29 Apr 2021, 11:24
ކަލްކަޓާ (އޭޕްރިލް 29): އިންޑިއާގައި ކޮވިޑް-19އިގެ ކޭސްތަކާއި މަރުތައް ރެކޯޑު އަދަދަކަށް އިތުރުވި ނަމަވެސް އެގައުމުގެ ވެސްޓް ބެންގާލްގެ ގާނޫނު ހަދާ މަޖިލީހުގެ އިންތިހާބުގެ ފަހު ފިޔަވަހީގެ ވޯޓު ލުން މިއަދު ފަށައިފި އެވެ.
ވެސްޓް ބެންގާލްގެ 292 ދާއިރާއަކަށް މެމްބަރުން ހޮވުމަށް އަށް ފިޔަވައްސަކަށް ބަހާލައިގެން ބާއްވާ އިންތިހާބު ފެށީ މިދިޔަ މަހުގެ 27ގަ އެވެ. އަދި މިއަދު ވޯޓު ލަނީ އޭގެ ތެރެއިން އެންމެ ފަހު 35 ދާއިރާއަކަށެވެ.
ވެސްޓް ބެންގާލްގައި އެ އިންތިހާބު ބާއްވަނީ އެ ސްޓޭޓުން އިއްޔެ ކޮވިޑްގެ އާ 17،207 ކޭސް ފެނި، ބަލީގައި 77 މީހަކު މަރުވި ކަމަށް ރިޕޯޓު ކުރި ފަހުންނެވެ. އެއީ އެ ސްޓޭޓުގައި އެއް ދުވަސްތެރޭ ބަލި ޖެހުނު މީހުންނާއި މަރުވި މީހުންގެ އަދަދު އެހާވަރަށް އެރި ފުރަތަމަ ފަހަރެވެ.
ނަމަވެސް ބޮޑުވަޒީރު ނަރެންދުރަ މޯދީ ވަނީ ވެސްޓް ބެންގާލްގެ "ޑިމޮކްރަސީ ހަރުދަނާ ކުރުމަށް" އެ ސްޓޭޓުގެ ރައްޔިތުން މިއަދު ވޯޓުގައި ބައިވެރިވުމަށް ހިތްވަރު ދެއްވާފަ އެވެ.
އެ ސްޓޭޓުގެ ގާނޫނު ހަދާ މަޖިލީހަކީ މޯދީގެ ޕާޓީއަށް އަގުލަބިއްޔަތު ނެތް މަދު މަޖިލިސްތަކުގެ ތެރެއިން އެއް މަޖިލީހެވެ. އަދި އެ އިންތިހާބާ ދިމާކޮށް އެ ޕާޓީން ބޮޑެތި ކެމްޕޭން ހަރަކާތްތައް ބޭއްވުމުން މައި ސަރުކާރަށް ފާޑު ކިޔުންތައް އަމާޒުވި އެވެ.
އެ އިންތިހާބާއި ސިޔާސީ އެއްވުންތަކާ ގުޅިގެން ވެސްޓް ބެންގާލް އަކީ އިންޑިއާގައި ކޮވިޑްގެ ކޭސްތައް އެންމެ ގިނަ ސްޓޭޓަށް ވެދާނެ ކަމުގެ ކަންބޮޑުވުން ސިއްހީ މާހިރުން ވަނީ ފާޅުކޮށްފަ އެވެ.
އިންޑިއާގެ ހެލްތު މިނިސްޓްރީން ބުނި ގޮތުގައި އިއްޔެ އެގައުމުން 379،257 މީހަކު ކޮވިޑަށް ޕޮޒިޓިވްވެފައިވެ އެވެ. އެއީ މުޅި ދުނިޔެއިންވެސް 24 ގަޑި އިރު ތެރޭ އެއް ގައުމަކުން އެހާވަރަށް ގިނަ ކޭސް ފެނުނު ފުރަތަމަ ފަހަރެވެ. އަދި އިއްޔެ އަކީ އެގައުމުން ކޮވިޑުގައި އެންމެ ގިނަ އަދަދަކަށް މީހުން މަރުވި ދުވަހެވެ. އެއީ 3،645 މަރެވެ.
އިންޑިއާގައި ކޮވިޑްގެ ކޭސްތައް އިތުރުވުމުން ހޮސްޕިޓަލްތައް ފުރި، އޮކްސިޖެން އާއި ބޭސް ލިބުމުގައި ދަތިތަކާ ވަނީ ކުރިމަތިވެފަ އެވެ. އަދި މަރުވެފައިވާ މީހުންގެ ހަށިތައް އަންދާ ކްރެމަޓޯރިއަމްތައްވެސް ފުރި، އެ ފެސިލިޓީތަކުގައި ވަނީ ކިޔޫ ޖެހިފަ އެވެ.
އިންޑިއާއިން މިހާރު ކޮވިޑް ވެކްސިން ޖަހަމުން އަންނަނީ ހެލްތު ވޯކަރުންނާއި ފްރޮންޓްލައިން ވޯކަރުންނާއި 45 އަހަރުން މަތީގެ މީހުންނަށެވެ. އަދި އެގައުމުން މިހާތަނަށް އެއް ޑޯޒް ޖަހާފައި ވަނީ އާބާދީގެ 8.9 ޕަސެންޓަށެވެ. ނަމަވެސް އެގައުމުގެ ސަރުކާރުން ވަނީ އަންނަ ހޮނިހިރު ދުވަހުން ފެށިގެން 18 އަހަރުން މަތީގެ އެންމެންނަށްވެސް ކޮވިޑް ވެކްސިން ޖެހޭނެކަން އިއުލާންކޮށްފަ އެވެ.