22 Sep 2021, 09:29
"އެކްސް ކިއުޒް މީ..." ޝިޒާން އައިސް އެ އެންމެންގެ ކައިރިއަށް ހުއްޓިލިއެވެ.
"ޔެސް..." މިންހާ ޝިޒާންއަށް ބަލައިލިއެވެ. އޭރު ޔޫލިންމެން ވެސް އެ ޒުވާނާއަށް ބަލަހައްޓައިގެން ތިއްބެވެ. ކައިރިން ފެނުމުން އަދި މާރީތިކަމަށް ދައްކައެވެ.
"މިތާ ކައިރީ ހޮޓެލެއް ނޫނީ ރެސްޓޯރެންޓެއް ކަހަލަ ތަނެއް ހުންނާނެތަ؟" ޝިޒާން ސުވާލުކޮށްލަމުން ފަހަރަކު މީހަކަށް ބަލައިލިއެވެ.
"ހުންނާނެ..." އެހެން ބުނެލުމަށްފަހު، ރައިހާން ރެސްޓޯރެންޓް ހުންނަތަން ޝިޒާންއަށް ކިޔައިދިނެވެ. ރައިހާން ޝިޒާންއަށް ހިނިތުންވުމެއް ހަދިޔާކޮށްލިއެވެ.
"ބައިދަވޭ އައި އެމް ޝިޒާން..." ޝިޒާން އަމިއްލައަށް ތަޢާރަފްވެލިއެވެ.
"ރައިހާން... ދެން މީ އައިހަމް... ދެން އަހަރެންގެ ކޮއްކޮ ޔޫލިން..." ރައިހާން ފަހަރަކު މީހަކު ތަޢާރަފް ކޮށްދިނެވެ.
"ކިޔައިދިނީމަ ދާން އިނގޭނެތަ؟" ރައިހާން އަނެއްކާވެސް ސުވާލުކޮށްލިއެވެ.
"ނުކުމެ ކުޑަކޮށް ހިނގައިލީމަ ފަހަރެއްގައި ފެނިދާނެއެއްނު!" ޝިޒާން ހިނިތުންވެލިއެވެ.
"އިފް ޔޫ ވޯންޓް އަހަރެމެން ގޮސްފާނަން އެކުގައި... ދޯ!" ރައިހާން އައިހަމްއަށް ދޯ ދެމުން ބުނެލިއެވެ.
"ނޫނޭ..."
"އަހަރެމެންނަށް އުނދަގުލެއް ނުވާނެޔޭ ދޯ އައިހަމް." ރައިހާން އަނެއްކާވެސް އައިހަމްއަށް ބަލައިލިއެވެ.
"ޔެސް މޭން... އުނދަގުލެއް ނުވާނެ!" އައިހަމް ވެސް ޖޯލިން ތެދުވެލިއެވެ. ޝިޒާން އެ ދެމީހުންނަށް ޝުކުރު އަދާކުރިއެވެ. ތިން މީހުން އެކުގައި ބޭރަށް ނިކުންނަށް ހިނގައިގަތެވެ. ދަމުންދަމުން ވެސް އަދި އެއްފަހަރު ޝިޒާން މިންހާއަށް ބަލައިލިއެވެ. މިންހާ ވެސް އޭރު ހުރީ ޝިޒާންއަށް ބަލަހައްޓައިގެންނެވެ.
"އޭތް... ހާދަ ވަރަކަށް އޭނަ މިންނުއަށް އެބަލަނީ..." ޔޫލިން މިންހާގެ ކޮނޑުގައި އޭނާގެ ކޮނޑުން ޖަހައިލިއެވެ. މިންހާ ދެފަރާތަށް ބޯ ހޫރައިލިއެވެ. މިންހާގެ ފޯނު އަނެއްކާވެސް ރިންގްވީ އެވަގުތެވެ. ގުޅަނީ ބައްޕައެވެ. އޭނާ ހީކުރީ އޭނާގެ ގާތުގައި މަޑުކުރަން ބުނުމަށްފަހު، ބައްޕަ އަނެއްކާ ކަމެއް ބޭނުންވެގެން ގުޅަނީ ކަމުގައެވެ. ޔޫލިންއަށް ބަލައިލުމަށްފަހު، މިންހާ ފޯނު ނަގާ ކަންފަތުގައި ޖައްސައިލިއެވެ.
"ހަލޯ ކީކޭ ބައްޕާ!" މިންހާ އަހައިލިއެވެ.
"ދަރިފުޅާ! ޝިޒާންއަށް މެންދުރުގެ ކެއުން ތައްޔާރުކޮށްލަދެއްޗޭ... އެހެން ބުނަން ވެގެން މި ގުޅައިލީ. " ހަނީފް ބުނެލިއެވެ.
"ދެންމެ ރެސްޓޯރެންޓަކަށޭ ކިޔާފައި ގޮސްފި. ހީވަނީ ކާންހެން އެދިޔައީ..." މިންހާ ބުނެލިއެވެ. އެއާއެކު ހަނީފް އެންމެ ރަނގަޅުކަމުގައި ބުނެ ފޯނު ބޭއްވިއެވެ.
"އޭތް. ކީކޯ ބައްޕަ ބުނީ؟ އެސޮރަށް ކާން ހަދާށޭތަ؟" ދިމާކުރާ ފާޑަކަށް ޔޫލިން މިންހާއާ ދިމާލަށް ބުނެލިއެވެ. މިންހާ ޔޫލިންއަށް ބަލައިލަމުން އޭނާގެ ތުންކޮޅު އޫކޮށްލިއެވެ. ޔޫލިންއަށް އެކަން މަޖާވިއެވެ. އޭނާ އިތުރަށް މިންހާއާ ދިމާކުރަން ފެށިއެވެ.
"އަސްލުވެސް އޭނަ ހާދަ ހޮޓޭ... ކިހާ ފިރިހެންވަންތަ؟ އޭނަ ދިވެހިން ވާހަކަ ދެއްކިޔަސް ދިވެއްސެއް ހެނެއް ހިޔެއް ނުވޭ..." ޔޫލިން ބުނަމުންދިޔައެވެ.
"މަށަށް ފެންނަނީ އައިހަމް މަތިން ހަނދާންނައްތައިލާފައި ލީން އޭނައާ ހެދި އުޅެން. ކިހިނެއް އެނގެނީ ހަމަ ސެޓް ވެދާނެއެއްނު." މިންހާވެސް ދޫދޭކަށް ބޭނުމެއް ނުވިއެވެ. އޭނާވެސް ޔޫލިންއާ ދިމާކޮށްލިއެވެ.
"ވެދާނެ ހަަމަ މީހެއްގެ ފިރިއެއްކަމަށްވެސް. އެހާ ހޭންޑްސަމް މީހަކު ސިންގަލް ވެދާނެތަ؟" ޔޫލިން ބުނެލިއެވެ. މިންހާއަށް ވެސް ވިސްނައިލެވުނެވެ. ޔޫލިން އެބުނީވެސް ތެދެކެވެ. ޝިޒާން ކިތަންމެ ހާވެސް ފިރިހެންވަންތައެވެ. ޝިޒާންގެ އެންމެ ހަރަކާތަކަށްވެސް ފިދާވާ ކުދިން ބައިވަރުވާނެއެވެ. އެ ފިރިހެންވަންތަކަން އަންހެން ކުދިންގެ ހިތްތައް ދީވާނާ ކުރުވާނެއެވެ. ޝިޒާން ބޭނުންވެއްޖެ ކޮންމެ ހިނދެއްގައި އަންހެން ކުދިން ތިބޭނީ އޭނާގެ މުށުތެރޭގައެވެ. ވީއިރު އެހާ ސްމާރްޓްމީހަކު ހުހަށް ހުރެދާނެހެއްޔެވެ؟ ޝިޒާން އަނެއްކާ ހަޤީގަތުގައި ވެސް ޔޫލިން ބުނިހެން އުޅޭނީ މީހަކާ އިނދެގެންހެއްޔެވެ؟ ނޫނީ އޭނާގެ ދަރިއަކުވެސް ހުރެދާނެހެއްޔެވެ؟ ހިތުގައި އުފެދެނު އެތަކެއް ސުވާލެއްގެ ތެރެއިންވެސް މިންހާއަށް އެންމެ ބޮޑަށް އުނދަގޫ ކުރާ ސުވާލަކީ ޝިޒާންއާ ބައްޕައާ އޮތީ ކޮން ގުޅުމެއްތޯއެވެ.
"އޭތް ކޮން ޚިޔާލަކަށް ގެއްލިތަފަ މިހާރު ތި އިންނަނީ؟" ޔޫލިން މިންހާގެ މޫނާ ދިމާލަށް އަތް ހޫރާލީ އޭނާ ދެފަހަރަކު ގޮވައިލުމުންވެސް މިންހާއަށް އަޑު ނީވުމުންނެވެ. މިންހާ އަވަސް އަވަހަށް ދެފަރާތަށް ބޯ ހޫރައިލިއެވެ.
"ބުނެބަލަ! އަނެއްކާ އެ ޒުވާނާގެ ޚިޔާލުގަތަ؟" ޔޫލިން ލާނެއްގޮތަކަށް ވާހަަކަ ދެއްކިއެވެ.
"ލީންއަށް އެނގެއެއްނު އަހަރެން އާހިލްއާ އެކު ނުލާހިކު ސީރިއަސް ރިލޭޝަންއެއްގަކަން މިއުޅެނީ... އެހެންވީމަ އަހަރެން އެފަދަ ގޮތަކަށް އެހެން މީހަކާ ދޭތެރޭ ނުދެކޭނެކަން ވެސް. އަހަރެން އާހިލް ދެކެ ލޯބިވާވަރު ލީންއަށް އެނގެއެއްނު." މިންހާ ބުނެލިއެވެ. އާހިލް މަތިން ހަނދާންވުމުން ރޭގެ ފަހުން އާހިލް ނުގުޅާކަންވެސް މިންހާގެ ހަނދާނަށް އައެވެ.
"އޯކޭ ލީން... އަހަރެން ދެން ގޮސްލަނީ ނިދާލަން. ނިދި އަންނަން ފަށައިފި." އާފުރިލަމުން މިންހާ ޖޯލިން ތެދުވިއެވެ. ޔޫލިން ވެސް އޭނާގެ ގެއާ ދިމާލަށް ހިނގައިގަތެވެ. ގޭތެރެއަށް ވަނުމަށްފަހު، މިންހާ އާހިލްއަށް ގުޅައިލިއެވެ. އާހިލް ފޯނެއް ނުނަގައެވެ. އަނެއްކާވެސް މިންހާ ގުޅައިލިއެވެ. މިފަހަރުވެސް އާހިލް ފޯނެއް ނުނަގައެވެ. އާހިލް ބިޒީއޭ ހިތާ އޭނާވެސް ކޮޓަރިއަށް ވަދެ ހެދުން ބަދަލުކޮށްގެން އެނދުގައި ޖައްސައިލިއެވެ. ވަރުބަލިކަން އޭނާއަށް އިޙްސާސްވީ ދެނެވެ. އެސްފިޔަތައް ބަރުވެ އޭނާގެ ދެލޯ މެރުނެވެ. މާގިނަ އިރެއްނުވެ އޭނާ ނިދީގެ ފޮނި އާލަމަށް ގެނބުނެވެ.
***
ރައިހާންމެންނާއެކު ރެސްޓޯރެންޓަށް ގޮސް ކައިގެން ޝިޒާން ނުކުތްއިރު، ތިން މީހުންގެ ދެމެދުގައ އެކުވެރިކަން ވަނީ ބަދަހިވެފައެވެ. ރައިހާން އޭނާއާއި އައިހަމްއާ ދިމާވި ގޮތްވެސް ޝިޒާންއަށް ކިޔައިދިނެވެ. އެއީ އޭނާ ރިސޯޓްގައި އުޅުނުއިރެވެ. އޭރުއްސުރެ އައިހަމްއާ އޭނާއާ ދެމެދު ވަނީ ވަރުގަދަ އެކުވެރިކަމެއް އުފެދިފައެވެ. އައިހަމް ރިސޯޓް ވަޒީފާ ދޫކޮށްލުމަށްފަހު، މާލެ ބަދަލުވެ ފުލުހުންގެ އިދާރާއާ ގުޅުނު ހިސާބުންވެސް އެ ގުޅުން ދިޔައީ ކުރިފަޅާ ހެދެމުންނެވެ.
"ޝިޒާން އަސްލު މާލެތަ؟" ދެކެވެމުންދިޔަ ވާހަކައެއްގެ ތެރެއިން އެ ސުވާލު ޝިޒާންއާ ކޮށްލީ ރައިހާންއެވެ.
"އާނ." ޝިޒާން ކުރު ޖަވާބެއް ދިނެވެ. ތިން މީހުން ހިނގާލާފައި ގެއާ ދިމާލަށް ދިޔައިރުވެސް އެހާ އަވި ގަދައެވެ. ގެއާ ހިސާބަށް އާދެވުމުން އައިހަމްއާ ޝިޒާންއާ ދެމީހުން ވެސް ވަރުބަލި ފިލުވާލާށޭ ކިޔާފައި ކޮޓަރިއަށް ދާން މިސްރާބުޖެހުމުން ރައިހާންވެސް އޭނާގެ ގެއާ ދިމާލަށް ހިނގައިގަތެވެ. އޭނާ ގެއަށް ވަތްއިރު، ޔޫލިން ބަދިގެއާ ދިމާލުގައި ބަހައްޓާފައި ހުރި ޖޯލީގައި ފޯނާ ކުޅެން އޮތެވެ. އޭނާގެ ހުރިހާ ސަމާލުކަމެއް އޮތީ ފޯނަށް ހުއްޓިފައެވެ. ރައިހާންގެ ލޮލުގައި އެންމެ ބޮޑަށް އަޅައިގަތީ ޔޫލިންގެ ތުންފަތް މަތީގައި ދެވެލަދުވެލާ ހުރި ހިނިތުންވުމެވެ. އޭނާ ބޯ ދިއްކޮށްލާފައި ޔޫލިންގެ ފޯނާ ދިމާލަށް ގުދުވެލީ، ޔޫލިންއަށް އޭނަ ގޮވައިލުމުންވެސް ޚަބަރެއް ނުވުމުންނެވެ. އޭނާއާ ދިމާލަށް ރައިހާން ގުދުވެލިތަން ފެނި ސިހުނު ޔޫލިން އޭނާގެ ފޯނު އަވަސްއަވަހަށް އަނބުރައިލިއެވެ. ރައިހާން ޝައްކުގެ ނަޒަރަކުން ޔޫލިންއަށް ބަލައިލިއެވެ. ރައިހާންގެ އެ ނަޒަރުން ޔޫލިންގެ ހިތަށް ކޮންމެވެސް ވަރަކަށް ފިނިވެލިއެވެ. އޭނާ ފޯނުގެ ސްކްރީން ނިއްވައިލިއެވެ.
"ތިހެން އަންހެން ކުދިންގެ ފޯނަށް ބަލާކަށް ނުވާނެ!" ޔޫލިން ދެލޯ އަޅައިލިއެވެ.
"އެކަމެއް ނޭނގެ. ގޮވަ ގޮވާވެސް އަޅާނުލިވިއްޔަ. ކާކުގެ ފޮޓޯއަކަށްތަ އެވަރަކަށް ގެއްލިފަ ތިއޮތީ... " ރައިހާން އެހެން ބުނެލުމުން ޔޫލިން ފާޑަކަށް ރައިހާންއަށް ބަލައިލިއެވެ.
"އެހެންވީމަ މީހެއްގެ ފޮޓޯއަށް ބަލަން އޮއްވާ ދޯ މި އުނދަގޫ ކުރެވެނީ." ރައިހާންއަށް މަޖާވިއެވެ. ޔޫލިން ވައްކަން ކުރަން އުޅެނިކޮށް ފަޅާއެރިކަހަލައެވެ. އޭނާގެ މޭގެ ތެޅުން އޭރުވެސް ހަމައަކަށް ނޭޅެއެވެ. ރައިހާންއަށް ފަޅާ އަރާފާނެތީ އޭނާވަނީ އިންތިހާ ކަންބޮޑުވެފައެވެ. ޔޫލިންގެ މޫނުން ފެނުނު އަސަރުތަކުން އޭނާ އިތުރަށް ހާސްކޮށްލުމުގެ ބޭނުމުގައި، ރައިހާން ކުއްލިއަކަށް ޔޫލިންގެ އަތުން ފޯނު ޖަހައިގަތެވެ. އެއާއެކު ޔޫލިން ފުންމައިގެން ޖޯލިން ތެދުވިއެވެ. ރައިހާން ފޯނު މައްޗަށް އުފުއްލައިލުމުން ޔޫލިން ކޮރައިލިނަމަވެސް، ރައިހާން ދިގުކަމުން އޭނާއަށް ފޯނުގައި އަތް ޖެހޭގޮތެއް ނުވިއެވެ. އޭނާ ރައިހާންއަށް ލޯ އަޅައިލަމުން މަސައްކަތްކުރަމުންދިޔައީ ފޯނު އަތުލެވޭތޯއެވެ.
"ހިނގާބަލަ ތި ބަލާ ފޮޓޯއެއް ބަލައިލަން..." ރައިހާން ބުނެލިއެވެ.
"ދޮންބޭ! ގެނޭ ފޯނު. މަންމާ!..." ޔޫލިން ހަޅޭއްލަވައިގަތެވެ.
"ޖަސްޓް ޗިލް ސިސް. އަހަންނަށް މީގެ ކޯޑެއް ނޭނގެޔޭ..." ހެމުންހެމުން ރައިހާން ޔޫލިން އަތަށް ފޯނު ދިނެވެ. ޔޫލިން ރައިހާންގެ ބުރަކަށީގައި ބޮނޑިއެއް އެޅިއެވެ.
"ކިހިނެއްވެގެން މިއުޅެނީ؟." ޔޫލިން ހަޅޭއްލަވައިގަތް އަޑަށް ގޭތެރޭގައި ޓީވީ ބަލަން އިން ސަކީނާވެސް ނުކުތީ ހާސްވެފައެވެ. އޭނާ ވީ ގޮތާ ބެހޭގޮތުން ސުވާލުކުރުމުން، ރައިހާން ހެމުން ހެމުން ވީގޮތް ކިޔައިދިނެވެ.
"ކިރިޔާއޭ ބިރުން ހަލާކުނުވީ.. ސަކީނާ ބުނެލިއެވެ.
"އެހެންނު ވާނީ ލީން ހީވަނީ ވައްކަމެއް ކުރަން އުޅެނިކޮށް ފަޅާއަރައިގެން އުޅޭހެން ވިއްޔަ..." ރައިހާން އަދިވެސް ހެނީއެވެ.
ސަކީނާ ދެފަރާތަށް ބޯ ހޫރައިލަމުން އަނެއްކާވެސް ގޭތެރެއަށް ވަނެވެ. ރައިހާން ވެސް ގެއަށް ވަންނަން ހިނގައިގަތެވެ. ވަކި ހިސާބަކުން މަޑުޖެހިލަމުން އޭނާ ޔޫލިންއަށް ބަލައިލިއެވެ. އެއަށްފަހު ފަޚުރުވެރި ހިނިތުންވުމެއް ޔޫލިންއަށް ހަދިޔާކޮށްލުމަށްފަހު، އޭނާ ގޮސް ގޭތެރެއަށް ވަނެވެ.
ހިތުގެ ހިނގުން ހަމައަކަށް އަޅުވަމުން ޔޫލިން އަނެއްކާވެސް ޖޯލީގައި އޮށޯވެ، އޭނާ ބަލަމުންދިޔަ ފޮޓޯއަށް ނަޒަރު ހުއްޓައިލިއެވެ. އެއީ މިންހާ ނަގާފައިވާ އޭނާއާއި އައިހަމްގެ ފޮޓޯގަނޑެވެ. އެ ފޮޓޯގަނޑަށް އޭނާއަށް އެވަރަށް ބެލޭތީ ޔޫލިން ހައިރާންވެސް ވެއެވެ. އެހިތުގައި އައިހަމްއަށް ޓަަކައި އޮތް ލޯބި ފާޅުކުރަން ކިތަންމެ ބޭނުންވިޔަސް އައިހަމް އަކީ އެހެން މީހެއްގެ ހައްޤެއްކަމަށް އޭނާ އަމިއްލަ ހިތަށް ވިސްނައިދެމުން ދިޔައެވެ. އެހެން ހިތަށް އެރުމާއެކު، ޔޫލިން އެ ފޮޓޯގަނޑު ޑިލީޓްކޮށްލަން ވެސް އުޅުނެވެ. އެހެންނަމަވެސް ދެވަނަ ސިކުންތުގައި ކެންސަލް ކޮށްލަމުން އޭނާ ފުންނޭވާއެއް ދޫކޮށްލިއެވެ.
*****
ރޭގަނޑުގެ ވަގުތެވެ. މިންހާ ލޯގަނޑު ކުރިމަތީގައި ހުރެ ރީތިވަމުންވދިޔައީ ސިއްޚީ މަރުކަޒަށް ދިޔުމުގެ ބޭނުމުގައެވެ. އޭނާ ރީތިވެ ނިމުނުތަނާ ބޮޑުދައިތަ ޒުބައިދާ ގުޅައިފިއެވެ.
"އާ! މިހާރު ދާން މި ނުކުންނަނީ..." ޒުބައިދާ ބުނީ އޭނާ ކުޑަކަމަކު ގެއަށް ދަނީކަމުގައެވެ. އަވަހަށް އައުމަށް ބުނެ އޭނާ ފޯނު ބޭއްވުމުން، މިންހާވެސް އަވަސް އަރުވާލައިގެން ކޮޓަރިން ނުކުތެވެ. ކާގެއަށް އޭނާ ވަނީ ފެންފޮދެއް ބޮއިލުމުގެ ބޭނުމުގައެވެ. ބަދިގޭގެ ކުޑަ ދޮރުތައް ނުލައްޕާ ހުރުމުން، އޭނާ އެ ދޮރުތައް ލައްޕައިލަން އުޅުނު ވަގުތު ޝިޒާން ކޮޓަރިން ނުކުތްތަން ލޮލުގައި އަޅައިގަތެވެ. އިރުކޮޅަކު އޭނާ ޝިޒާންގެ ހަރަކާތްތަކަށް ބަލަން ހުއްޓެވެ. އެހެން ހުރެފައި އޭނާ ކުޑަ ދޮރުތައް ލައްޕައިލިއެވެ. އެއަށްފަހު، އޭނާ ނުކުމެލިއެވެ. ދޮރުން ބޭރަށް ބޯ ދިއްކޮށްލާ ބަލައިލިއިރު ޝިޒާން ފެންނާކަށް ނެތެވެ. ޝިޒާން މިގަޑީގައި ދާނީ ކޮންތާކަށް ހެއްޔެވެ؟ ޝިޒާންގެ އެކުވެރިންވެސް މިރަށުގައި ތިބޭ ހެއްޔެވެ؟ ނޫނެކެވެ. އެކުވެރިން ތިބޭނަމަ މިއަދު ރައިހާންމެންގެ އެހީ އޭނަ ނުހޯދީހެވެ.
މިންހާ ގެއިން ނުކުމެގެން ސިއްޚީ މަރުކަޒާ ދިމާލަށް ހިނގައިގަތްތަނާ، އޭނާގެ ފިޔަވަޅުތަކަށް މަޑުޖެހުމެއް އައީ އޭނާގެ ނަމުން މީހަކު ގޮވައިލުމާއެކުގައެވެ. މިންހާ ފަސް އެނބުރި ބަލައިލިއެވެ. އޭރު އޭނާގެ ފަހަތުގައި ހުރީ ޝިޒާންއެވެ. އެތަނުގައި ދިއްލާފައިހުރި ހުދު ހޮޅުބުރީގެ ސަބަބުން މުޅި ސަރަހައްދަށް އަލިކަން ފެތުރިފައިވެއެވެ. ފެންވަރާ ތާޒާވެލައިގެން ހުރި ޝިޒާން އައިސް މިންހާއާ ގާތުގައި ހުއްޓިލުމުން ޝިޒާން ޖަހާފައި ހުރި ސެންޓްގެ މީރުވެސް މުޅި އެ ހިސާބުގައި ހިފާލިއެވެ. ބޭއިޚްތިޔާރުގައި މިންހާއަށް ނޭފަތް އެތެރެއަށް ދަމައިލެވުނެވެ. ހާދަ ހިތްގައިމު ވަހެކެވެ. މިންހާއަށް ޝިޒާންގެ އެ ހިތްގައިމު ސޫރަ ފާހަގަ ކުރެވުނެވެ. ލާފައިހުރި ފެހިކުލައިގެ ގަމީސް އޭނާގެ ގަޔަށް ހިފާލާފައިހުރިއިރު، އަތްދިގު ގަމީގެ އަތުކުރި އޮޅަބުއްޓާ ހިސާބަށް އޮޅާލާފައިވުމުން، އެ ބާރުގަދަ މުލައްދަނޑި އޮތީ ހާމައަށެވެ. އަރާފައިވަނީ ސްނިކާ ބޫޓަކަށެވެ. މިންހާ ޝިޒާންއަށް ނޭނގޭ ގޮތަށް ޝިޒާންގެ ބޮލުން ފެށިގެން ފަޔަށް ނަޒަރު ހުއްޓައިލިއެވެ.
ޝިޒާންވެސް މިންހާއަށް ފުން ނަޒަރެއް ދިނެވެ. ހުދުކުލައިގެ ސްކިނީ ޖީންސެއްގައި ހުރިއިރު، މިންހާ ލާފައި ހުރި ނޫކުލައިގެ ގަމީސް މަތިކޮޅުގެ ސަބަބުން އެ ހަށިގަނޑުގެ ބައްޓަން ރީތިކޮށް ފާޅުވެއެވެ. ކޮޕާ ބްލޮންޑްކުލައިގެ އިސްތަށިގަނޑު ދޫކޮށްލާފައި އޮތުމުން، އެ ގަޑީގައި ޖެހެމުންދިޔަ ލުއިލުއި ވައިރޯޅިތައް އެ އިސްތަށިގަނޑާ ސަމާސާ ކުރަމުންދިޔައެވެ. އެއްވެސް ކަހަލަ މޭކަޕެއް ކޮށްފައިނުވާއިރު ވެސް އެހާ ރީއްޗެވެ.
"ކަމެއް ބޭނުންވީތަ؟" މިންހާ ސުވާލުކޮށްލިއެވެ.
"ނޫނޭ!. އަހަރެންވެސް މިދަނީ މިންހާ ބައްޕަ ކައިރިއަށް ދާންވެގެން..." ޝިޒާން ހިނިތުންވެލިއެވެ. ވާހަކަ ދައްކާއިރު އެ ހުންނަ މަޑުމައިތިރި ކަމާއި ސާދާކަން މިންހާއަށް ފާހަގަކުރެވެއެވެ. އަބަދުވެސް އެ މޫނުމަތިން ފެންނަނީ ތާޒާކަމާއި ހިތްހަމަޖެހުމެވެ.
"އަހަރެން ވެސް މިދަނީ ރަށު މަރުކަޒާ ދިމާލަށް ދާން! ދާން އިނގޭނެތަ؟" މިންހާ ސުވާލުކޮށްލިއެވެ.
"ނޫނޭ... މިންހާ ދާއިރު އަހަރެންވެސް މިންހާ ފަހަތުން ދާނީ... މި ނިކުތީ ދާން އިނގޭތޯ ބަލައިލަން، އެކަމަކު ދާނެ ކޮޅު އޮޅިފަ ހުއްޓާ މިންހާ މި ފެނުނީ... ދެ ތިން ފަހަރަކު ދަނިކޮށް އެނގިދާނެ، މަގުތައް ދަސްކުރަން އަހަންނަކަށް މާކަ އުނދަގުލެއް ނުވާނެ!" ތެދުވެރިކަމާއެކު ޝިޒާން ވާހަކަ ދެއްކިއެވެ. އެ އަޑުން މިންހާއަށް ވެސް ތެދުވެރިކަން އިޙްސާސް ކުރެވުނެވެ.
މިންހާ ހިނިތުންވެލުމުން ޝިޒާންވެސް މިންހާއާ ދާދި އެއްވަރެއްގައި ހުރެގެން ހިނގަމުންދިޔައެވެ. ދެމެދުގައި މާގިނަ ވާހަކައެއް ނުދެކެވެއެވެ. އެހެން ހުރެލާފައި ޝިޒާން އެއްޗެކޭ ބުނެލައެވެ. އެއިން ކޮންމެ ފަހަރަކުވެސް މިންހާ ޖަވާބުދިނުން ފިޔަވާ އިތުރު އެއްޗެއް ނުބުނެއެވެ. މިންހާގެ ހިތުގައި އުތުރިއަރަމުންދިޔަ ސުވާލުތައް ކިތަންމެ ހާވެސް ބައިވަރެވެ. އެހެންނަަމަވެސް އެ ހުރިހާ ސުވާލެއް ކުރާނެހާ ހިތްވަރެއް އޭނާގެ ނެތެވެ. އެތައް އިރަކު ވިސްނުމަށްފަހު، އެންމެ ފަހުން އޭނާ ހިތުގައި އުފެދެމުން ދިޔަ ސުވާލެއް ޝިޒާން އާ ކުރަން ނިންމީ ލަދަކާ ހުރެ ތަދެއް ނުފިލާނެތީއެވެ.
"ޝިޒާން ދޯ..." ވާހަކަ ފަށާނެގޮތެއް ނޭނގި މިންހާއަށް ބުނެވުނެވެ.
"އާނ. އަހަރެންގެ ނަން ހަނދާންނެތުނީތަ؟" ޝިޒާން ހިނިތުންވެލިއެވެ.
"ނޫނޭ އެހެންނެއް ނޫން!" މިންހާ ބުނެލިއެވެ. އޭނާ ވަޔާ ގޯނާކުރަމުންދިޔަ، އިސްތަށިގަނޑު ކަންފަތް ދޮށައްް ލައްވައިލިއެވެ. މިންހާއަށް ސުވާލުކުރަން ފަސްޖެހެވުނެވެ. އޭނާ ތުންފަތުގައި ދަތް އަޅައިލިއެވެ. ހިނގަމުންދިޔަ މިންހާއަށް އެތަނުގައި އޮތް ގާބުރިއަކަށް އެރިފައި އަރިއަޅައިލާގޮތްވިއެވެ. އެމަންޒަރު ފެނުނު ޝިޒާން ހުޝިއާރުކަމާއެކު، މިންހާގެ އުނަގަނޑުގައި ހިފައްޓާ މިންހާ ސީދާކޮށްލިއެވެ. އެއަށްފަހު އޭނާ ދެޖީބަށް އަތްޖަހައިލިއެވެ.
ހިތުގެތެޅުން ބާރުވެފައިވީ މިންހާއަށް މޭގައި އަތް އަޅައިލެވުނެވެ. އޭނާއަށް ބަލައިލެވިނީ ޝިޒާންއަށެވެ. ހިސާބަކަށް އޭނާ ލަދުގަންނަ ގޮތްވިއެވެ. އޭނާ ފައިން އެރުނު ގާކޮޅަށް ބަލައިލަމުން ފައިން އޭތި މަގުގެ އެއްފަރާތަކަށް ޖައްސައިލިއެވެ. އަނެއްކާވެސް އޭނާ ބަލައިލީ ޝިޒާންއަށެވެ. އޭރުވެސް ޖީބަށް އަތް ޖަހައިިލިގޮތަށް ޝިޒާން އޭނާއަށް ބަލަހައްޓައިގެން ހުއްޓެވެ.
"ސޮރީ..." މިންހާއަށް ބުނެވުނެވެ.
"ކޮންކަމަކަށް ސޮރީ؟" ޝިޒާން ހިނިތުންވެލިއެވެ.
"އައި މީން ތޭންކްސް..."ނިތުގައި އަތް ޖައްސައިލަމުން މިންހާ ބުނެލިއެވެ.
"ޔޫ އާ މޯސްޓް ވެލްކަމް..." ޝިޒާން ބުނެލިއެވެ.
"ސޯ.... ޝިޒާންއަށް ކިހިނެއް އަހަރެންގެ ބައްޕަ އެނގެނީ؟" މިންހާ ހިތްވަރުކޮށްފައި، އެ ސުވާލު ޝިޒާންއާ ކޮށްލިއެވެ. މިންހާ ފިޔަވަޅުތައް މަޑުޖައްސައިލުމާއެކު، ޝިޒާންވެސް މަޑުޖެހިލިއެވެ. އޭނާ މިންހާއަށް ބަލައިލިއިރު، މިންހާގެ ދެލޮލުން އޭނާއަށް ފެނުނީ ޝައުޤުވެރިކަމެވެ.
(ނުނިމޭ)