15 May 2021, 15:29
ދިއްލީ (މެއި 15): އިންޑިއާގައި ކޮވިޝީލްޑް ވެކްސިންގެ ފުރަތަމަ ޑޯޒް ޖެހުމަށް ފަހު ދެވަނަ ޑޯޒް ޖަހާ މުއްދަތު 12 ހަފްތާ އާއި 16 ހަފްތާއާ ދެމެދުގެ މުއްދަތަކަށް ފަސް ކުރަން ސަރުކާރުގެ ޕެނަލަކުން ލަފާ ދީފި އެވެ.
އިންޑިއާގައި ކޮވިޝީލްޑްގެ ދެވަނަ ޑޯޒް ޖަހަން ޖެހޭ މުއްދަތު މިހާރު އޮތް ހަތަރު ހަފްތާއާއި އަށް ހަފްތާއާ ދެމެދުގެ މުއްދަތުން 12 އާއި 16 ހަފްތާއާ ދެމެދުގެ މުއްދަތަކަށް އިތުރު ކުރަން ލަފާ ދިނީ އެގައުމުގެ ނެޝަނަލް ޓެކްނިކަލް އެޑްވައިޒަރީ ގްރޫޕް އޮން އިމިއުނައިޒޭޝަން (އެންޓީއޭޖީއައި)އިންނެވެ.
އެންޓީއޭޖީއައި އިން އެގޮތަށް ލަފާ ދީފައި ވަނީ އިންޑިއާގައި ކޮވިޝީލްޑް ލިބުމުގައި ދަތިތަކާ ކުރިމަތިލާން ޖެހިފައިވާ ދަނޑިވަޅެއްގަ އެވެ. އަދި ދެވަނަ ޑޯޒް ޖަހާ މުއްދަތު ފަސް ކުރަން ލަފާ ދިނީ އޭގެ ސަބަބުންތޯ ސުވާލު ކުރުމުން އެންޓީއޭޖީއައި އިން ވަނީ އެ ވާހަކަ ދޮގުކޮށްފަ އެވެ.
އެ ގުރޫޕުން ބުނި ގޮތުގައި ކޮވިޝީލްޑްގެ ދެވަނަ ޑޯޒް ދޭ މުއްދަތު ފަސް ކުރަން ޖެހެނީ އޭގެ ސަބަބުން ވެކްސިނުން ފޯރުކޮށްދޭ ރައްކާތެރިކަން އިތުރުވާތީ އެވެ. އެގޮތުން އިނގިރޭސިވިލާތުގައި އެސްޓްރާޒެނެކާ ވެކްސިންގެ ދެވަނަ ޑޯޒް ދޭ މުއްދަތު ތިން މަހަށް ހެދުމުން ނަތީޖާ ރަނގަޅުކަމަށް އެންޓީއޭޖީއައިގެ ޗެއާޕާސަން ޑރ. އެންކޭ އަރޯރާ ވިދާޅުވި އެވެ.
"އިނގިރޭސިވިލާތުން [ވެކްސިން] ޓެސްޓުތަކުގެ ނަތީޖާއަށް ބަލައި ޑިސެމްބަރު މަހު ނިންމީ ދެ ޑޯޒްގެ ދެމެދު ހޭދަ ކުރާ މުއްދަތު ތިން މަހަށް އިތުރު ކުރަން... އިނގިރޭސިވިލާތުގެ [ވެކްސިން] ޕްރޮގްރާމާ ގުޅުން ހުރި މައުލޫމާތު ހިމެނޭ ތިން ޕަބްލިކޭޝަނެއް އޭޕްރިލް މަހުގެ ފަހު ހަފްތާގައި ޝާއިއު ކުރި، އޭގެއިން ދެއްކީ ދެވަނަ ޑޯޒް ދޭ މުއްދަތު 12 އާއި 16 ހަފްތާއާ ދެމެދުގެ މުއްދަތަކަށް އިތުރު ކުރުމުން ވެކްސިންގެ ކާމިޔާބީ 65 އާއި 88 ޕަސެންޓާ ދެމެދުގެ މިންވަރަކަށް އިތުރުވާ ކަމަށް،" އަރޯރާ ވިދާޅުވި އެވެ.
ނަމަވެސް އިންޑިއާގެ ބައެއް ސިއްހީ މާހިރުން ވަނީ އިންޑިއާއިން ކޮވިޑްގެ އާ ވޭރިއެންޓުތައް ފެނި، ކޮރޯނާވައިރަސް އިތުރަށް ބަދަލުވަމުންދާ ދަނޑިވަޅެއްގައި ވެކްސިންގެ ދެވަނަ ޑޯޒް ދިނުން އިތުރަށް ފަސްކުރުމަކީ ބުއްދިވެރި ގޮތެއް ނޫން ކަމަށް ވިދާޅުވެފަ އެވެ. އަދި އެސްޓްރާޒެނެކާއިން އެ ކުންފުނީގެ ވެކްސިންގެ ދެވަނަ ޑޯޒް ޖެހުން 12 ހަފްތާއަށް ވުރެ އިތުރު ކުރަން ރަސްމީކޮށް އަންގާފައި ނުވާކަންވެސް މާހިރުން ފާހަގަ ކުރެއްވި އެވެ.
އިންޑިއާގައި 18 އަހަރުން މަތީގެ އެންމެންނަށް ކޮވިޑް ވެކްސިން ޖެހުމުގެ ހުއްދަ މިމަހުގެ އެކެއްގައި ދިން ނަމަވެސް އެގައުމުގެ ވެކްސިން ޕްރޮގްރާމް ފުޅާ ކުރެވޭ ވަރަށް ޑޯޒްތައް ނުލިބޭ ކަމަށް ގިނަ ސްޓޭޓުތަކުން ވަނީ ބުނެފަ އެވެ. އެ މައްސަލަ ހައްލު ކުރުމަށް އިންޑިއާ ސަރުކާރުން ވަނީ ކޮވިޑް ވެކްސިން ފޯރުކޮށްދޭނެ ގޮތުގެ މަގުޗާޓެއް އެކުލަވާލާ، މިދިޔަ ބުރާސްފަތި ދުވަހު ދައްކާލާފަ އެވެ. އަދި މި އަހަރުގެ އޮގަސްޓު މަހާއި ޑިސެމްބަރު މަހާ ދޭތެރޭ ވެކްސިންގެ ދެ ބިލިއަން ޑޯޒް ލިބޭނެ ކަމަށް ބުނެފަ އެވެ.
އިންޑިއާއިން މިހާތަނަށް ކޮވިޑް ވެކްސިން ދީފައި ވަނީ އާބާދީގެ 11 ޕަސެންޓަށެވެ. އޭގެ ތެރެއިން ދެ ޑޯޒް ޖަހާފައި ވަނީ 2.9 ޕަސެންޓު މީހުންނެވެ.
އިންޑިއާއިން މިހާތަނަށް ފެނުނު ކޮވިޑް ކޭސްތަކުގެ އަދަދު މިހާރު 24.4 މިލިއަނަށް އަރާ، ބަލީގައި 266،000އަށް ވުރެ ގިނަ މީހުން ވަނީ މަރުވެފަ އެވެ.