20 Jun 2021, 13:55
ރަސްމީ ދަތުރުފުޅެއްގައި ގާތްގަނޑަކަށް ދެ މަސް ދުވަސް ވަންދެން ރާއްޖެއިން ބޭރުގައި ހުންނެވުމަށްފަހު ފޮރިން މިނިސްޓަރު އަބްދުﷲ ޝާހިދު މިއަދު ހެނދުނު ރާއްޖެ ވަޑައިގެންފި އެވެ.
އދ. އާންމު މަޖިލީހުގެ ރިޔާސަތަށް ވަޑައިގަތުމަށް ކުރައްވަމުން ގެންދެވި މަސައްކަތުގެ ދަށުން، މިނިސްޓަރު ޝާހިދު ނިއުޔޯކަށް ވަޑައިގަތީ އޭޕްރީލް މަހުގެ ފަހުކޮޅު އެވެ. އަދި އދގެ އާންމު މަޖިލީހުގެ 76 ވަނަ ސެޝަންގެ ރައީސްކަމަށް ޝާހިދު ވަނީ އިންތިހާބުވެވަޑައިގެންފަ އެވެ.
އަގްފާނިސްތާނުގެ ޑރ. ޒަލްމާއި ރަސޫލާ ވާދަކުރައްވައި، ޝާހިދު އެ މަގާމަށް ހޮވިވަޑައިގަތީ 191 ވޯޓުގެ ތެރެއިން 143 ވޯޓު ހޯއްދަވައިގެންނެވެ.
އދގެ އާންމު މަޖިލީހުގެ 76 ވަނަ މަޖިލީހުގެ ރައީސްކަމާ ޝާހިދު ހަވާލުވެވަޑައިގަންނަވާނީ މި އަހަރުގެ ސެޕްޓެމްބަރު މަހުގެ ތެރޭގައެވެ.
މިއީ ރާއްޖެއިން އދގެ އާންމު މަޖިލީހުގެ ރައީސްކަން ކާމިޔާބުކުރި ފުރަތަމަ ފަހަރެވެ. އަދި ރާއްޖެއަކީ އދގެ އާންމު މަޖިލީހުގެ ރައީސްކަން އަދާކުރާ ސާކްގެ ހަވަނަ ގައުމެވެ. ސާކްގެ ގައުމުތަކުގެ ތެރެއިން އދގެ އާންމު މަޖިލީހުގެ ރައީސްކަން މިހާރު އަދާނުކޮށް އޮތީ ރާއްޖޭގެ އިތުރުން ނޭޕާލް އަދި ބޫޓާނެވެ.