20 May 2021, 13:53
އިންޓަނޭޝަނަލް އެއިޑް ކެމްޕެއިން (އައިއޭސީ)އިން ކުރިއަށްގެންދާ "ލޯތްބާއެކު 2021" ކެމްޕޭންގެ މުއްދަތު އިތުރުކުރަން ނިންމައިފި އެވެ.
އެ ކެމްޕޭނަކީ ދިވެހިންގެ ނަމުގައި ގެދޮރު ގެއްލި ހާލުގައި ޖެހިފައިވާ ފަލަސްތީނު ރައްޔިތުންނަށް އެހީތެރިކަން ފޯރުކޮށްދޭން އައިއޭސީއިން ކުރިއަށްގެންދާ ކެމްޕޭނެކެވެ.
ކުރިން ނިންމާފައި އޮތީ ޝައްވާލު މަހުގެ ފުރަތަމަ ހަ ދުވަސް ނިމެންދެން އެ ކެމްޕޭން ކުރިއަށްގެންދާ ގޮތަށެވެ. އެހެން ނަމަވެސް އައިއޭސީއިން ބުނީ ވަރަށް ގިނަ ފަރާތްތަކުގެ އެދުމުގެ މަތިން އެ ކެމްޕޭންގެ މުއްދަތު އަންނަ ޖޫން މަހުގެ ފަސްވަނަ ދުވަހުގެ ނިޔަލަށް އިތުރުކުރަން ނިންމާފައިވާ ކަމަށެވެ.
"މިގިތަށް މުއްދަތު އިތުރު ކުރީ މަދަނީ ޖަމްއިއްޔާތަކުންނާއި ކުދި އަދި ބޮޑު ވިޔަފާރިތަކުން އަދި އަމިއްލަ ފަރުދުން ވެސް ފަލަސްތީނަށް އެހީވާން ބޭނުން ކަމަށް ބުނެ އަޅުގަނޑުމެންނަށް ގުޅަމުން ގެންދާތީ އެ ފުރުސަތު ވީއެންމެ ގިނަ ބަޔަކަށް ފަހިކޮށްދިނުމުގެ މަގްސަދުގައި." އައިއޭސީއިން ބުނެ އެވެ.
މި ކެމްޕޭނުގައި ބައިވެރިވެ، ހާލުގައި ޖެހިފައި ތިބި ފަލަސްތީނު ރައްޔިތުންނަށް އެހީވާން ފައިސާ ޖަމާކުރާނެ ބޭންކް އޮފް މޯލްޑިވްސް އިސްލާމިކްގެ އެކައުންޓް ނަންބަރަކީ: 7770000026259 (ރުފިޔާ އެކައުންޓް) އެވެ. އަދި އިތުރު މައުލޫމާތު 9122121 ނަންބަރަށް ގުޅުމުން ލިބޭނެ އެވެ.
އައިއޭސީއިން އަންނަނީ ދިވެހީންގެ އެހީގެ ގޮތުގައި ކާބޯތަކެއްޗާއި އަންނައުނު ވެސް ފަލަސްތީނު ރައްޔިތުންނާ ފޯރުކޮށްދެމުންނެވެ.
ހަމަލާތަކުގެ ސަބަބުން ގެތަށް ބިމާހަމަވެ މަގުމަތިވެފައިވާ ފަލަސްތީނުގެ އާއިލަތަކަށް ދިވެހީންގެ ފަރާތުން ލިބުނު އެހީ ނަގުދު ފައިސާގެ ގޮތުގައި އައިއޭސީގެ ތިން ޕާޓްނަރެއް މެދުވެރިކޮށް ޣައްޒާގެ 90 އާއިލާއަށް ވަނީ ބަހާފަ އެވެ. އެ އާއިލާތަކުގެ ތެރެއިން ކޮންމެ އާއިލާއަކަށް 100 އެމެރިކާ ޑޮލަރުގެ މަގުން ފައިސާ ފޯރުކޮށްދީފައިވާނެ ކަމަށް އެ ކެމްޕެއިން އިން ބުންޏެވެ.
މީގެ އިތުރުން އިޒްރޭލުން ފަލަސްތީނަށް ދެމުންގެންދާ ހަމަލާތަކާ ގުޅިގެން ފަލަސްތީނުގެ އެންމެ ބޮޑު ހޮސްޕިޓަލް، އަލް ޝިފާ ހޮސްޕިޓަލްގެ ކަރަންޓު ހިދުމަތަށް މިފަހުން ބުރޫއެރުމުން، ދިވެހިން ފޯރުކޮށްދިން ފައިސާގެ އެހީއާ އެކު އައިއޭސީއިން ވަނީ އެ މައްސަލަ ހައްލުކޮށްދީފަ އެވެ.