23 Jun 2021, 13:28
ހަބަރެއް ނުވާތާ ހަފްތާއެއްވެގެން ފުލުހުން ހޯދުމަށް އިއުލާން ކުރި ޒުވާނާ ހެޔޮ ހާލުގައި ހުއްޓާ ފެނިއްޖެ އެވެ.
މި މަހު 16 ވަނަ ދުވަހުން ފެށިގެން އާއިލާއަށް އޭނާގެ އެއްވެސް ހަބަރެއްނުވެ، ވީނުވީއެއް ނޭނގި ގެއްލިގެން އިއްޔެ ފުލުހުން ފޮޓޯ އާންމު ކުރީ, ހދ. ކުޅުދުއްފުށި / ރިންސޯ، އަބޫބަކުރު އިބްރާހީމް (20އ) އެވެ.
ފުލުހުން ބުނީ, އޭނާ މިހާރު ފެނިފައިވާ ކަމަށެވެ. އޭނާ ފެނިފައިވަނީ, އިއްޔެގެ ހަވީރުގެ ވަގުތެއްގައި ކަމަށާއި އޭނާގެ ހާލު ރަނގަޅު ކަމަށް ފުލުހުން ބުންޏެވެ.
އެކަމާ ގުޅޭ އިތުރު ތަފްސީލެއް ފުލުހުން ނުދެއްވައެވެ.
ގެއްލުނު ޒުވާނާ ހެޔޮ ހާލުގައި ހުއްޓާ ފެނުނު އިރު، ގެއްލިގެން ހޯދަމުން ދިޔަ 13 އަހަރުގެ ކުޑަ ފިރިހެން ކުއްޖަކު މަރާލާފައި އޮއްވާ އިއްޔެ ވަނީ ފެނިފަ އެވެ. އެ މައްސަލައާ ގުޅިގެން 27 އަހަރުގެ ފިރިހެނަކާއި 17 އަހަރުގެ ކުޑަ ކުއްޖަކު މިހާރު ވަނީ ހައްޔަރުކޮށްފައެވެ.