12 May 2021, 10:24
ވަން ޑިރެކްޝަންގެ ބޭންޑް މެންބަރު ލުއީ ޓޮމްލިންސަން، 29،ގެ ޓުއާ އަންނަ އަހަރު ބާއްވާ ގޮތަށް ހަމަޖައްސައިފި އެވެ.
މިދިޔަ އަހަރު ލުއީގެ ޓުއާ ބާއްވާގޮތަށް ކުރިން ހަމަޖެހުނު ނަމަވެސް އެފަހަރު އޭނާގެ ޓުއާ ވަކި މުއްދަތެއް ނެތް ގޮތަށް ފަސްކުރީ ކޮވިޑް19 ގެ ބަލިމަޑު ކަމުގެ ސަބަބުންނެވެ. މަޝްހޫރު ލަވަކިޔުންތެރިޔާ ލުއީ ސޯޝަލް މީޑިއާގައި ހިއްސާކުރި ޕޯސްޓެއްގައި ބުނީ ނޯތު އެމެރިކާގެ ޓުއާ އަންނަ އަހަރު ކުރިއަށް ދާނެ ކަމަށެވެ. އަދި ހުރިހާ އެންމެންނާ ދިމާވާ ކެތްމަދުވެފައި ހުރި ކަމަށްވެސް ލުއީ ވަނީ ބުނެފަ އެވެ.
ލުއީގެ އެންމެ ފަހުން ނެރުނު އަލްބަމް "ވޯލްސް" އަށް ދާދިފަހުން ވަނީ އަހަރު ވެސް ވެފަ އެވެ. ނަމަވެސް އެ އަލްބަމް ނެރުނު ފަހުން އޭނާ އަށް އަދި ވޯލްޑް ޓުއާއަކަށް ދެވިފައެއްނުވެ އެވެ. އެ އަލްބަމްގައި ހިމެނޭ އެންމެ މަޝްހޫރު ލަވަތަކުގެ ތެރޭގައި "ވޯލްސް"، "އޯލްވޭސް ޔޫ" އަދި "ޓޫ އޮފް އަސް" ހިމެނެ އެވެ.
ވަން ޑިރެކްޝަން ބޭންޑުގެ މެންބަރުން މިވަގުތު އަންނަނީީ ސޯލޯ ކޮށް މަސައްކަތް ކުރަމުންނެވެ. ދެހާސް ސޯޅަ އިން ފެށިގެން ސޯލޯކޮށް މަސައްކަތް ކުރުމަށް ފަހު އެ ބޭންޑުގެ 10 ވަނަ އަހަރީ ދުވަހާ ގުޅިގެން ރީޔޫނިއަން އެއް ބާއްވާ ވާހަކަ ދެކެވުނެވެ. ނަމަވެސް މިދިޔަ އަހަރު ލޮކްޑައުންވުމާއެކު އެކަން ވެސް ކާމިޔާބުނުވީ އެވެ. އެ ބޭންޑުގެ މެންބަރުންނަކީ ލިއަމް ޕޭން، ލުއީ ޓޮމްލިންސަން، ހެރީ ސްޓައިލްސް، ނައިލް ހޯރަން އަދި ޒޭން މާލިކްއެވެ. ނަމަވެސް ޒޭން ވަނީ އެ ބޭންޑުން 2014 ވަނަ އަހަރު ވަކިވެފަ އެވެ.