25 May 2021, 17:08
ރާއްޖޭގެ ބޮޑު ވިޔަފާރިވެރިޔާ، އަދި މާމިގިލީ ދާއިރާ މެމްބަރު ގާސިމް އިބްރާހީމްގެ ޚަރަދުގައި ސިއްހީ ދާއިރާ އިން މަތީ ތައުލީމު ހާސިލު ކުރި ހުރިހާ ފަރާތްތަކެއްގެ ލޯނު މައާފް ކޮށްދެއްވައިފި އެވެ.
އެކަން ހާމަކުރުމުގެ ގޮތުން، ގާސިމް މިއަދު ނެރުއްވި ނޫސްބަޔާނުގައި ވަނީ، އޭނާގެ ވިލާ ފައުންޑޭޝަންގެ "ސްކޯލާޝިޕް ސްކީމް"ގެ ދަށުންނާއި އެނޫންވެސް ގޮތަކުން ސިއްހީ ދާއިރާއިން ތައުލީމް ހާސިލްކުރުމަށް އޭނާ ދޫކުރި ލޯނުތަކަށް ނުދެއްކި ފައިސާއެއް ވާނަމަ، އެ ފައިސާއެއް މިއަދުން ފެށިގެން މާފުކޮށްދެއްވާ ކަމަށެވެ.
ގާސިމް ވިދާޅުވީ މާތްﷲއަށް ވާގިއެދި ހުރެ "ކިތަންމެ ބޮޑު އަދަދެއްގެ ފައިސާއެއް ކަމަށްވިޔަސް، އަދި ކުޑަ އަދަދެއް ކަމުގައިވިޔަސް،" އެ ފައިސާ މާފުކޮށްދެއްވާފައިވާ ކަމަށެވެ.
"ކޮރޯނާ ބަލިމަޑުކަމުގެ ސަބަބުން މިފައުންޑޭޝަނަށާއި ވިލާ ކުންފުންޏަށް ފޫނުބެއްދޭވަރުގެ ބޮޑެތި ގެއްލުންތަކެއް ވަމުންދިޔަކަމުގައި ވިޔަސް، މި ދަނޑިވަޅަކީ މުޅި ދުނިޔެއަށާއި މި ދިވެހި ގައުމަށް ދިމާވެފައިވާ މިނުރައްކާތެރި ބަލިމަޑުކަމުގެ ސަބަބުން ޑޮކްޓަރުންނާއި ނަރުހުންނާއި އަދި މެޑިކަލް ދާއިރާގެ ސްޓާފުން ވަރައް ބުރަކޮށް އަދި އެހައިމެ އަވަދިނެތި ވަރަށްގިނަ ވަގުތު މަސަތްކަތްތަކެއް ދަނީ އުޅުއްވަމުން،" ގާސިމް އެ ބަޔާނުގައި ވިދާޅުވި އެވެ.
ލޯނަށް މާފް ދިނުމަށް ނިންމީ، ސިއްހީ ހިދުމަތްތެރިން އިންސާނިއްޔަތަަށްޓަކައި ކުރަން ޖެހިފައިވާ މި ނުރައްކާތެރި އަދި މަތިވެރި ހިދުމަތުގެ އަގުވަޒަންކުރުމުގެ ގޮތުން ކަމަށް ގާސިމް ވިދާޅުވި އެވެ. އަދި ވޭތުވެދިޔަ ދޮޅު އަހަރެއްހާ ދުވަހު ވަރުބަލިކަމެއް ނެތި އެ ހިދުމަތްތެރިން ކުރައްވަމުންގެންދާ ބުރަ މަސައްކަތްތައް ފާހަގަކޮށް، ސިއްހީ ހިދުމަތްތެރިންނަށް އިލާސްތެރިކަމާއިއެކު ގާސިމް ޝުކުރު އަދާކުރެއްވި އެވެ.
"ތިޔަ ހުރިހާ ބޭފުޅުން މި ނާޒުކު ދަނޑިވަޅުގައި ދިވެހި ގައުމަށް ހިދްމަތްކޮށްދެއްވުމުގައި އިހުނަށް ވުރެ ބޮޑަށް ސާބިތުވެ ތިއްބަވާނެކަން އެއްވެސް ޝައްކެއްނެތި އަޅުގަނޑު ހިތުގެއަޑިން ޔަގީން ކުރަން،" ގާސިމް ވިދާޅުވި އެވެ.
އޭނާ ވިދާޅުވީ، މިވަގުތަކީ އެންމެން އެކަކު އަނެކަކަށް މަދަދުވެރިވެ، ކެތްތެރިކަމާ އެއްބައިވަންތަކަމާއެކު މަސައްކަތްކުރަންވީ ވަގުތު ކަމަށެވެ. އަދި ސަރުކާރާ ރައްޔިތުން އެކުގައި ކުރަމުންގެންދާ މިންނެތް މަސައްކަތްތަކުގައި ރަހުމަތް ލައްވަވައި، މި ވައިރަހުގެ ވަބާއިން ގައުމުގެ އެންމެހާ ރައްޔިތުންނާއި މުޅި އިންސާނިއްޔަތު ސަލާމަތްކުރުމަށް ގާސިމް އެ ބަޔާނުގައި ދުއާ ދެންނެވި އެވެ.
ގާސިމްގެ ދީލަތި އެހީގައި އަދި ލޯނުގެ އެހީގައިވެސް ރާއްޖޭގައި ގިނަ އަދަދަށް ދަރިވަރުން މަތީ ތައުލީމް ހާސިލްކޮށް، ވަޒީފާ އަދާ ކުރަމުންދެއެވެ. އަދި މިހާރުވެސް ބައެއް ދަރިވަރުން އަންނަނީ، އެ އެހީގައި ތައުލީމް ހާސިލް ކުރަމުންނެވެ.