11 Aug 2021, 15:04
ޕީއެސްޖީގެ މުސާރައިގެ ޖުމުލަ އަގުތައް 300 މިލިއަން ޔޫރޯއަށް ވުރެން މަތިވުމާއެކު ކުލަބުގެ މުސާރައިގެ އޮނިގަނޑު ހަމަހަމަ ކުރަން މަޖުބޫރުވެ، 10 ކުޅުންތެރިއަކު ވިއްކާލަން އުޅޭ ކަމަށް ރިޕޯޓްތަކުން ބުނެފިއެވެ.
މިފަހަރުގެ ޓްރާންސްފާ މާކެޓުގައި ހިލޭ ޓްރާންސްފާއެއްގައި ހަތަރު ކުޅުންތެރިއަކާއި، އިތުރު ކުޅުންތެރިއަކު ބޮޑު އަގުގައި ޕީއެސްޖީން ގެނެސްފައިވާ އިރު، އެކުލަބުން ވަނީ މުހިއްމު ކުޅުންތެރިންތަކެއްގެ އެއްބަސްވުންތައް ވެސް އާ ކޮށްފައެވެ.
އެއާ އެކު ކުލަބުގެ މުސާރައިގެ އަގުތައް އިންތިހާއަށް މައްޗަށް ގޮސްފައިވާ އިރު، އެ އަގުތައް ދަށް ނުކޮށްފިނަމަ ކުލަބު ފައިނޭންޝިއަލް ފެއާޕްލޭ ރޫލާ ހިލާފުވެގެން އަދަބެއް ލިބިދާނެ ކަމުގެ ބިރު އޮތީ ހީވެފައެވެ.
މިދިޔަ މަހުގެ ތެރޭގައި ޕީއެސްޖީން ވަނީ އެގައުމުގެ ފުޓުބޯލް ފައިނޭންޝިއަލް ކޮންޓްރޯލް އޮގަނައިޒޭޝަނެއް ކަމަށްވާ "ޑީއެންސީޖީ" އަށް އެކުލަބުގެ މުސާރައިގެ ޖުމުލަ އަދަދު 180 މިލިއަން ޔޫރޯއަށް ކުޑަކުރާނެ ކަމަށް ބުނެފަ އެވެ. އެހެން ނަމަވެސް މިފަހުގެ ޓްރާންސްފާތަކާ އެކު އެ އަދަދު މިހާރު ވަނީ ދެގުނަ އިތުރުވެފައެވެ.
ބީބީސީ ސްޕޯޓްސްއިން ރިޕޯޓް ކުރި ގޮތުގައި މުސާރައިގެ މައްސަލައިގައި އަދަބު ލިބުމުގެ ކުރިން ޕީއެސްޖީން ވަނީ ކުޅުންތެރިންތަކެއް ވިއްކާލުމަށް ނިންމާފައެވެ. އެގޮތުން މިހާތަނަށް އެ ކުލަބުގެ ބެންޗުގައި ތިބޭ 10 ވަރަކަށް ކުޅުންތެރިންނާއި ޕީއެސްޖީގެ މެނޭޖްމެންޓުން ބައެއް ފަރާތްތައް ވަނީ ބައްދަލުކޮށްފައެވެ. އޭގެ ތެރޭގައި ޑަޔަލޯ، ރަފީނިއާ، ގުއެޔޭ، އިކާޑީ، ހެރޭރާ، ސާޖިއޯ ރިކޯ، އަރިއޯލާ އަދި ކުރްޒާވާގެ އިތުރުން ސަރާބިއާ ހިމެނެ އެވެ.