25 May 2021, 12:33
އިންޓަނެޓުގެ އަގަށް ގެންނަ ހެޔޮ ބަދަލު އާންމުކުރުން އަނެއްކާ ވެސް ފަސްކޮށްފި އެވެ.
އިންޓަނެޓުގެ އަގަށް ގެންނަ ހެޔޮ ބަދަލާ ގުޅޭ ކަންތައް ވިލަރެސް ކުރަނީ ރައީސް އޮފީހުންނެވެ. އަދި އަގަށް ގެންނަ ބަދަލު އާންމު ކުރަން މިއަދު ހެނދުނު 10:00 ރަސްމިއްޔާތެއް އޮންނާނެ ކަމަށް އެންވަޔަރަންޓް މިނިސްޓްރީން އިއްޔެ ބުންޏެވެ.
އެހެން ނަމަވެސް މިއަދު ވެސް އެ އަގުތައް އާންމު ކުރެވޭ ގޮތް ވަނީ ނުވެފަ އެވެ. ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ އިންޓަނެޓުގެ ހިދުމަތާ ގުޅޭ ސަރުކާރުގެ އާ ސިޔާސަތު، މި މަހުގެ 27 ވާ ބުރާސްފަތި ދުވަހުގެ 10 ޖަހާއިރު އިއުލާނު ކުރާނެ ކަމަށެވެ.
އިންޓަނެޓުގެ އަގަށް ހެޔޮ ބަދަލު ގެނައުމަކީ މި ސަރުކާރުގެ ވައުދެކެވެ. އެ މަސައްކަތް ލަސްވާތީ އާންމުންގެ ފާޑު ކިޔުންތައް އަބަދުވެސް ސަރުކާރަށް އަމާޒުވެ އެވެ.
މީގެ ކުރިން ސައިންސް އެންޑް ޓެކްނޮލަޖީ މިނިސްޓްރީ އޮތް އިރު އޭރުގެ މިނިސްޓަރު މަލީހު ޖަމާލު ވިދާޅުވެފައިވަނީ މިނިސްޓްރީގެ ފަރާތުން ކުރަންޖެހޭ ކަންތައް ކޮށް އަގަށް ބަދަލު ގެނައުމަށް ރައީސް އޮފީހަށް ފޮނުވާފައިވާ ކަމަށެވެ.