20 Jun 2021, 14:06
މާފުށީ ޖަލުން އޯވާޑޯޒްވި ގައިދީގެ ހާލު މިވަގުތު ރަނގަޅު ކަމަށް ކަރެކްޝަންސް އިން ބުނެފި އެވެ.
މިދިޔަ ހުކުރު ދުވަހުގެ ރޭ މާފުށީ ޖަލުން އޮވާޑޯޒްވެގެން އައިޖީއެމްއެޗްގައި ފަރުވާ ދެމުންދަނީ, އުމުރުން 27 އަހަރުގެ މީހަކަށެވެ.
ކަރެކްޝަންސްގެ މީޑިއާ އޮފިޝަލް މިއަދު "ސަން"އަށް ވިދާޅުވީ, އޭނާގެ ހާލު މިވަގުތަށް ރަނގަޅު ކަމަށެވެ.
މަސްތުވާތަކެތީގެ މައްސަލައެއްގައި ޖަލު ހުކުމެއް ތަންފީޒު ކުރަމުންދިޔަ އެމީހާ އޯވާޑޯޒްވީ ކޮން އެއްޗެއް ބޭޭނުންކޮށްގެން ކަމެއް އަދިވެސް ޔަގީން ނުވާކަމަށް މީޑިއާ އޮފިޝަލް ވިދާޅުވި އެވެ.
އޮފިޝަލް ވިދާޅުވީ, އޭނާގެ ޓެސްޓުތަކުގެ ނަތީޖާ ލިބިފައިވާ ކަމަށާއި ނަމަވެސް އަދިވެސް ބަލަން ޖެހޭ ކަންކަން ބަލަމުންދާ ކަމަށެވެ. އަދި އިތުރަށް ޓެސްޓުތައް ހަދަމުންދާ ކަމަށްވެސް އޭނާ ވިދާޅުވި އެވެ.
އެކަމާ ގުޅޭ އިތުރު މައުލޫމާތެއް ކަރެކްޝަންސްއިން ހާމައެއް ނުކުރެ އެވެ.
"ސަން"އަށް އެނގިފައިވާ ގޮތުގައި އޭނާ ބަލާ ޑޮކްޓަރުން ލަފާކުރާނީ އޯވަޑޯޒްވީ ބޭސްތަކެއް ކައިގެންނެވެ. ނަމަވެސް އެއީ ކޮން ކަހަލަ ބޭހެއް ކަމެއް އަދި ނޭނގެ އެވެ.
މިކަމާ ގުޅޭ ގޮތުން އައިޖީއެމްއެޗްގެ ބަހެއް އަދި ނުލިބި އެވެ.