20 May 2021, 22:47
ކޮވިޑް19 އަށް ޕޮޒިޓިވްވާ މީހުން ބޮޑުތަން އިތުރުވެ، ކޮންޓެކްޓުން އިންތިހާއަށް އިތުރުވެފައިވާ ތީ، ހަމައެކަނި ހައި ރިސްކް މީހުންގެ ކޮންޓެކްޓް ޓްރޭސިން ހަދާގޮތަށް އުސޫލަށް ބަދަލު ގެނެސްފި އެވެ.
ހެލްތު އެމާޖެންސީ ސެންޓަރުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި އެޗްއީއޯސީގެ ކޮންޓެކްޓް ޓްރޭސިން ޓީމުގެ ފަރާތުން ބައިވެރިވަޑައިގެންނެވި އާމިނަތު އަރޫޝާ ވިދާޅުވީ އުސޫލަށް ބަދަލު ގެނައީ ހައި ރިސްކް މީހުން އަވަހަށް ދެނެގަނެ، އެމީހުންނަށް ބޭނުންވާ ހިދުމަތްތައް އަވަހަށް ފޯރުކޮށްދިނުމަށް ކަމަށެވެ.
އަރޫޝާ ވިދާޅުވީ މިހާރު ދުވާލަކު އެވްރެޖްކޮށް، 1500 އެއްހާ ކޭސް ރިޕޯޓުކުރާއިރު، އެ އެންމެންގެ ކޮންޓެކްޓުންނަށް ގުޅައި މައުލޫމާތު ހޯދުމަށް ގިނަ ވަގުތު ނަގާތީ، ހައި ރިސްކް މީހުން ދެނެގަނެ އެމީހުންނަށް ހިދުމަތްތައް ފޯރުކޮށްދޭން ލަސްވާތީ ކަމަށެވެ.
"އެހެންކަމުން މިހާރު ކޮންޓެކްޓް ޓްރޭސް ކުރާއިރުގައި، ކޮންޓެކްޓް ޓްރޭސް ކުރެވެމުން ދާނީ ޕޮޒިޓިވް ކޭސް އަކާ ދިމާވެފައި ހުރި ހައި ރިސްކް ބޭފުޅުންގެ މައުލޫމާތު އަޅުގަނޑުމެން އެއްކުރަމުން ދާނީ. މީގެ ބޭނުމަކީ ހައި ރިސްކް މީހުން ވީހާވެސް އަވަހަށް ދެނެގަނެ ބޭނުންވާ ހދުމަތްތައް ވީހާވެސް އަވަހަށް ފޯރުކޮށްދިނުން،" އަރޫޝާ ވިދާޅުވި އެވެ.
ހައި ރިސްކް މީހުންގެ ގޮތުގައި ބަލާނީ އުމުރުން 60 އަހަރުން މަތީގެ މީހުންނާއި، އެއް އަހަރުން ދަށުގެ ކުޑަކުދިންނާއި، މާބަނޑު މީހުންނާއި، ނުކުޅެދުންތެރިކަން ހުންނަ މީހުންނާއި އަދި ނޭވާލުމުގައި ދަތިތައް އުޅޭ މީހުންނެވެ.
މި އުސޫލަށް އަމަލުކުރާނީ ހަމައެކަނި މާލެ ސަރަހައްދުގަ އެވެ. އަތޮޅު ތެރޭގެ ރަށްތަކާއި، ރިސޯޓުތަކުގައި އަދިވެސް ކޮންޓެކްޓް ޓްރޭސިން ހަދާނީ ކުރީގެ އުސޫލަށެވެ.
އަރޫޝާ ވިދާޅުވީ ހައި ރިސްކް ކެޓަގަރީއަކަށް ނުފެތުނު ނަމަވެސް ޕޮޒިޓިވް މީހަކާ ދިމާވެފައިވާކަން އެނގޭ ހިސާބުން އެކަން 1676 އަށް ގުޅައި އެޗްޕީއޭ އަށް އެންގޭނެ ކަމަށެވެ. އަދި މެއިލް މެދުވެރިކޮށް ވެސް އެކަން އެންގޭނެ އެވެ. ޕޮޒިޓިވްވާ މީހުންނަށް ވެސް، އެމީހުންގެ ކޮންޓެކްޓުން އެޗްޕީއޭ އަށް އެނގޭނެ އެވެ.