29 Apr 2021, 19:44
ކުރީގެ ރައީސް އަބްދުﷲ ޔާމީން އަބްދުލްގައްޔޫމު ގެއަށް ބަދަލުކޮށްފި އެވެ. އެމަނިކުފާނު ގެއަށް ބަދަލުކުރީ މިރޭ އިރާކޮޅު އެވެ.
ފަސް އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ރައީސް ޔާމީން ގެއަށް ބަދަލުކޮށްފައި ވަނީ އެމަނިކުފާނު ހުކުމް ތަބންފީޒު ކުރައްވަމުން ގެންދަވާ މާފުށީ ޖަލުގެ އޮފިސަރުންތަކެއް ކޮވިޑް19 އަށް ޕޮޒިޓިވް ވެފައި ވަނިކޮށެވެ.
މި ހާލަތުގައި އެމަނުފާނަށް އެންމެ ރައްކާތެރިގޮތަކީ ގެއަށް ބަދަލުކުރުން ކަމަށާއި އެކަން އެގޮތަށް ކޮށްދެއްވުމަށް އިދިކޮޅު ޕީޕީއެމް/ޕީއެންސީ ކޯލިޝަނުން ވަނީ ސަރުކާރަށް ގޮވާލައިފަ އެވެ.
ކަރެކްޝަންސް އިން ބުނި ރައީސް ޔާމީން ގެއަށް ބަދަލުކޮށްފައި ވަނީ މާފުށީ ގައި ހަލުވިކަމާއެކު ކޮވިޑް-19 ފެތުރެމުންދާ މިދަނޑިވަޅުގައި މާފުށީ ޖަލުގެ އޮފިސަރުން ޕޮޒިޓިވްވަމުންދާތީ ކަމަށެވެ.
"އެޖަލުގައި ހުކުމް ތަންފީޒު ކުރައްވަމުން ގެންދަވާ ކުރީގެ ރައީސް ޢަބްދު ﷲ ޔާމީން އަބްދުލްޤައްޔޫމް ވަނީ ވަގުތީ ގޮތުން ގޭބަންދަށް ބަދަލު ކުރެވިފަ،" ކަރެކްޝަންސްގެެެ މީޑިއާ އޮފިސަރު ވިދާޅުވި އެވެ.
"ސަން" އަށް އެނގިފައިވާ ގޮތުގައި މިއަދު ބޭއްވި ރޯދަވީއްލުމެއްގައި އެމްޑީޕީގެ ރައީސް މުހައްމަދު ނަޝީދު ވަނީ ރައީސް ޔާމީން ގޭބަންދަށް ބަދަލުކުރިޔަސް މައްސަލައެއް ނެތް ކަމަށް ރައީސް ސޯލިހު އަރިހު ދަންނަވާފަ އެވެ.
ރައީސް ޔާމީން އަށް ދެރަގޮތެއް ނުވާނެ ކަމަށާއި އެމަނިކުފާނު ގެއަށް ބަދަލުކުރަން ނުވަތަ ލުއި ގޮތެއް ހޯދައިދިނުމަށް މަޝްވަރާ ކުރަމުންދާ ކަމަށް ރައީސް އިބްރާހިމް މުހައްމަދު ސޯލިހް ވަނީ ރޯދަ މަސް ފެށުމުގެ އެއް ދުވަސް ކުރިން ވިދާޅުވެފަ އެވެ.
ސިއްހީ ހާލުކޮޅު ހުރި ގޮތުން ރައީސް ޔާމީން ގެއަށް ބަދަލުކޮށްދިނުމަށް ޕީޕީއެމްއާއި އެމަނިކުފާނުގެ އާއިލާއިން މީގެ ކުރިން އެތައް ފަހަރަކު އެދިފައިވެ އެވެ.