24 Sep 2021, 13:18
ދަރަނި ނެގުން މަދުކޮށް، ދަރަންޏަށް ނަގާ ފައިސާ ވީހާވެސް އަވަހަށް އަނބުރާ ދައްކަން ހުތުބާގައި ގޮވައިލައިފިއެވެ.
އިގުތިސާދު ކުުރުމުގެ މުހިއްމު ކަމަށް ހާއްސަކޮށްފައިވާ މިއަދުގެ ހުތުބާގައި ބުނީ މުއުމިނުންގެ ސިފައަކީ ތިމާގެ އަތުގައިވާ އެއްޗަކުން ފުއްދައިގެން އިގުތިސާދުކޮށްގެން ދިރިއުޅުން ކަމަށެވެ. ނަމަވަސް ތިމާގެ އާމްދަނީއަށް ވުރެ އިތުރަށް ހަރަދު ކުރަމުންދާ މަންޒަރު މިހާރު މުޖުތަމައުން ފެންނަ ކަމަށެވެ.
އެގޮތުން ދަރިން ކުޅެން ގެންގުޅޭ އެއްޗެހި ހަލާކުވުމުގެ ކުރިން އާ ކުޅޭ ތަކެތި ގަތުމާއި، ބާޒާރަށް ނުކުންނަ އަގުބޮޑު ކޮންމެ އެއްޗެއް ގަތުމަކީ މިހާރު ބައެއް ދިވެހިންގެ ނުރަނގަޅު އާދައެއް ކަމަށް ހުތުބާގައި ބުންޏެވެ. އަދި އެފަދަ ކަންކަމަށް ފުދުންތެރިކަން ނެތަސް މީހުންގެ އަތުން ނުވަތަ ބޭންކުން ދަރަންޏަށް ފައިސާ ނަގާ ކަމަށް ހުތުބާގައި ފާހަގަކުރިއެވެ.
ނަމަވެސް ދަރަންޏަށް ފައިސާ ނަގަން ވާނީ ކޮންމެހެން ކުރަން ޖެހޭ ކަމެއް ކުރުމަށް ކަމަށާއި އެއަށް ފަހު އެ ފައިސާ ވީ އެންމެ އަވަހަކަށް އަނބުރާ ރައްދު ކުރަން ވާނެ ކަމަށް ހުތުބާގައި ބުންޏެވެ.
"ތިމާއަށް ލިބޭ އެއްޗަކުން ދިރިއުޅުމުގެ ހަރަދުތައް ފޫނުބެދޭނަމަ، ކޮންމެހެން ބޭނުންވެއްޖެ ހާލަތެއްގައި، ތިމާގެ ބޭނުންތައް ފުއްދުމަށްޓަކައި ދަރަންޏަށް ފައިސާ ނެގުމަކީ ހުއްދަ ކަމެއް. އެހެންނަމަވެސް ދަރަނި އަދާ ކުރަން އަވަސްވެގަންނަން ޖެހޭ،" ހުތުބާގައި ބުންޏެވެ.
މީގެ އިތުރުން ހުތުބާގައި ވަނީ ދަރަނި ނުދައްކާ މަރުވުމުން، ދަރަނި ދެއްކެންދެން އެމީހެއްގެ ފުރާނަ އޮންނާނީ އެލުވިފައިކަން ހަނދާންކޮށްދީފައިއެވެ.
އެ ހުތުބާގައި ވަނީ އިސްރާފު ކުރުމުގެ ނުބައިކަންވެސް ބަޔާންކޮށްދީފައިއެވެ.
އެގޮތުން، އިންސާނުންނަށް ދެއްވާފައިވާ ނިއުމަތްތަކުގެ ތެރޭގައި މުދަލާއި ފައިސާ ހިމެނޭއިރު، އެ ތަކެތި އިސްރާފު ނުކޮށް، މާތް ﷲ އެންގެވި ގޮތަށް ހޭދަ ކުރުމަށް ހުތުބާގައި ގޮވާލިއެވެ.
"މުދާ ހޭދަ ކުރުމުގައި އިސްރާފު ކުރުމަކީ މާތް ﷲ ނަހީ ކުރައްވާފައިވާ ކަމެއް. އިސްރާފުު ކުރުމަކީ ހަރާމް ކަންތައްތަކަށާއި، ވިޔާނުދާ ކަންތައްތަކަށް ބޭކާރު ގޮތުގައި މުދާ ހޭދަ ކުރުން. އަދި ހުއްދަ ވެގެންވާ ރަނގަޅު ކަންތައްތަކުގައި ވެސް ތިމާގެ އާމްދަނީ އާއި ލިބޭ މިންވަރާ އެކަށީގެން ނުވާ ވަރަށް ހަރަދު ކުރުމަކީ އިސްރާފު ކުރުން،" ހުތުބާގައިވެއެވެ.
ހަމައެއާއެކު ހުތުބާގައި ވަނީ އިިގުތިސާދު ކުރުމާ ބެހޭ ގޮތުން މީހުން ހޭލުންތެރިކުރުވައި، ޒުވާނުންނަށް އެކަމުގެ ތަރުބިއްޔަތު ދޭން ޖެހޭ ކަމަށް ބުނެފައިއެވެ.