20 May 2021, 20:11
ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އޭޑީކޭގައި ފަރުވާދެމުން ދަނިކޮށް އެ ހޮސްޕިޓަލުގެ ފާހާނާ އެއްގެ ތެރެއިން ފެނުނު ފިސްތޯލައަކީ އެމަނިކުފާނުގެ ބޮޑީ ގާޑެއްގެ އެއްޗެއްކަން އެނގިއްޖެ އެވެ.
މި މަހުގެ ހަވަނަ ދުވަހު ރައީސް ނަޝީދުގެ ގެކޮޅު ކެނެރީގެއިން ނިކުމެ ކާރުކޮޅަށް އަރުއްވަނިކޮށް ދިން ބޮމުގެ ހަމަލާއަށް ފަހު އެމަނިކުފާނަށް ލިބުނު ޒަހަމްތަކަށް އޭޑީކޭގައި ފަރުވާ ހޯއްދަވަމުން ދަނިކޮށް އެ ހޮސްޕިޓަލްގެ ފާހާނާ ތެރެއިން ފިސްތޯލެއް ފެނުނު މައްސަލަ ވަނީ ފެންމަތިވެފަ އެވެ.
"ސަން"އަށް އެނގިފައިވާ ގޮތުގައި އޭޑީކޭ ހޮސްޕިޓަލްގެ ފާހާނާގެ ތެރެއިން ފެނުނު ފިސްތޯލައަކީ ރައީސް ނަޝީދުގެ ހަށިފާރަވެރިއެއްގެ ފިސްތޯލައެކެވެ. އަދި އެ ފިސްތޯލަ އެތަނުގައި ބޭއްވުނީ އޭނާއަށް ކަމަށް ވެސް އެނގިފައިވެ އެވެ.
ރައީސް ނަޝީދަށް ދިން ހަމަލާގެ މައްސަލައިގައި މިއަދު ފުލުހުން ބޭއްވި ނޫސްވެރިންގެ ބައްދަލުވުމުގައި އެކަމާ ގުޅިގެން ސުވާލު ކުރުމުން ޗީފް ސްޕްރިންޓެންޑެންޓް އޮފް ޕޮލިސް ހަސަން ބަޝީރު ވިދާޅުވީ މައްސަލަ އާ ގުޅޭ މައުލޫމާތު ޕްރެސް އަށް ނުގެނެވޭ ކަމަށެވެ.
އެފަދަ މައްސަލައެއް ހުށަހެޅިފައިވާކަން އޭނާ ދޮގެއް ނުކުރައްވަ އެވެ.
"އެކަމާ ގުޅޭ މައުލޫމާތު މި ޕްރެސް އަށް ގެނެވިފައެއް ނެތް. އެހެންވީމާ ފަހުގެ ވަގުތެއްގައި އަޅުގަނޑުމެން ޕޮލިސް މީޑިއާ މެދުވެރިކޮށް އެއާ ގުޅޭ މައުލޫމާތު ހިއްސާ ކުރެވެން އޮތް މިންވަރަކަށް ހިއްސާ ކުރާނަން،" އޭނާ ވިދާޅުވި އެވެ.
އެ މައްސަލާގައި އިތުރު ކޮމެންޓެއް ހޯދުމަށް ފުލުހުންގެ މީޑިއާ އަށް ގުޅުމުން މީޑިއާ އޮފިސަރު ވިދާޅުވީ ރައީސް ނަޝީދުގެ ސެކިޔުރިޓީ ކަންތައް ބަލަހައްޓަނީ އެމްއެންޑީއެފް އިން ކަމަށާއި އެ ކަމުގައި އެމްއެންޑީއެފް އިން ކޮމެންޓެއް ހޯދަން އެދޭ ކަމަށެވެ. އަދި އިތުރު ކޮމެންޓެއް ފުލުހުންގެ ފަރާތުން ދޭން އޮތްނަމަ އެކަން ބެލުމަށްފަހު ހިއްސާ ކުރާނެ ކަމަށްވެސް ބުންޏެވެ.
ފިސްތޯލަ ފެނުނު ކަމަށް ބުނާ މައްސަލާގައި އެމްއެންޑީއެފްގެ ބަހެއް ހޯދުމަށް ކުރި މަސައްކަތުން މިހާތަނަށް ކޮމެންޓެއް ލިބިފައެއް ނުވެ އެވެ.
އޭޑީކޭ ހޮސްޕިޓަލުގެ ފާހާނާ ތެރެއިން ފިސްތޯލައެއް ފެނުނު މައްސަލާގައި އެއްވެސް ފަރާތަކުން ރަސްމީކޮށް ބަހެއް ބުނެފައެއް ނުވެ އެވެ. ނަމަވެސް ބައެއް މީޑިއާ ތަކުން ރިޕޯޓުކޮށްފައިވާ ގޮތުން ފެނުނު ފިސްތޯލަ އަކީ އޭރު ސަލާމަތީ ކަންތައް ބަލަހައްޓަމުން ދިޔަ އެމްއެންޑީއެފް އޮފިސަރެއް ގެންގުޅުނު ފިސްތޯލަ އެކެވެ. އެ ފިސްތޯލަ ބޭއްވިފައި އޮތީ އޮފިސަރު ފާހާނާ އަށް ވަތްއިރު ކަމަށާއި، އޭތި ފެނިގެން ފުލުހުންނަށް އެކަން އެންގީ އޭޑީކޭގެ މުވައްޒަފެއް ކަމަށް ވެއެވެ. އަދި އެ ފިސްތޯލަ ސިފައިންނާ ހަވާލުކުރީ ފުލުހުންނެވެ.
މެއި ހަވަނަ ދުވަހުގެ ރޭ ދިން ހަމަލާތަކާ ގުޅިގެން ލިބުނު ޒަހަމްތަކަށް ފަރުވާ ހޯއްދެވުމަށް ރައީސް ނަޝީދު މިހާރު ހުންނެވީ ޖަރުމަނުގަ އެވެ.