28 Jun 2021, 17:28
މިނިސްޓްރީ އޮފް އެންވަޔަރަމަންޓް, ކްލައިމެޓް ޗޭންޖް އެންޑް ޓެކްނޮލޮޖީގެ ސްޓޭޓް މިނިސްޓަރަކަށް ހުންނެވި އަހްމަދު އަފްޒަލް އިބްރާހީމް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންގެ ސްޓޭޓް މިނިސްޓަރުކަމަށް ބަދަލުކޮށް, އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރަކަށް އިތުރު ބޭފުޅަކު ހަމަޖައްސަވައިފިއެވެ.
ރައީސް އޮފީހުން ބުނި ގޮތުގައި އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރަކަށް މިއަދު ހަމަޖެއްސެވީ ހ. ސުނާރު ޚަދީޖާ ނަސީމެވެ. އެ މަގާމަށް އައްޔަނުކުރުމުގެ ކުރިން ޚަދީޖާ ހުންނެވީ އެ މިނިސްޓްރީގައި އެންވަޔަރަމަންޓް އެންޑް ކްލައިމެޓް ސްޕެޝަލިސްޓުގެ ގޮތުގައި, ޑެޕިއުޓީ މިނިސްޓަރު ފެންވަރުގެ މަގާމެއްގައެވެ.
ޚަދީޖާ ނަސީމް ވަނީ އޮސްޓްރޭލިޔާގެ ޔުނިވާސިޓީ އޮފް މެލްބަންއިން އެންވަޔަރަމަންޓު ދާއިރާއިން މާސްޓާޒް ޑިގްރީ ހާސިލުކުރައްވާފައެވެ. އަދި އޭނާ ވަނީ މީގެަ ކުރިން ރާއްޖެއާއި ރާއްޖެއިން ބޭރުގެ ބައެއް ޖަމިއްޔާތަކުގައާއި ދިވެހި ސަރުކާރުގެ އެކި އިދާރާތަކުގެ އެކި ފަންތީގެ މަގާމުތަކުގައި ދިގު މުއްދަތަަކަށް މަސައްކަތް ކުރައްވާފައެވެ.
މިއަދު ޓްރާންސްޕޯޓު މިނިސްޓްރީގެ ސްޓޭޓު މިނިސްޓަރުގެ މަގާމަށް ބަދަލުކުރެއްވި ގ. ކަނޑުވައިގެ އަހްމަދު އަފްޒަލް އިބްރާހިމް ވަނީ މެލޭޝިއާގެ ލިމްކޮކްވިންގް ޔުނިވާސިޓީ އޮފް ކްރިއޭޓިވް ޓެކްނޮލޮޖީން ބެޗެލާ އޮފް ކޮމްޕިއުޓާ ސައިންސް (އޮނާސް) އިން މޯބައިލް ކޮމްޕިއުޓިން ހާސިލުކުރައްވާފައެވެ. އަދި ސަރުކާރުގެ އެކި އިދާރާތަކާއި އަމިއްލަ ކުންފުނިތަކުގައި އޭނާ މީހެ ކުރިން މަސައްކަތް ކުރެއްވިއެވެ.
އަފްޒަލް މީގެ ކުރިން ހުންނެވީ މިނިސްޓްރީ އޮފް ކޮމިއުނިކޭޝަންސް, ސައިންސް އެންޑް ޓެކްނޮލޮޖީގެ ސްޓޭޓް މިނިސްޓަރުގެ މަގާމުގައެވެ. ނަމަވެސް އެ މިނިސްޓްރީ އުވާލައި, އެ މިނިސްޓްރީގެ މެންޑޭޓު އެންވަޔަރަމަންޓް މިނިސްޓްރީއާ އެއްކޮށްލުމާއެކު އެތަނުގައި ތިއްބެވި މަގާމުތައް އެންވަޔަރަމަންޓް މިނިސްޓްރީއަށް ބަދަލުކުރީއެވެ.
ސްޓޭޓު މިނިސްޓަރު ފެންވަރުގެ މަގާމުތަކުގައި ތިއްބަވާ ބޭފުޅުންނަށް މުސާރައަށް 32،000 ރުފިޔާ އަދި އެލަވަންސްގެ ގޮތުގައި 15،000 ރުފިޔާއާއެކު މަހަކު ޖުމްލަ 47،000 ރުފިޔާ ލިބެއެވެ. އަދި ޑެޕިއުޓީ މިނިސްޓަރު ފެންވަރުގެ މަގާމުތަކުގައި ތިއްބަވާ ބޭފުޅުންނަށް މުސާރައަށް 20،500 ރުފިޔާ އަދި 15،000 ރުފިޔާގެ އެލަވަންސަކާއެކު މަހަކު ޖުމްލަ 35،500 ރުފިޔާ ލިބެއެވެ.