12 Sep 2021, 08:49
އިޓާލިއަން ސެރިއާގައި ޔުވެންޓަސް ބަލިކޮށް ނަޕޯލީއިން ލީގު ތާވަލުގެ އެއްވަނަ މަގާމަށް ޖެހިލައިފި އެވެ. ކްރިސްޓިއާނޯ ރޮނާލްޑޯ ޔުވެންޓަސް ދޫކޮށް މެންޗެސްޓާ ޔުނައިޓެޑަށް ބަދަލުވި ފަހުން ކުޅުނު ފުރަތަމަ މެޗުން ޔުވެންޓަސް ބަލިވީ 2-1 އިންނެވެ.
ރަށުން ބޭރުގައި ކުޅުނު މެޗުގެ ފުރަތަމަ ލަނޑު ޖެހީ ޔުވެންޓަސްއިންނެވެ. މެޗުގެ 10 ވަނަ މިނިޓުގައި މިލަނޑު ކާމިޔާބުކޮށްދިނީ އެޓީމުގެ ސްޕެއިން ފޯވާޑް އަލްވާރޯ މޮރާޓާ އެވެ.
މެޗުގެ ފުރަތަމަ ހާފާ ހިލާފަށް ދެވަނަ ހާފުގެ ކުޅުން ނަޕޯލީއިން ފެށީ ވަރުގަދަ ކޮށްނެވެ. ގިނަ ވަގުތު ބޯޅަ ހިފައްޓައިގެން ޔުވެންޓަސްގެ ގޯލަށް ނުރައްކާ ކުރަން ފެށި އެވެ. ނަތީޖާއެއްގެ ގޮތުން 57 ވަނަ މިނިޓުގައި ވިންގާ މަޓޭއޯ ޕޮލިޓާނޯ މެޗުގެ ނަތީޖާ އެއްވަރުކޮށްލި އެވެ.
މެޗުގެ ތިން ޕޮއިންޓު ނަޕޯލީއަށް ކަށަވަރުކޮށްދިނީ 85 ވަނަ މިނިޓުގައި ޑިފެންޑަރު ކަލިދޫ ކުލިބާލީ ޖެހި ލަނޑާއެކު މެޗުގެ ނަތީޖާ 2-1 ބަދަލުކޮށްގެންނެވެ.
މެޗުން ލިބުނި ތިން ޕޮއިންޓާއެކު ނަޕޯލީ މިހާރު ވަނީ ސެރިއާ ތާވަލުގެ އެއްވަނަ މަގާމަށް ޖެހިލާފަ އެވެ. ކުޅުނު ތިން މެޗުން ނަޕޯލީ ވަނީ ނުވަ ޕޮއިންޓު ހަމަކޮށްފަ އެވެ.
ޔުވެންޓަސް އޮތީ ލީގު ތާވަލުގެ 14 ވަނަ މަގާމުގަ އެވެ. ލީގުގައި ތިން މެޗު ކުޅެގެން އެޓީމަށް ލިބިފައިވަނީ އެންމެ ޕޮއިންޓެކެވެ. އެއީ އުދިނޭސީ އާ 2-2 އެއްވަރުކޮށްގެން ލިބުނު ޕޮއިންޓެކެވެ.