31 May 2021, 20:11
ކުޅުދުއްފުށީގައި ރަހީނުކޮށް އަނިޔާކުރި ޒުވާނާގެ ބޮލަށް ބޮޑެތި ގެއްލުންތަކެއް ލިބިފައިވާ ކަަމށާއި، އަދިވެސް އޮތީ ވެންޓިލޭޓަރުގައި ކަމަށް އާއިލާ އިން ބުނެފި އެވެ.
ކުޅުދުއްފުށީގައި މޫނު ނިވާކޮށްގެން ތިބި ބަޔަކު 29 އަހަރުގެ ދިވެހި ފިރިހެނަކު ކާރަކަށް އަރުވައިގެން ގެންގޮސް އަނިޔާކޮށްފައިވަނީ މި މަހުގެ 29 ވަނަ ދުވަހުގެ ރެޔެވެ.
ރަހީނުކޮށްފައި ވަނީ އެރަށު ރަތްފުސްގެ، އަހްމަދު އިބްރާހީމް އެވެ. އޭނާގެ ބޮލުގެ ނާށިގަނޑު ފަޅައިގެން ގޮސް ސިކުނޑިއަށް ވަނީ ލޭއެޅިފަ އެވެ.
އަހްމަދު އިބްރާހީމްގެ ބައްޕަ، އިބްރާހިމް ހުސައިން މިރޭ "ސަން" އަށް ބުނީ އޭޑީކޭ ހޮސްޕިޓަލުން އަހްމަދުގެ ބޮލުގެ އޮޕްރޭޝަނެއް ކޮށްފައިވާ ކަމަށާއި އެހެން ނަމަވެސް ސިކުނޑިއަށް ވަރަށް ބޮޑަށް ގެއްލުންވެފައިވާ ކަމަށާއި އަދިވެސް އޮތީ ވެންޓިލޭޓަރުގައި ކަމަށެވެ.
އިބްރާހިމް ބުނީ، ރަހީނުކޮށް އަނިޔާކުރީ ކޮން މައްސަލައެއްގައި މަމެއް އަދި އަނިޔާކުރީ ކޮން ބައެއްކަން ވެސް އާއިލާއަށް އަދި ނޭނގޭ ކަމަށެވެ.
އެހެން ނަމަވެސް ލެޔާ ތަތްތެޅިފައި ވަނިކޮށް އަހްމަދު ނަގައިގެން ގެއަށް ގެނައި އިރު ހޭ ހުރި ކަމަށާއި، އެވަގުތު ފުލުހުން ގާތުގައި އޭނާއަށް އަނިޔާކުރި އެކަކު ދަންނަ ކަމަށް ބުނި ކަމަށް އިބްރާހިމް ބުންޏެވެ.
"ޕޮލިހުން ކައިރީ ބުނި ކޮންމެސް މީހެއްގެ ވާހަކަ. އަށް މީހުންނޭ. އަށް މީހުންގެ ތެރެއިން މިވެނި މީހަކު ތިމަންނައަށް އެނގެޔޭ. އަހަރުމެންނަކަށް ނޭނގޭ ކާކު ކަމެއް. އަހަރުމެން ކައިރީ ނުބުނޭ،" އިބްރާހިމް ބުންޏެވެ.
އިބްރާހީމް ބުނީ، އަހްމަދު ކާރަކަށް އަރުވައިގެން ގެންދިޔައީ ރައްޓެހިންތަކަކާ އެކު ގެއެއްގައި އިންދާ ކަމަށެވެ. އެ ގޭތެރޭގައި ތިއްބާ، ދޮރުމައްޗަށް އަރާފައި މީހަކު އަހްމަދުގެ ނަމުން ގޮވާލުމުން އޭނާ ބޭރަށް ނުކުތް ކަމަށާއި، އަދި ނުކުތުމުން ދަމާފައި ކާރަށް އަރުވައިގެން ގެންދިޔައީ ކަމަށް އިބްރާހިމް ކިޔައިދިނެވެ.
"ކާރަކަށް ލީ ފަހުން ދެން ތިބި މީހުން އަހަރުމެންނަށް މައުލޫމާތު ދިނީ. ގުޅާފަ ބުނީ ކާރަކަށް ލައިގެން ގެންގޮއްސިއޭ ހަބަރެއް ވި ހެއްޔާ، ގެއަށް އައިއްސި ހެއްޔޭ. އަހަރެން ބުނީ ނާދޭ،" އިބްރާހީމް ބުންޏެވެ.
އިބްރާހީމް ބުނީ އޭނާގެ ދަރިފުޅަށް ވަރަށް ބޮޑަށް އަނިޔާކުރުމަށްފަހު އެއްލާލަފައި އޮއްވާ ސައިކަލަކަށް ލައިގެން އަހްމަދު ގެއާ ހަމައަށް ގެނައި އިރު މީހާ ވަނީ ލެއިން ފޯވެފައި ކަމަށާއި، އަދި އޭރު "ސިކުނޑި ގޯސްވެފައިވާ" ކަމަށް ވެސް އިބްރާހިމް ބުންޏެވެ.
އެ މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައެއް ނުވެ އެވެ. އިބްރާހީމް ބުނީ، އެ ރަށުގައި ސީސީޓީވީ ކެމެރާ ވެސް ހުންނާނެ ކަމަށާއި، ރަނގަޅަށް ތަހުގީގުކޮށްފި ނަމަ އެކަން ކުރި ބަޔަކު ހޯދޭނެ ކަމަށް ގަބޫލުކުރާ ކަމަށެވެ.
"އޭގެ ކުރިން ދުވަހު [ރަހީނުކުރި ދުވަހުގެ ކުރީ ދުވަހު] ވެސް ދެ ފަހަރަކު އޭނަ ޕޮލިހަށް މައުލޫމާތު ދީފަ އެބަ އޮތް، ތިމަންނައާ ބަޔަކު ދިމާކޮށް އިންޒާރު ދޭކަމަށް ވެސް،" އިބްރާހީމް ބުންޏެވެ.
ބަޔަކު އިންޒާރު ދޭތީ ފުލުހަށް ދެ ފަހަރެއްގެ މަތިން ރިޕޯޓުކުރި ކަމަށް އާއިލާ އިން ބުނި ނަމަވެސް، ފުލުހުން ބުނީ އެފަދަ ރިޕޯޓެއް ލިބިފައި ނުވާ ކަމަށެވެ.