23 May 2021, 19:58
ކޮވިޑު 19 އަށް ފަރުވާ ހޯދާ އެންމެ ގިނަ މީހުން އެޑްމިޓު ކޮށްފައި ތިބޭ ހުޅުމާލޭ މެޑިކަލް ފެސިލިޓީގައި އެކަށީގެންވާ ވަރަށް ސިއްހީ އެހީތެރިން ނެތްކަމަށް ބުނެފި އެވެ.
މިއަދު ހެލްތު އިމަޖެންސީ އޮޕަރޭޝަން ސެންޓަރުން ބޭއްވި ނޫސްވެރިންގެ ބައްދަލުވުމުގައި ހުޅުމާލެ ހޮސްޕިޓަލްގެ ސީއީއޯ އަދި ހުޅުމާލެ މެޑިކަލް ފެސިލިޓީ ހިންގުމާ ހަވާލުވެ ހުންނެވި މާރިޔާ ސައީދު ވިދާޅުވީ ހުޅުމާލެ މެޑިކަލް ފެސިލިޓީގައި އެކަށީގެންވާ ވަރަށް ސްޓާފުން ނެތް ކަމަށާއި ނަމަވެސް ސްޓާފުން ތިބި މިންވަރުން އެންމެ ބޮޑަށް އެހީތެރިކަން ބޭނުންވާ މީހުންނަށް އިސްކަން ދީގެން ސްޓާފުން ބަހާލާފައިވާ ކަމަށެވެ.
ހުޅުމާލެ މެޑިކަލް ފެސިލިޓީގައި އައިސީޔޫ އެނދާއެކު ޖުމްލަ 274 އެނދު އެބަހުއްޓެވެ. އޭގެ ތެރެއިން 188 އެނދުގައި އިއްޔެ އާ ހަމައަށް މީހުން އެޑްމިޓުކޮށްފައި ތިއްބެވެ. އެ ފެސިލިޓީގައި ތިން ޑަޔަލިސިސް އެނދު ހުންނަ ކަމަށް މާރިޔާ ވިދާޅުވި އެވެ.
ހުޅުމާލެ ފެސިލިޓީ އެންމެ ފުރަތަމަ ފަށައިގަތް އިރު އެތަނުގައި މަސައްކަތް ކުރެއްވީ 19 ޑޮކްޓަރުން ނަމަވެސް މިހާތު 34 ޑޮކްޓަރުންނާއި 116 ނަރުހުން އެތަނުގައި މަސައްކަތް ކުރައްވަ އެވެ. ޑޮކްޓަރުންނާއި ނަރުހުންގެ ތެރެއިން ކޮންމެ ޝިފްޓަކުވެސް ތިންބައިކުޅަ އެއްބައި މީހުން މަސައްކަތަށް ނިކުމެ އެވެ.
"ވޯޑުތަކަށް ބަހާލީމާ ސްޓޭންޑާޑަށް ވުރެ މެޑިކަލް ޕްރޮފެޝަނަލުން މަދު،" މާރިޔާ ވިދާޅުވި އެވެ.
އޭނާ ވިދާޅުވީ ހާއްސަ އެހީތެރިކަމާއި ފަރުވާ ބޭނުންވާ މީހުންނަށް އިސްކަން ދީގެން ފަރުވާގެ ކަންތައް ކުރިއަށް ގެންދާ ކަމަށެވެ. އަދި އެ ފެސިލިޓީގައި ތިބޭ ބަލިމީހުން ކައިރިއަށް އައިޖީއެމްއެޗުގެ ސްޕެޝަލިސްޓުން ރޫޓިން ކޮށް ވަޑައިގަންނަވާ ކަމަށްވެސް ވިދާޅުވި އެވެ.
މީގެ އިތުރުން ހުޅުމާލޭ ހޮސްޕިޓަލުގެ އިންޕޭޝަންޓު ހިދުމަތްތައް މެދުކަނޑާލާފައިވާއިރު ހުޅުމާލޭ ހޮސްޕިޓަލުގެ މެޑިކަލް ސްޓާފުންގެ 45 ޕަސެންޓު ޝިފްޓު އުސޫލުން މެޑިކަލް ފެސިލިޓީ އަށް ނިކުންނަމުންދާ ކަމަށް މާރިޔާ ވިދާޅުވި އެވެ.
ރާއްޖޭގައި ކޮވިޑުގެ ހާލަތު ގޯސްވެ، ބަލި ޖެހޭ މީހުންގެ އަދަދު ބޮޑުތަނުން އިތުރުވެފައިވައިރު ބަލީގައި މަރުވާ މީހުންގެ އަދަދުވެސް ވަނީ އިތުރުވެފަ އެވެ. މި މެއި މަހުގެ މިހާތަަނަށް 50 އަށް ވުރެ ގިނަ މީހުން ވަނީ ބަލީގައި މަރުވެފަ އެވެ.