21 May 2021, 10:48
ކޮވިޑް19 އަށް ފަރުވާ ހޯދަމުން ދިޔަ އިތުރު މީހަކު މަރުވެ، ބަލީގައި ރާއްޖެއިން މަރުވި މީހުންގެ އަދަދު 117 އަށް އަރައިފި އެވެ.
ހެލްތު ޕްރޮޓެކްޝަން އެޖެންސީން ބުނީ، ހުޅުމާލޭ މެޑީކަލް ފެސިލިޓީގައި ފަރުވާ ހޯދަމުން ދިޔަ އުމުރުން 77 އަހަރުގެ ދިވެހި ފިރިހެނަކު މިއަދު ފަތިހު 04:06 ގައި މަރުވެފައިވާ ކަމަށެވެ.
އިއްޔެ ރާއްޖެއިން ކޮވިޑުގައި ހަތަރު މީހަކު ވަނީ މަރުވެފަ އެވެ. އެއީ ލ. ގަން ކޮވިޑް ފެސިލިޓީގައި ފަރުވާދިން އުމުރުން 36 އަހަރުގެ ނޭޕާލްގެ ފިރިހެނަކާއި، އޭޑީކޭ ހޮސްޕިޓަލްގެ އީއާރަށް ގެންދިޔަ 62 އަހަރުގެ ފިރިހެނަކާއި، ހުޅުމާލޭ މެޑިކަލް ފެސިލިޓީގައި ފަރުވާ ދެމުންދިޔަ 72 އަހަރުގެ ފިރިހެނަކާއި 93 އަހަރުގެ އަންހެނެކެވެ.
ކޮވިޑް އިންތިހާއަށް މާލޭގައި ގިނަވެފައިވާއިރު ކޮވިޑުގައި މަރުވާ މީހުންގެ އަދަދުވެސް އަންނަނީ އިތުރުވަމުންނެވެ. ސިއްހީ ނިޒާމަށް ބާރުބޮޑުވެ ފަރުވާ ދިނުމަށް ދަތިތަކާއި ކުރިމަތިލާން ޖެހިފައިވާ ކަމަށް ސިއްހީ ދާއިރާގެ ބައެއް ބޭފުޅުން އަންނަނީ ވިދާޅުވަމުންނެވެ.
އިއްޔެ ޕޮޒިޓިވްވި 2000 އަށް ވުރެ ގިނަ މީހުންނާ އެކު، މިވަގުތު ކޮވިޑް ޖެހިފައި ތިބި 20،276 މީހުން ރާއްޖޭގައި އެބަ ތިއްބެވެ. އޭގެ ތެރެއިން 280 މީހަކަށް ފަރުވާ ދެނީ ހޮސްޕިޓަލުގައި އެޑްމިޓްކޮށްގެންނެވެ.