17 May 2021, 11:12
ލަންޑަން (މެއި 17): އިންޑިއާގައި ކޮވިޑް-19 އިންތިހާއަށް ފެތުރި، ހާލަތު ގޯސްވުމުގެ ސަބަބުން ކޮވެކްސް ސްކީމަށް ވެކްސިން ހޯދުން ދަތިވެއްޖެ އެވެ.
ދުނިޔޭގެ ގައުމުތަކަށް ހަމަހަމަކަމާ އެކު ކޮވިޑް ވެކްސިން ލިބޭނެކަން ޔަގީން ކުރުމަށް މަަސައްކަތް ކުރާ ކޮވެކްސްއަށް އެންމެ ގިނަ އަދަދަކަށް ވެކްސިން ފޯރުކޮށްދޭން އެއްބަސްވެފައި ވަނީ ސެރަމް އިންސްޓިޓިއުޓް އޮފް އިންޑިއާ (އެސްއައިއައި)އިންނެވެ. އެގޮތުން މި އަހަރު ކޮވެކްސްއިން ގައުމުތަކަށް ފޮނުވަން މަސައްކަތް ކުރާ ދެ ބިލިއަން ވެކްސިން ޑޯޒްގެ ތެރެއިން ދެބައި ކުޅަ އެއްބައި ސަޕްލައި ކުރަން ހަމަޖެހިފައި ވަނީ އެސްއައިއައި އިންނެވެ.
ނަމަވެސް އިންޑިއާގައި ކޮވިޑްގެ ކޭސްތައް ރެކޯޑު އަދަދުތަކަށް އަރަން ފެށުމުން އެގައުމުން ވަނީ އެސްއައިއައި އިން އުފައްދާ ކޮވިޝީލްޑް ވެކްސިން އެކްސްޕޯޓު ކުރުން މިދިޔަ މާޗް މަހު ހުއްޓުވައިފަ އެވެ. އަދި ފާއިތުވި ދެ މަސް ތެރޭ އެސްއައިއައިއިން ކޮވެކްސްއަށް ވެކްސިންގެ 140 މިލިއަން ޑޯޒް ހަވާލު ކުރަން ހަމަޖެހިފައި އޮތް ނަމަވެސް އެ ކުންފުނިން އެއްވެސް ވަރަކަށް ވެކްސިން ފޮނުވާފައި ނުވެ އެވެ.
"އިތުރު ޑޯޒްތައް ލިބޭނީ ކޮން އިރަކު ކަން ނޭނގޭ ހާލަތެއްގައި އަޅުގަނޑުމެން މިތިބީ. އަޅުގަނޑުމެންގެ އުއްމީދަކީ ޝެޑިއުލްއާ އެއްގޮތަށް އަނެއްކާ ވެސް ކުރިއަށް ދާނެ ކަމަށް ނަމަވެސް އިންޑިއާގެ ހާލަތަށް ވާނެ ގޮތް ލަފާ ކުރަން ދަތި އަދި އެއީ ވަރަށް ބޮޑު ކަންބޮޑުވުމެއް،" ޔުނިސެފްގެ ކޮވެކްސް ކޯޑިނޭޓަރު ގިއަން ގާންދީ ވިދާޅުވި އެވެ.
ކޮވެކްސްއަށް ވެކްސިން ގަނެ، ޑިސްޓްރިބިއުޓް ކުރާ ޔުނިސެފުން ވަނީ ދުނިޔޭގެ އިގުތިސާދީ ގޮތުން އެންމެ ކުރި އަރާފައިވާ ހަތް ގައުމު ހިމެނޭ ޖީ7އިން އިތުރުވާ ވެކްސިން ޑޯޒްތައް އެ ސްކީމަށް ހަދިޔާ ކުރުމަށް އެދިފަ އެވެ. އެ ޖަމިއްޔާއިން ބުނި ގޮތުގައި އެ ހަތް ގައުމުގެ އާބާދީއަށްވާ ވަރަށް ވެކްސިން ރައްކާ ކުރުމަށް ފަހު އެ ގައުމުތަކުން 153 މިލިއަން ޑޯޒް ހަދިޔާ ކުރެވޭނެ އެވެ. އަދި ބައެއް ގައުމުތަކުން ވަނީ އެގައުމުތަކުގެ އާބާދީއަށް އެތައް ފަހަރަކު ވެކްސިން ޖެހޭ ވަރަށް ވެކްސިން އޯޑަރު ކޮށްފައި ކަމަށް ޔުނިސެފުން ބުންޏެވެ. އޭގެ ތެރޭގައި އެމެރިކާ، އިނގިރޭސިވިލާތް އަދި ކެނެޑާ ހިމެނެ އެވެ.
ކޮވެކްސްއިން ވަނީ މިހާތަނަށް 122 ސަރަހައްދަކަށް ކޮވިޑް ވެކްސިންގެ 60 މިލިއަން ޑޯޒް ފޮނުވާފަ އެވެ.
އިންޑިއާގައި މިހާތަނަށް ކޮވިޑް ވެކްސިން ޖަހާފައި ވަނީ އާބާދީގެ 11 ޕަސެންޓަށެވެ. އޭގެ ތެރެއިން ދެ ޑޯޒް ޖަހާފައި ވަނީ 2.9 ޕަސެންޓަށެވެ. އެގައުމުން ފެނުނު ކޮވިޑް ކޭސްތަކުގެ އަދަދު މިހާރު 24.7 މިލިއަނަށް އަރާ، ބަލީގައި 270،000އަށް ވުރެ ގިނަ މީހުން ވަނީ މަރުވެފަ އެވެ.