި ފުރުސަތު ލިބިގެންދާނެ ކަމަށް،" ރަޝީދު ވިދާޅުވިއެވެ.
އަހުމަދިއްޔާއަކީ އަބަދުވެސް ދެމިއޮންނަ ސުކޫލަކަށް ވުން، ބޮޑު އުއްމީދެއް!
އަހުމަދިއްޔާ ދޫކުރައްވައި ރަޝީދު ވަޑައިގެންނެވުމުން އަހުމަދިއްޔާ ހުއްޓުމަކަށް ދާން އޭނާ އެދިއެއް ނުލައްވައެވެ. އޭނާގެ އެންމެ ބޮޑު އުއްމީދަކީ އޭނާ ނެތް ނަމަވެސް، އަހުމަދިއްޔާ އަބަދުވެސް ދެމިއޮތުމެވެ.
ރަޝީދު ވިދާޅުވީ އަހުމަދިއްޔާއަކީ އެ ސުކޫލުގެ ބާނީ އަލްމަރުހޫމް ޑީ.އަހްމަދު ދީދީ ވަރަށް ބުރަ މަސައްކަތުން ބިނާ ކުރެއްވުމަށްފަހު މައްޗަންގޮޅީގެ ރައްޔިތުންނަށް ދެއްވި ހަދިޔާއެއް ކަމަށެވެ. އަދި "އަހުމަދިއްޔާ"ގެ ނަން މި ސުކޫލަށް ދެވުނީ ވެސް އެމަނިކުފާނު ވެލެއްވި ގުރުބާނީއާ ގުޅިގެން ކަމަށް ރަޝީދު ފާހަގަ ކުރެއްވިއެވެ.
"އެހެންވީމަ އަޅުގަނޑު އަހުމަދިއްޔާގެ ނަން ދެމެހެއްޓުމަށް ޓަކައި ވަރަށް ގިނަ މަސައްކަތްތަކެއް މިހާރު ވެސް ހުންނާނީ ޕްލޭންކޮށްފައި،" ރަޝީދު ވިދާޅުވިއެވެ.
އެ ޕްލޭންގެ ދަށުން މިހާރު ހަޔަރ އެޑިއުކޭޝަން މިނިސްޓްރީގައި އަހުމަދިއްޔާ ކެރިއާ ޓްރެއިނިން އިންސްޓިޓިއުޓް ވަނީ ރަޖިސްޓްރީ ކޮށްފައެވެ. ކޮވިޑާ ގުޅިގެން އެ އިންސްޓިޓިއުޓްގެ މަސައްކަތް އަދި ނުފެށި އޮތް ނަމަވެސް ވަރަށް އަވަހަށް އެތަނުގެ މަަސައްކަތް ފެށޭނެއެވެ.
"މި ބަލަނީ އަހުމަދިއްޔާއަށް ކޮންމެ ގޮތެއް ވިޔަސް އަހުމަދިއްޔާގެ މި ބްރޭންޑް ތައުލީމީ ހިޔާވައްސެއްގެ ގޮތުގައި މިތަނުގެ ތެރޭގައި ކުރިއަށް ގެންދަން. މި ތަނުގައި ހަމަ ސެޓްފިކެޓް ކޯސްތަކާ ޑިގްރީ ކޯސްތައް ވެސް ކިޔަވައިދީގެން އަހުމަދިއްޔާ މި ނަމުގައި ފެންނަން ހުންނާނެ ގޮތެއް ވޭތޯ ބެލުން،" ރަޝީދު ވިދާޅުވިއެވެ.
އަހްމަދިއްޔާ އިންޓަނޭޝަނަލް ސްކޫލްގެ ޕްރިންސިޕަލް މުހައްމަދު ރަޝީދު --- ސަން ފޮޓޯ/ އަހްމަދު އައިމަން އަލީ
ރަޝީދުގެ މި މަސައްކަތްތަކުގެ ދަށުން އަހުމަދިއްޔާގެ ދުވަހު ނޫހެއް ވެސް އަހުމަދިއްޔާ1982ގެ ނަމުގައި ވަނީ ފަށްޓަވައިފައެވެ. އަދި އަހުމަދިއްޔާގެ ޓްރެއިނިން އިންސްޓިޓިއުޓަކީ ދުރު ރާސްތާ ޕްލޭނެއްގެ ދަށުން އެޅި ބިންގަލެކެވެ. އެތަން މުސްތަގުބަލުގައި ކޮލެޖަކަށް ނުވަތަ ޔުނިވާސިޓީއަކަށް ބަދަލުވުމަކީ ރަޝީދުގެ އުއްމީދެކެވެ.
ތައުލީމީ ދާއިރާގެ މަސައްކަތްތަކުގައި ރަޝީދަށް އެންމެ ބޮޑު އެހީތެރިކަމެއް ފޯރުކޮށްދެއްވި ބޭފުޅުންނަކީ އަހުމަދިއްޔާގެ ކުރީގެ ޕްރިންސިޕަލުންނެވެ. އެ ބޭފުޅުންގެ އަރިހުން ގިނަ ކަންތައްތަކެއް ދަސްވި ކަމަށް އޭނާ ފާހަގަ ކުރެއްވިއެވެ.
"އަބްދުއްސަމީއު އަޅުގަނޑު މި ދާއިރާގައި ކުރިއަށް ދިއުމަށް ވަރަށް ބޮޑު އެހީތެރިކަމެއް ފޯރުކޮށްދެއްވި. އަބްދުއްސަމީއުގެ ފަރާތުން އަޅުގަނޑަށް ވަރަށް ގިނަ ކަންތައްތަކެއް ދަސްވި. ސުކޫލުގެ ގިނަ ކަންކަމުގައި އެހީތެރިކަން ފޯރުކޮށްދެއްވި،" ރަޝީދު ވިދާޅުވިއެވެ.
ރަޝީދު ވިދާޅުވީ އަހުމަދިއްޔާގެ ހުރިހާ ޕްރިންސިޕަލުން ވެސް އޭނާގެ ކާމިޔާބީގައި ޝާމިލުވާ ކަމަށެވެ. އެހެންކަމުން ރަޝީދު ވަނީ އެ ހުރިހާ ބޭފުޅުންނަށް ވެސް ހާއްސަ ޝުކުރެއް ރައްދު ކުރައްވައިފައެވެ.
އަހުމަދިއްޔާގެ ޕްރިންސިޕަލެއްގެ ގޮތުގައި 14 އަހަރު މަސައްކަތް ކުރައްވާފައިވާ ރަޝީދަށް 2017 ވަނަ އަހަރު ސްކޫލު ހިންގުމުގެ ދާއިރާއިން ހިތްވަރު ދިނުމުގެ އިނާމު ވެސް ވަނީ ލިބިފައެވެ.
އުމުރުން މިހާރު 39 އަހަރު ފުރިފައިވާ އަހުމަދިއްޔާއާ ރަޝީދު ގުޅިވަޑައިގެންނެވީ އެ ސުކޫލު ފިރުކެންފެށި ދައުރުގައެވެ. ސުކޫލުގެ އުމުރުން އެންމެ 4 އަހަރުގައެވެ.
އެ ދުވަސްވަރު ސުކޫލާ ގުޅިވަޑައިގެން 34 އަހަރު ދުވަސްވަންދެން އަހުމަދިއްޔާއަށް ރަޝީދު ގިނަ ހިދުމަތްތަކެއް ކޮށްދެއްވައިފިއެވެ. މިއަދު އަހުމަދިއްޔާއަކީ ބޮޑު ސުކޫލެކެވެ. މަޝްހޫރު ބްރޭންޑެކެވެ. އަހުމަދިއްޔާގެ ސްޕީޑް ހުރީ ހަ ވަނަ ގިޔަރުގައި މެކުހަށް ޖަހައިފައެވެ. ގައިމު ވެސް ރަޝީދަކީ މި ކާމިޔާބީގެ ހިއްސާދާރެއްކަން ޔަގީނެވެ.