16 May 2021, 17:13
ކޮވިޑް19 ގައި ރާއްޖެއިން އިތުރު މީހަކު މަރުވެ ޖުމްލަ އަދަދު 97 އަށް އަރައިފި އެވެ.
އެޗްޕީއޭ އިން ބުނީ ހުޅުމާލޭ މެޑިކަލް ފެސިލިޓީގައި ފަރުވާ ދެމުންދިޔަ 83 އަހަރުގެ މީހަކު މިއަދު 3:10 ހާއިރު މަރުވެފައިވާ ކަމަށެވެ. މިއީ މިއަދު ކޮވިޑުގައި ރާއްޖެއިން މަރުވި ތިންވަނަ މީހާ އެވެ.
މިއަދު އުމުރުން 30 އަހަރުގެ މީހަކުވެސް ވަނީ ކޮވިޑު ބަލީގައި މަރުވެފައެވެ. އަދި 87 އަހަރުގެ މީހަކުވެސް ހުޅުމާލޭ މެޑިކަލް ފެސިލިޓީގައި ފަރުވާ ދެމުން ދަނިކޮށް ވަނީ މަރުވެފަ އެވެ.
މިފަހަކަށް އައިސް ރާއްޖޭގައި ކޮވިޑް ޖެހިގެން މަރުވާ މީހުންގެ އަދަދު މިވަނީ ވަރަށް ބޮޑަށް އިތުރު ވެފަ އެވެ.
ރާއްޖޭގައި ބަލީގެ ކޭސްތައް ފެންނަ މިންވަރު ވެސް ތައް ގުނައެއް އިތުރު ވެފައިވާއިރު ރާއްޖޭގައި ދުވާލެއްގެ މައްޗަށް 1،000 އަށް ވުރެ ގިނަ ކޭސް ދަނީ ފެންނަމުންނެވެ.
މިވަގުތު 15،000 އަށް ވުރެ ގިނަ މީހުން ދަނީ ކޮވިޑަށް ފަރުވާ ހޯދަމުންނެެވެ.
އޭގެ ތެރެއިން 260 މީހުންނަށް ފަރުވާ ދެމުން ދަނީ އެޑްމިޓްކޮށްގެންނެވެ.