05 Jun 2021, 14:53
އަމާޒަކީ ތަރައްގީ އާއި ތިމާވެށީގެ ތިލަފަތް ހަމަހަމަ ކުރުން ކަމަށް އެންވަޔަރަމެންޓް މިނިސްޓަރު އައިމިނަތު ޝައުނާ ވިދާޅުވެއްޖެ އެވެ.
މިއަދު ފާހަގަ ކުރާ ތިމާވެށީގެ ދުވަހާ ގުޅިގެން ދެއްވި މެސެޖުގައި މިނިސްޓަރު ވިދާޅުވީ އަމާޒަކީ، ތިމާވެށި ހިމާޔަތްކުރުމާއި ތަރައްގީގެ ތިލަފަތް ހަމަކުރުން ކަމަށެވެ.
"އަޅުގަނޑުމެންގެ ތަސައްވަރަކީ، މޫސުމީ ބަދަލުތަކުން ކުރާ ނޭދެވޭ އަސަރުތަށް ތަހައްމަލު ކުރެވޭ ފަދަ، ފަންވަރުހުރި އުމްރާނީ ތަރައްގީ މި ރާއްޖެއަށް ގެނައުން،" މިނިސްޓަރު ވިދާޅުވި އެވެ.
މިނިސްޓަރު ޝައުނާ ވިދާޅުވީ ރާއްޖެއަކީ ފަތުރުވެރިކަމާއި މަސްވެރިކަމަށާއި ދަނޑުވެރިކަމަށް ބަރޯސާވާ ގައުމަކަަށްވާ އިރު އެ ސިނާއަތްތަކުން ލިބޭ ނަފާ ދެމެހެއްޓެނިވި ގޮތެއްގައި ލިބިލިބި ހުންނާނީ ގުދުރަތީ ވަސީލަތްތައް ރައްކާތެރިކޮށް ހިމާޔަތްކޮށް، މޫސުމީ ބަދަލުތަކުން ކުރާ ނޭދެވޭ އަސަރުތައް ތަހައްމަލު ކުރުމުގެ ގާބިލުކަން އިތުރުކޮށް ވަރުގަދަކޮށްގެން ކަމަށެވެ.
މީގެ އިތުރުން ކަނޑުފަޅު ތަގައްޔަރުވުމުގެ މައްސަލަ އަކީ ވެސް ރާއްޖެއަށް ކުރިމަތިވެފައިވާ ތިމާވެސީގެ ބޮޑު މައްސަލައެއްކަން މިނިސްޓަރު ފާހަގަ ކުރެއްވި އެވެ.
އޭގެ ސަބަބުން ފަރުތަކަށާއި އެ ފަރުތަކުގައިވާ ދިރުންތަކަށް، އަދި މަސްވެރިކަމަށާއި ސިއްހަތަށް ވެސްް ނޭދެވޭ އަސަރު ކުރާ ކަމަށް މިނިސްޓަރު ވިދާޅުވި އެވެ.
"މިކަންކަމުން އަރައިގަތުމަށް، އެކަށީގެންވާ ގޮތެއްގައި ކުނި މެނޭޖްކުރުމަކީ މި ސަރުކާރުން ވަރަށް ބޮޑު އަހަންމިއްޔަތުކަމެއްދޭ ކަމެއް. މިގޮތުން ޖޫން މަހުން ފެށިހެން އެއްފަހަރު ބޭނުންކޮށްފައި އުކާލެވޭ ޕްލާސްޓިކް ބޭނުންކުރުން ހުއްޓާލުމުގެ އަމަލީ މަސައްކަތް ފަށާފައިވާ އިރު، ކުނި މެނޭޖްކުރުމާ ގުޅޭ ގަވައިދު އިސްލާހު ކުރުމުގެ މަސައްކަތް މިހާރުދަނީ ކުރެވެމުން،" މިނިސްޓަރު ޝައުނާ ވިދާޅުވި އެވެ.
"އިސްލާހު ގެޒެޓުކުރެވުމުން، ކުނި މެނޭޖްކުރާ މަރުކަޒުތަކުގައި ކުނި ވަކިކޮށް، ފަނާވާޒާތުގެ ކުނިން ކޮމްޕޯސްޓް އުފެއްދުމާއި، ރިސައިކަލް ނުވަތަ އަލުން ބޭނުންކުރެވޭ ޒާތުގެ ކުނި އެކްސްޕޯޓްކުރުމަށާއި އަދި އަންދާލެވޭ ޒާތުގެ ކުނި އިންސިނެރޭޓްކުރުމަށް ލުއި ފަސޭހަތަކެއް ލިބިގެން ދާނެ." ތިމާވެއްޓާއި މޫސުމަށް އަންނަ ބަދަލުތަކާ ބެހޭ ވަޒީރު ވިދާޅުވި އެވެ.