08 Aug 2021, 00:13
ޕްރިމިއާ ލީގުގެ އާ ސީޒަނަށް އައިސް ސްޕޯޓްސްއިން ހަތަރު އާޝޯއެއް ތައާރަފު ކޮށްފިއެވެ.
ސީޒަން ކިކްއޮފް ޝޯ މިރޭ 8:30 ގައި ވަނީ ފަށާފައެވެ. މިޝޯއަކީ ޕްރިމިއާ ލީގް ފެށުމުގެ ކުރިން ދައްކާ އެންމެ ޝޯއެކެވެ.
މީގެ އިތުރުން ވީކްލީ ކިކް އޮފް ޝޯގައި ބެލުންތެރިންނަށް މެޗުތަކާއި ބެހޭ މައުލޫމާތާއި ކުރިއަށް އޮތް މެޗުތަކުގެ ވަނަވަރު ގެނެސްދޭނެއެވެ.
ޓީމުތަކުގެ އަނިޔާވެފައި ތިބި ކުޅުންތެރިންގެ މައުލޫމާތު އަދި މެޗުތަކަށް ކޯޗުން ގެންނާނެ ކަމަށް ބެލެވޭ ބަދަލުތައްވެސް މިޕްރޮގްރާމްގައި ގެނެސްދޭނެއެވެ. ވީކްލީ ކިކް އޮފްޝޯ ކޮންމެ ހަފްތާއެއްގެ ހޮނިހިރު ދުވަހު 3:00 ގައި ފަށާނެއެވެ.
ގޭމް ވީކް ރިވިއު ޝޯގައި ކޮންމެ ހަފްތާއެއްގެ ލީގު މެޗުތަކަގެ އުސްއަލިތަކަށް އަލި އަޅުވާލާނެއެވެ. ހަފްތާގެ އެންމެ މޮޅު ގޯލް އަދި މެޗުތަކުގައި ހިންގައިދިޔަ ކަންކަމަށް ފުޓުބޯޅައިގެ މާހިރުންގެ ބަސް ހޯދާނެއެވެ. މިޝޯ ގެނެސްދޭނީ ކޮންމެ ހަފްތާއެއްގެ ބުދަ ދުވަހު ރޭ 21:00ގައެވެ.
އައިސް ސްޕޯޓްސްގެ ހަތަރުވަނަ ޝޯއަކީ ފެންޓަސީ ޕްރޮގްރާމެވެ. މިޝޯ ހާއްސަ ވާނީ ފެންޓަސީ ލީގަށެވެ. ކޮންމެ ހަފްތާއެއްގެ އެންމެ މޮޅު ފެންޓަސީ ޓީމުގެ އަޕްޑޭޓްސް އާއި ޓީމަށް ގެންނަން އެންމެ ރަނގަޅު ކުޅުންތެރިންގެ މައުލޫމާތުވެސް ގެނެސްދޭނެއެވެ. މިޝޯ ދައްކާނީ ކޮންމެ ބުރާސްފަތި ދުވަހަކު 21:00ގައެވެ.
މި ހަތަރު ޝޯ އައިސް ސްޕޯޓްސް (ޗެނަލް 102) މީޑިއާނެޓް ބޭނުން ކުރަށްވާ ފަރާތްތަކަށް ބެލޭނެ އެވެ. އަދި މީގެ އިތުރުން މަލްޓިސްކްރީން އެޕްލިކޭޝަން އަދި އެމްއެސްޓީވީ ބޭނުން ކުރާ ފަރާތްތަކަށްވެސް މި ޝޯތައް ބަލާލެވޭނެ އެވެ.