01 Aug 2021, 14:40
އަންނަ މަހުގެ އެއްވަނަ ދުވަހުން ފެށިގެން ކޮވިޑް-19 ވެކްސިން ފުރިހަމަ ނުކުރާ ފަރާތްތަކަށް ސްކޫލްތަކަށް ވަނުން މަނާވާނެކަމަށް އެޑިއުކޭޝަން މިނިސްޓްރީން ބުނެފިއެވެ.
އެ މިނިސްޓްރީ އިން މިއަދު ނެރުނު އިއުލާނެއްގައި ބުނީ މި ފިޔަވަޅަކީ ސްކޫލްތަކުގެ ކިޔެވުން ހުއްޓުމެއްނެތި ކުރިޔަށް ގެންދިޔުމުގެ ގޮތުން އަޅާ ފިޔަވަޅެއް ކަމަށެވެ.
އެ އިއުލާނުގައި ބުނީ ސްކޫލްތަކަށް ވަނުމުގެ ހުއްދަ ސެޕްޓަމްބަރު މަހުގެ އެއް ވަނަ ދުވަހުން ފެށިގެން ދޭނީ ވެކްސިންގެ ދެ ޑޯޒް ފުރިހަމަ ކޮށްފައިވާ މީހުންނަށް އެކަނިކަމަށެވެ.
މިނިސްޓްރީއިން ބުނި ގޮތުގައި އިއުލާނުގައި ބަޔާންކޮށްފައިވާ ގޮތަށް ސްކޫލުތަކަށް ވަނުން މަނާކުރާނީ ވެކްސިން ޖެހޭ އުމުރުފުރައިގެ ވެކްސިން ފުރިހަމަނުކޮށް ތިބި ފަރާތްތައް އެކަނިކަމަށެވެ. ވެކްސިން ޖެހޭ އުމުރުފުރައަކީ 18 އަހަރުން މައްޗެވެ.
އަދި އޭގެ ތެރޭގައި ސްކޫލުތަކުގެ މުއައްޒަފުންވެސް ހިމެނޭނެއެވެ. އެހެންނަމަވެސް ދަރިވަރުން އިސްތިސްނާވާނެއެވެ.
ސަރުކާރުން ދަނީ މި މަހުގެ ނިޔަލަށް ރާއްޖޭގެ އާބާދީގެ 90 އިންސައްތަ މީހުން ވެކްސިން ފުރިހަމަކުރުމަށް އަމާޒުކޮށް ވަރުގަދަ ކެމްޕޭނެއް ފައްޓައިގެން ހިންގަމުންނެވެ.
މިދިޔަ އަހަރުގެ މާޗް މަސްތެރޭ ރާއްޖެއިން އެންމެ ފުރަތަމަ ކޮވިޑް ކޭސް ފެނުމާއެކު ރާއްޖޭގެ ސްކޫލުތަކުގައި ކިޔެވުން ވަނީ މެދުކަނޑާލާފައެވެ. އޭގެ ފަހުން ދަރިވަރުންނަށް ކިޔަވައިދެމުންދިޔައީ އޮންލައިންކޮށެވެ.
އެގޮތުން ޓެލިކުލާހުގެ ނަމުގައި ގަވާއިދުން ޓީވީ މެދުވެރިކޮށް އެކި ގްރޭޑްތަކުގެ ދަރިވަރުންނަށް ކިޔަވަައިދިނުމުގެ ކަންކަން ވަނީ ކުރިޔަށް ގެންގޮސްފައެވެ. ރާއްޖޭގެ ސްކޫލުތަކުގައި މިއަހަރުތެރޭ ވަނީ ކުދިން ހާޒިރުކޮށްގެން ކިޔަވައިދޭން ފަށާފައެވެ.
އަދި މި މަހުގެ ފެށެން ހަމަޖެހިފައިވާ ދިރާސީ އާ އަހަރުވެސް ކިޔަވައިދޭން ނިންމާފައިވަނީ ދަރިވަރުން ސްކޫލަށް ހާޒިރުކޮށްގެންނެވެ.
ރާއްޖޭގައި ޖަހައިދެމުން އަންނަނީ ކޮވިޝީލްޑް ވެކްސިން އާއި އެސްޓްރާޒެނެކާ ވެކްސިންގެ އިތުރުން ސިނޮފާމް ވެކްސިން އަދި ފައިޒާ ވެކްސިންއެވެ. ރަޝިޔާގެ ސްޕަޓްނިކް ވީ ވެކްސިންއަށް ހުއްދަދީފައިވީނަމަވެސް އަދި އެ ވެކްސިން ރާއްޖެއަށް ލިބޭ ގޮތެއް ނުވެއެވެ. މި ވެކްސިންތަކުގެ އިތުރުން މޮޑާނާ އަދި ޖެންސަން ވެކްސިން ޖަހަންވެސް ވަނީ ހުއްދަދީފައެވެ.
މިހާތަނަށް ރާއްޖޭގައި ވެކްސިންގެ ފުރަތަމަ ޑޯޒް 321،764 މީހަކުވަނީ ފުރިހަމަކޮށްފައެވެ. އަދި ދެވަނަ ޑޯޒް 264،913 މީހުން ފުރިހަމަކޮށްފައިވެއެވެ. މިއީ ވެކްސިން ޖެހޭ އާބާދީގެ 50 އިންސައްތައަށް ވުރެ ގިނަ އަދަދެކެވެ.