08 Aug 2021, 17:27
އެމެރިކާއިން މާދަމާ ރާއްޖެއަށް ވެކްސިންގެ ޝިޕްމަންޓެއް ގެނައުމަށް ހަމަޖެހިފައިވާކަމަށް ފޮރިން މިނިސްޓްރީ އިން ބުނެފިއެވެ.
އެހެންނަމަވެސް މާދަމާ ރާއްޖެ ގެނައުމަށް ހަމެޖެހިފައިވާ ވެކްސިންގެ ޝިޕްމަންޓާ ގުޅޭ އިތުރު ތަފްސީލެއް އެ މިނިސްޓްރީން ހާމަކޮށްފައެއް ނުވެއެވެ. އެގޮތުން އެއީ ކޮން ބާވަތެއްގެ ވެކްސިންއެއްކަމެއް އަދި ކިހާ އަދަދެއްގެ ވެކްސިންއެއްކަމެއް ހާމަކޮށްފައެއް ނުވެއެވެ.
މާދަމާ ވެކްސިންގެ އާ ޝިޕްމަންޓެއް ރާއްޖެ އަންނަ އިރު މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި ރާއްޖެއިން ފައިޒާ ވެކްސިން ހުސްވެފައިވާކަމަށް ޑރ. ނަޒްލާ މުސްތަފާ ވަނީ ވިދާޅުވެފައެވެ. އަދި އެ ވެކްސިން އަލުން ހޯދުމުގެ މަސަތްކަތް ކުރަމުންދާ ކަމަށްވެސް ވިދާޅުވިއެވެ.
އެމެރިކާއިން ވަނީ މީގެ ކުރިން ކޮވެކްސް ފެސިލިޓީ މެދުވެރިކޮށް ރާއްޖެއަށް ވެކްސިން ހަދިޔާކުރުމަށްވެސް ނިންމައިފައެވެ. އަދި އޭގެ އިތުރުން ކެނެޑާއިންވެސް ވަނީ ރާއްޖެއަށް ވެކްސިން ފޯރުކޮށްދޭނެކަމަށް ބުނެފައެވެ.
ރާއްޖޭގައި ކޮވިޑް-19 އިން ދިފާއުވުމަށް ޖަހަމުން އަންނީ ތިން ބާވަތެއްގެ ވެކްސިންއެވެ. އެއީ ކޮވިޝީލްޑް ވެކްސިން އާއި، ސިނޮފާމް ވެކްސިންގެ އިތުރުން ފައިޒާ ވެކްސިންއެވެ. މި ވެކްސިން ތަކުގެ އިތުރުން ރާއްޖޭގައި ހުއްދަދީފައިވާ އެހެން ވެކްސިންތަކަކީ މޮޑާނާ، ޖެންސަން، ސްޕަޓްނިކް ވީ ވެކްސިންއެވެ.