03 Jun 2021, 13:03
ކުރިއަށް އޮތް ތިން މަހުގެ ތެރޭގައި ކޮވިޑް19 ވެކްސިންގެ 700،000 ޑޯޒް ލިބޭނެ ކަމަށް ހެލްތު މިނިސްޓަރު އަހްމަދު ނަސީމް ރޭ ވިދާޅުވެއްޖެ އެވެ.
އެސްޓެރަޒެނެކާގެ ސިންގަޕޫރުގެ ކުންފުންޏެއް ކަމަށްވާ އެސްޓްރާޒެނެކާ ސިންގަޕޯ ޕީޓީއީ އެލްޓީޑީ އިން 700،000 ޑޯޒް ވެކްސިން ގަންނަން މިދިޔަ ޑިސެމްބަރުގައި ދިވެހި ސަރުކާރުން ވަނީ އެއްބަސްވެފަ އެވެ.
ސަރުކާރުން މީގެކުރިން ބުނެފައި ވަނީ ޖޫން މަހު އެ ވެކްސިން ލިބޭނެ ކަމަށެވެ.
ރޭ ބޭއްވި ނޫސްވރިންގެ ބައްދަލުވުމުގައި މިނިސްޓަރު ނަސީމް ވިދާޅުވީ އެ ވެކްސިން ރާއްޖެ ގެންނާނީ ތިން މަހަށް ބަހާލައިގެން ކަމަށާއި، މި މަހުގެ ފަހުކޮޅު ފުރަތަމަ ޝިޕްމަންޓް ރާއްޖެ އަންނާނެ ކަމަށެވެ.
މި މަހު ގެންނާނީ ދެ ލައްކަ ޑޯޒް އެވެ. އަދި ޖުލައި މަހު ވެސް ދެ ލައްކަ ޑޯޒް ގެންނާނެ ކަމަށާއި، އޯގަސްޓް މަހު ތިން ލައްކަ ޑޯޒް ގެންނާނެ ކަމަށް މިނިސްޓަރު ވިދާޅުވި އެވެ.
އެސްޓްރާޒެނެކާގެ އިތުރުން، ސަރުކާރުން ވަނީ ކޮވިޝީލްޑްގެ 300،000 ޑޯޒް ގަންނަން އިންޑިއާގެ ސިރަމް އިންސްޓިޓިއުޓާއެކު ސޮއިކޮށްފަ އެވެ. އޭގެ ތެރެއިން 100،000 ޑޯޒް ވަނީ ލިބިފަ އެވެ.
ރާއްޖޭގައި އެންމެ ފުރަތަމަ ދޭން ފެށި ކޮވިޑް19ގެ ވެކްސިނަކީ އިންޑިއާގެ ކޮވިޝީލްޑް ވެކްސިން ކަމަށްވާއިރު، މިހާތަނަށް ވެކްސިން ޖަހާފައިވާ ގިނަ މީހުންނަށް ދީފައިވަނީ ވެސް އެ ވެކްސިން އެވެ.
ވެކްސިން ލިބުމުގައި ދަތިތަކެއް ކުރިމަތިނުވާނެ ކަމަށް ސަރުކާރުން ކުރިން ބުނި ނަމަވެސް، އިންޑިއާގައި ކޮވިޑްގެ ހާލަތު ގޯސްވުމުން އެގައުމުގެ ސަރުކާރުން ވަނީ ވެކްސިން އެކްސްޕޯޓު ކުރުން ހުއްޓާލައިފަ އެވެ.