10 Apr 2021, 11:22
ލާމަރުކަޒީ ގާނޫނަށް ގެނައި އިސްލާހުތަކާއެކު ކައުންސިލްތަކަށް ބޮޑެތި ބާރުތަކެއް ދޫކޮށްލާފައިވާ ކަމަށާއި، އެހެންކަމުން އެ ނިޒާމު ރަށްތަކަށް ގެންދިއުމަށް މިހާރު ކުރިއަށްދާ އިންތިހާބުގައި ވޯޓުލައި، ފުރުސަތުގެ ބޭނުން ހިފަން ރައީސް އިބްރާހިމް މުހައްމަދު ސޯލިހު މިއަދު އިލްތިމާސް ކުރައްވައިފި އެވެ.
ލޯކަލް ކައުންސިލްތަކުގެ އިންތިހާބާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ވޯޓުދެއްވުމަށްފަހު ރައީސް ސޯލިހު ވިދާޅުވީ ރަށްތަކަށް ދޫކޮށްލާފައިވާ ބާރުތަކުގެ ބޭނުން ހިފަން މިއަދުގެ ވޯޓު މުހިންމު ކަމަށެވެ.
މިހާތަނަށް ވޯޓުލާން ނުކުތް މީހުންގެ އަދަދު މަދުކަން ފާހަގަކުރައްވައި ރައީސް ވިދާޅުވީ، މިއީ ބޮޑެތި ދަތިތަކެއް ހުރި ދުވަސްވަރެއްކަން ގަބޫލުކުރައްވާ ކަމަށާއި އެހެން ނަމަވެސް މެންދުރު ފަހުން ގިނަ ބަޔަކު ވޯޓުލާން ނުކުންނާނެ ކަމަށް އުންމީދުކުރައްވާ ކަމަށެވެ.
ރައީސް ވިދާޅުވީ މި އިންތިހާބު އެމްޑީޕީން ކާމިޔާބުކުރާނެ ކަމަށް ޔަގީންކުރައްވާ ކަމަށާއި، މާލޭގެ މޭޔަރުކަން ބޮޑު ތަފާތަކުން އެމްޑީޕީން ކާމިޔާބު ކުރާނެ ކަމަށެވެ.