01 Sep 2021, 22:35
ނިމިދިޔަ ޓްރާންސްފާ ބާޒާރުގައި އިނގިރޭސި ޕްރިމިއާ ލީގުގެ އެންމެ ބޮޑު ހަރަދު ކުރި ޓީމަށް އާސެނަލް ވެއްޖެއެވެ. އާސެނަލް ވަނީ ޓްރާންސްފާ ބާޒާރުގެ ފަހު ދުވަހު ޖަޕާނުގެ ޑިފެންޑަރު ޓަކަހީރޯ ޓޮމިޔަސު ސޮއިކޮށްފައެވެ.
މިއަހަރުގެ ސީޒަނަށް ޓީމު ވަރުގަދަ ކުރުމުގެ ގޮތުން އެކަލްބުން ވަނީ ހަ ކުޅުންތެރިންގެ ސޮއި ހޯދައި 156 މިލިއަން ޕައުންޑު ހަރަދުކޮށްފައެވެ.
ބޮޑެތި އަދަދުތަކުން ފައިސާ ހަރަދުކޮށް ގިނަ ކުޅުންތެރިންތަކެއް ސޮއި ކުރިއިރުވެސް އާސެނަލް އޮތީ ޕްރިމިއާ ލީގު ތާވަލުގެ އެންމެ ފުލުގައި ޕޮއިންޓެއް ނުލިބިއެވެ. ބައިކޮޅަށް ނުވަ ލަނޑު ވަދެފައިވާ އާސެނަލްގެ ފަރާތުން ފެނިފައިވަނީ ވަރަށް އާދައިގެ ކުޅުމެކެވެ.
އާސެނަލްއަށް ގެނައި ކުޅުންތެރިންނާއެކު ތާވަލުގެ ކުރިއަށް ދެވޭ ފެންވަރުގެ ކުޅުންތެރިން އެޓީމުގައި އެބަތިއްބެވެ. ފުޓުބޯޅައިގެ ގިނަ މާހިރުން ގަބޫލުކުރާ ގޮތުގައި އާސެނަލްއަށް ދިމާވެފައިވާ އެންމެ ބޮޑު މައްސަލައަކީ އެޓީމުގެ ކޯޗު މިކެލް އާޓެޓާއަށް ނަތީޖާ ނެރުމުގެ ގާބިލްކަން ނެތުމެވެ.
އާޓެޓާ ޕްރެސް ކޮންފަރެންސްތަކުގައި އެންމެ ގިނައިން ދައްކާ ވާހަކަ އަކީ އޭނާގެ ޓީމުގައި ރަނގަޅު ފެންވަރުގެ ކުޅުންތެރިން މަދު ވާހަކައެވެ.
މިމައްސަލައަށް ހައްލު ހޯދައި ދިނުމުގެ ގޮތުން އެކްލަބުގެ މެނޭޖްމަންޓުން މިވަނީ ޓްރާންސްފާ ބާޒާރުގެ ފަހު ދުވަހު ވަނީ ބޮލޮންޔާގެ ޑިފެންޑަރު ޓަކަހީރޯ ޓޮމިޔަސު 19.8 މިލިއަން ޕައުންޑުގެ އަގަކަށް ގަނެފައެވެ.
މީގެ އިތުރުން އާސެނަލްއިން ވަނީ ބްރައިޓަން ޑިފެންޑަރު ބެން ވައިޓް 50 މިލިއަން ޕައުންޑަށް ގަނެފައެވެ. ޝެފިލްޑް ޔުނައިޓެޑުގެ އިނގިރޭސި ކީޕަރު އެރޮން ރަމްސްޑޭލް 30 މިލިއަން ޕައުންޑަށް ސޮއި ކޮށްފައެވެ.
ބެންފީކާގެ ޒުވާން ޑިފެންޑަރު ނޫނޯ ޓަވަރޭސްގެ އިތުރުން ރެއާލް މެޑްރިޑުގެ މިޑްފިލްޑަރު މާޓިން އޮޑެގާޑް އަދި އަންޑަލެކްޓްގެ މިޑްފީލްޑަރު ސަމްބީ ލޮކޮންގާވެސް ވަނީ އާސެނަލް އާ ގުޅިފައެވެ.
ޓްރާންސްފާ ބާޒާރުގައި އެންމެ ބޮޑު ހަރަދު ކުރި ޓީމަށް އާސެނަލް ވާއިރު ދެވަނަ މަގާމުގައި އޮތީ މެންޗެސްޓާ ޔުނައިޓެޑެވެ. ޔުނައިޓެޑުން 133.7 މިލިއަން ޕައުންޑު ހަރަދުކުރިއިރު މެންޗެސްޓާ ސިޓީއިން ވަނީ 100 މިލިއަން ޕައުންޑު ހޭދަކޮށްފައެވެ.