10 Aug 2021, 14:00
ރައީސުލްޖުމްހޫރިއްޔާ ދެއްވާ މަތީ ދަރަޖައިގެ ހާއްސަ އިނާމަށް ނަން ހުށަހެޅުމުގެ ފުރުސަތު މިމަހުގެ 15 ވަނަ ދުވަހު ހުޅުވާލާނެ ކަމަށް ރައީސް އޮފީހުން ބުނެފިއެވެ.
މިއަދު ރައީސް އޮފީހުން ބުނެފައިވަނީ މި އޮގަސްޓް މަހުގެ 15 ވަނަ ދުވަހު ހާއްސަ އިނާމާ ބެހޭ ކޮމިޓީއިން އިނާމަށް ނަން ހުށަހެޅުމުގެ ފުރުސަތު ހުޅުވާލާނެ ކަމަށެވެ.
އެހެން އަހަރުތަކެކޭ އެއްފަދައިން މި އަހަރުވެސް ރައީސް ދެއްވާ ހާއްސަ އިނާމް ދެއްވާނީ ހަތަރު ގިންތިއަކަށް ބަހާލައިގެންނެވެ.
އެގޮތުން އިނާމު ދެއްވާ ފުރަތަމަ ގިންތިއަކީ މަތީ ތަޢުލީމާއި ތަމްރީނުގެ ކޯހަކުން ފާހަގަކޮށްލެވޭ ކާމިޔާބީއެއް ހޯދާފައިވާ ފަރާތްތަކަށް އިނާމު ދޭ ގިންތިއެވެ.
މި ގިންތީގައި ހިމެނޭނީ ގައުމީ ސަނަދުގެ އޮނިގަނޑު ލެވެލް 10 ގެ ފާހަގަ ކުރެވޭ ކާމިޔާބީއެއް ހޯދި ފަރާތްތަކާއި އޮނިގަނޑު ލެވެލް ހަތެއް، އަށެއް އަދި ނުވައެކުން އެންމެ މަތީ ވަނަ ހޯދާ ފަރާތްތަކެވެ.
ރައީސް ދެއްވާ ހާއްސަ އިނާމު މި އަހަރު ދެއްވާ ދެވަނަ ގިންތިއަކީ ބައިނަލްއަގްވާމީ މައުރަޒު ނުވަތަ މުބާރާތެއްގެ އިތުރުން ބައިނަލްއަގްވާމީ ގޮތުން ބަލަގަންނަ އެންމެ މަތީ ވަަނަ ހާސިލް ކުރާ ފަރާތްތަކަށް އިނާމު ދެއްވާ ގިންތިއެވެ.
ތިންވަނަ ގިންތީގައި ބަލަނީ ރާއްޖެއަށް ދިމާވެފައިވާ މުހިންމު މައްސަލައަކަށް ހައްލެއް ހޯދުމުގެ ގޮތުން އާ އުފެއްދުމެއް އުފައްދައިގެން ނުވަތަ ޢިލްމީ ދިރާސާއެއްކޮށްގެން ފާހަގަކޮށްލެވޭ ކާމިޔާބީއެއް ހާސިލުކޮށްފައިވާ ފަރާތްތަކެވެ.
އިނާމު ދެއްވާ އެންމެ ފަހު ގިންތިއަކީ ހުނަރުވެރި ޒުވާނުން ޤައުމީ ތަރައްގީއަށް ކުރާ މަސައްކަތުގައި އުފެއްދުންތެރި އީޖާދެއް ކުރުމުން ފާހަގަކޮށްލެވޭ ކާމިޔާބީއެއް ހާސިލް ކުރައްވާފައި ޒުވާނުންނަށް އިނާމު ދެއްވާ ގިންތިއެވެ.
މި އިނާމު ދެއްވުމަށް ހަމަޖެހިފައިވަނީ އުމުރުން 18 އަހަރާއި 35 އަހަރާ ދެމެދުގެ ޒުވާނުންނަށެވެ.
ރައީސުލްޖުމްހޫރިއްޔާ ދެއްވާ މަތީ ދަރަޖައިގެ ހާއްސަ އިނާމަށް ނަން ހުށަހެޅޭނީ ރައީސް އޮފީހަށް ފޯމު ހުށަހެޅަން ހަމަޖެހިފައިވާ ޕޯޓަލް މެދުވެރިކޮށެވެ.
ފޯމު ހުށަހެޅުމުގެ އެންމެ ފަހު މުއްދަތަކީ ސެޕްޓެމްބަރު 16 ވަނަ ދުވަހުގެ މެންދުރުފަހު 14:00 އެވެ.