24 Apr 2021, 22:17
އެމްޑީޕީ ގައުމީ ހިންގާ ކޮމިޓީގެ ބައްދަލުވުމަށް ރައީސުލްޖުމްހޫރިއްޔާ އަދި އެމްޑީޕީގެ އެންމެ އިސްވެރިޔާ އިބްރާހިމް މުހައްމަދު ސޯލިހާއި އެޕާޓީގެ ރައީސް އަދި ކުރީގެ ރައީސް މުހައްމަދު ނަޝީދު ބައިވެރިވެވަޑައިގެންފި އެވެ.
ދެ ރައީސުން ޕާޓީގެ ބައްދަލުވުމަކަށް އެއްތަންވެފައި މިވަނީ، މިފަހުން ބަރުލަމާނީ ނިޒާމް ގެނައުމަށް ރައީސް މުހައްމަދު ނަޝީދު މަސައްކަތް ފެށުމުން ޕާޓީ ތެރޭގައި ނުތަވަސްކަމެއް އުފެދިފައި ވަނިކޮށެވެ.
ބަރުލަމާނީއަކަށް ބަދަލުކޮށް، ބޮޑުވަޒީރުކަން ބޭނުންވާކަމަށް ރައީސް ނަޝީދު ވަނީ ރައީސް ސޯލިހަށް ދަންނަވާފަ އެވެ. ޖަވާބުގައި ރައީސް ސޯލިހް ވިދާޅުވެފައިވަނީ، ބަރުލަމާނީއަކަށް ބަދަލު ކުރެވޭނީ ރައްޔިތުންގެ ވޯޓަކުން ކަމަށެވެ. އެއާއެކު ރައީސް ނަޝީދުވެސް ވިދާޅުވެފައި ވަނީ އެކަން ނިންމޭނީ ރައްޔިތުންގެ ވޯޓަކުން އެމަނިކުފާނަށްވެސް އެނގިވަޑައިގެންނަވާ ކަމަށެވެ.
ދެ ރައީސުން ބައިވެރިވެވަޑައިގަންނަވާ އެމްޑީޕީގެ ގައުމީ މަޖިލިސް ބައްދަލުވުމެއް މިރޭ ބާއްވަމުން ގެންދަނީ، ބިލަބޮންގް ހައި އިންޓަނޭޝަނަލް ސްކޫލްގަ އެވެ. ބައްދަލުވުން ފަށާފައިވަނީ މިރޭ 9:30 ގައެވެ.
ބައްދަލުވުމުގައި އެޖެެންޑާކޮށްފައިވަނީ ދެ މަސައްކަތެކެވެ. އެއީ ކުރިއަށް އޮތް އެމްޑީޕީގެ ދާއިރާތަކުގެ އިންތިހާބުގެ ކެންޑިޑޭޓުންގެ ޝަރުތު ކަނޑައެޅުމާއި ނިމިދިޔަ ކައުންސިލް އިންތިހާބުގެ މައްސަލާގައި ކޯޓަށް ދިއުމާއި މެދު ގޮތެއް ނިންމުމެވެ.
އެމްޑީޕީގެ ގައުމީ މަޖިލިސް ޖަލްސާއެއް މިރޭ ބައްދަވަމުން އެ ގެންދަވަނީ ވަރަށް ގިނަ ދުވަސްތަކަށް ފަހު އެވެ.
ޕާޓީގެ އަސާސީ ގަވައިދު ބުނާ ގޮތުން،، އެމްޑީޕީގެ ގައުމީ މަޖިލީހުގެ ދެއްބަދަލުވުން ދެމެދުގައި ގައުމީ މަޖިލީހުން އަދާކުރަން ޖެހޭ އެންމެހާ އެންމެހާ މަސްއޫލިއްޔަތެއް އަދާކުރާނީ ގައުމީ މަޖިލީހުގެ ގައުމީ ހިންގާ ކޮމިޓީނެވެ.
ގައުމީ ހިންގާ ކޮމިޓީގައި ހިމެނެނީ، ރައީސް އާއި ނައިބު ރައީސް، ޗެއާޕާސަން، ޕާޓީގެ ކެބިނެޓް މެމްބަރުން، އަމިީން އައްމު އަދި އަމީން އާއްމުގެ ނައިބު، ޗެއާޕާސަންގެ ނައިބު (އިދާރީ، މާލީ) އަދި ޕާޓީއަށް ނިސްބަތްވާ މަޖިލީހުގެ މެންބަރުންނެވެ.