23 Mar 2021, 15:42
ކޮވިޑް19 އާ ގުޅިގެން މިހާރު އޮތް ހާލަތުގައި ސިޔާސީ ކެމްޕޭނު ކުރަން ދަސްކުރަން އެމްޑީޕީ އިން، އިދިކޮޅު ކޯލިޝަނަށް ގޮވާލައިފި އެވެ.
ކުރިއަށް އޮތް ލޯކަލް ކައުންސިލް އިންތިހާބަށް އިދިކޮޅު ފަރާތްތަކަށް ހަމަހަމަ ފުރުސަތު ފަހިކޮށްދޭން ގޮވާލައި، މާވަށު ދާއިރާގެ މެމްބަރު މުހައްމަދު ސައީދު ވަނީ މިއަދު މަޖިލީހަށް މައްސަލައެއް ހުށަހަޅުއްވައިފަ އެވެ.
ސައީދު ހުށަހެޅުއްވި މައްސަލާގައި ވިދާޅުވެފައި ވަނީ ހެލްތު ޕްރޮޓެކްޝަން އެޖެންސީގެ ގައިޑްލައިންތަކުގެ ސިޔާސީ މަންފާ އެންމެ ފުޅާ މިނުގައި ނަގައި، ވަޒީރުންނާއި ސަރުކާރު ކުންފުނިތަކުގެ ވެރިންނާއި މަޖިލީހުގައި ސަރުކާރު ތަމްސީލުކުރާ މެމްބަރުން ކަރަންޓީނު ވުމެއް ނެތި އަތޮޅު ތެރެއަށް ގޮސް، ރައްޔިތުންނާ ބައްދަލުކޮށް، ސިޔާސީ ހަރަކާތްތައް ސިއްރާއި ފާޅުގައި ހިންގަމުން އަންނަ ކަމަށެވެ.
ނަމަވެސް އެފަދަ އެއްވެސް ފުރުސަތެއް ވާދަވެރި އަދި އިދިކޮޅު ފަރާތްތަކަށް ފަހިކޮށްދީފައި ނެތުމަކީ ސަރުކާރުން ލޯކަލް ކައުންސިލް އިންތިހާބަށް ނުފޫޒު ފޯރުވުން ކަމަށް ދެކޭނެ ފުރުސަތު އޮތް ކަމަށް ސައީދު ވިދާޅުވި އެވެ.
މައްސަލައަށް ބަހުސްކުރައްވަމުން އައްޑޫ ހުޅުދޫ ދާއިރާގެ މެމްބަރު އިލްޔާސް ލަބީބު ވިދާޅުވީ ވާދަވެރި ސިޔާސީ ހަރަކާތައް އެމްޑީޕީން އަބަދުވެސް ހިތްވަރުދީ ވަކާލަތު ކުރާނެ ކަމަށެވެ. އަދި ކޮވިޑް19 އާ ގުޅިގެން ކުރިމަތިވެފައިވާ ހާލަތުގައި ވެސް ވާދަވެރި ސިޔާސީ ހަރަކާތް ހިންގަން ޕީޕީއެމް ޕީއެންސީ އަށް ގޮވާލާ ކަމަށެވެ.
އިލްޔާސް ވިދާޅުވީ އެމްޑީޕީ އިން މި ހާލަތުގައިވެސް ކާމިޔާބު ކެމްޕޭނު ހަރަކާތްތައް ހިންގަމުން އަންނަ ކަމަށާއި، އިދިކޮޅަށް އެކަން ކުރަން ނޭނގޭ ކަމަށެވެ.
"އެނގޭނެ ކޮވިޑުގެ މިހާލަތުގަ ދަތިތަކެއް އެބަހުރި ހުރިހާ ކަމެއްގަ ވެސް. ދަތިތަކުގެ ތެރޭގަ އުޅެންވާ ގޮތާ ކެމްޕޭނު ކުރަންވާ ގޮތާ ކެމްޕޭނު ހިންގަންވާ ގޮތް ދަސްކުރައްވާ. ތިބޭފުޅުން އެނގިވަޑައިނުގަންނަވަނީ އޭ،" އިލްޔާސް ވިދާޅުވި އެވެ.
އިލްޔާސް ލަބީބު -- ފޮޓޯ/ މަޖިލިސް
އިލްޔާސް ވިދާޅުވީ އެމްޑީޕީން މިހާރު ވެސް ކެމްޕޭނު ލަވަ ނެރެ، ކެމްޕޭނު ކުރާނެ ގޮތް ކެންޑިޑޭޓުންނަށާއި ކެމްޕޭނު ޓީމުތަކަށް ކިޔައިދީ އެ ފަރާތްތައް ތަމްރީނު ކުރަމުން އަންނަ ކަމަށެވެ. ހަމައެއާއެކު އިންތިހާބު އޮންނަ ދުވަހު މަރުކަޒުތަކުގައި ހަރަކާތްތެރިވާނެ މަންދޫބުންނަށް ބޭނުންވާ ތަމްރީނުވެސް ދެމުން އަންނަ ކަމަށެވެ.
"ތިބޭފުޅުންނަށް އެކަން ނޭނގުމަކީ އަޅުގަނޑުމެން ހިތާމަކުރާ ކަމެއް. އަޅުގަނޑުމެން އެދެން ބޭރުގެ މިކަހަލަ ޖަމިއްޔާތަކުގެ އެހީއާ އެކުވެސް މިކަންކަން ދަސްކުރުމަށް. އަޅުގަނޑުމެން ވެސް އެބަތިބި އެކަމުގަ ދަސްކޮށްދޭ ކަހަލަ ޓްރެއިނަރުން. އަޅުގަނޑުމެން ތިބޭފުޅުން އެހީތެރިކަން ބޭނުން ވަންޏާ އެކަންވެސް ކޮށްދޭ ގޮތަށް މި ތިބީ،" އިލްޔާސް ވިދާޅުވި އެވެ.
އިލްޔާސް ވިދާޅުވީ ކެމްޕޭނަށް ފުރުސަތު އެބަ އޮތް ކަަމަށާއި އިދިކޮޅަށް އެ ފުރުސަތުގެ ބޭނުން ކުރަން ނޭނގޭ ކަމަށެވެ.
ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވިދާޅުވީ ދުނިޔެ ބޮޑު ޕެންޑެމިކް އެއްގެ ތެރޭގައި އޮތް އިރު، ސިޔާސީ ހަރަކާތަތްތައް ވެސް ކޮންމެސް ވަރަކަށް ބަދަލުވާންޖެހިފައިވާ ކަމަށެވެ.
އީވާ ވިދާޅުވީ ރަށްރަށަށް ގޮސް، މަގުމައްޗަށް ނުކުމެ މެގަފޯނުތައް ހިފައިގެން ވާހަކަ ނުދެއްކޭތީ، އެމްޑީޕީއަށް ވުރެ ބޮޑަށް ހިތާމަކުރާނެ ބަޔަކު ނޫޅޭނެ ކަމަށެވެ.
"އެއީ އަޅުގަނޑުމެން އެންމެ ފަރިތަ ކަންތައް. އެހެންވީމަ އެކަން ނުކުރެވުނީމާ އެއީ އިންތިހާބެކޭ ބުނަން ވެސް އަޅުގަނޑުމެންނަށް ވެސް އުނދަގޫވޭ. އެހެން ނަމަވެސް އަޅުގަނޑުމެން ވެސް މި ތިބީ މި ހާލަތައިގެން ވެސް އުޅެން ދަސްކޮށްގެން. ޕީޕީއެމް އަށް ވެސް އަޅުގަނޑު ދަންނަވާލަން ބޭނުންވަނީ ހާލަތަށް ފިޓު ވާން. ހާލަތަަށް ފެތިލަން ކޮންމެސް ވަރަކަށް ދަސްކުރަން ޖެހެޔޭ،" އީވާ ވިދާޅުވި އެވެ.
އީވާ ވިދާޅުވީ އިލެކްޝަންސް ކޮމިޝަނުން އިންތިހާބަށް ގޮވާލުމާއެކު އެމްޑީޕީން ކެމްޕޭނު ހަރަކާތްތައް ފަށައިފައިވާ ކަމަށެވެ. އެގޮތުން ފާއިތުވި އެއް މަސް ދުވަހުގެ ތެރޭގައި އެމްޑީޕީގެ ފަރާތުން 122 ރަށަކާއި، ހަތަރު ސިޓީއަކާއި، 17 އަތޮޅަކާއި 800 އެއްހާ ކެންޑިޑޭޓުންނާއެކު، ކެމްޕޭނު ހަރަކާތެއްގެ ގޮތުގައި ބައްދަލުކޮށްފައިވާ ކަމަށެވެ.
"އަޅުގަނޑުމެން ކުރި ކަމަކީ މިއީ ޕެންޑެމިކް އެއްކަން އެނގިތިބެ، ދަތުރުކުރަން އުނދަގޫކަން އެނގިތިބެ، އަޅުގަނޑުމެން ކުރިކަމަކީ ފަހަތުގައި ބެކްޑްރޮޕް އެއް ވައްޓަލާފައި ޒޫމް ލިންކަކަށް ފިތާލާފަަައި ރައީސާއި ޕާޓީގެ ރައީސް އަދި ޕާޓީގެ ޗެއާޕާސަން އިށީނދެވަޑައިގެން 800 އެތައް ކެންޑިޑޭޓުންނަކާ ބައްދަލުކުރަނީ،" މެމްބަރު ވިދާޅުވި އެވެ.
ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު އީވާ އަބްދުﷲ -- ފޮޓޯ/ މަޖިލިސް
މެމްބަރު ވިދާޅުވީ ހާލަތަށް ފިޓުވާން އެމްޑީޕީން ވެސް ދަސްކުރީ ކަމަށާއި ޕީޕީއެމް އިން ވެސް ޝަކުވާ ކުރުމުގެ ބަދަލުގައި އެކަން ދަސްކުރަންޖެހޭ ކަމަށެވެ.
"ޕީޕީއެމް އިން ވެސް އެބަ ދަސްކުރަން ޖެހޭ ހުއްޖަތު ބަނދިއެއްގެ ބަދަލުގަ ކޮންމެސް ވާހަކައެއް ރައްޔިތުންނާ ހަމައަށް އެބަ ދައްކާން ވެސް ދަސްކުރަން ޖެހޭ. ޝަކުވާގެ ބަދަލުގައި ކޮންމެސް އުންމީދެއްވެސް ޕީޕީއެމް މީހުންނަށްވެސް އެބަ ދައްކާން ޖެހޭ،" އީވާ ވިދާޅުވި އެވެ.
އީވާ ވިދާޅުވީ އެންމެ ފަހުން ބޭއްވި ކައުންސިލް އިންތިހާބުގައި ވެސް އެމްޑީޕީން މަގުމަތީގައި މުޒާހަރާ ކުރުމާއެކު، ވަރުގަދަ ކެމްޕޭނެއް ވެސް ކުރިއަށް ގެންދިޔަ ކަމަށެވެ.
"ޕީޕީއެމް އަށް ވެސް ދެކަންތައް ވާނެ. ރައީސް އަބްދުﷲ ޔާމީން މިނިވަންކުރަން ގޮވާލެވޭނެ. ގޮވަންވީ، އެހެން ނަމަވެސް ޝަކުވާ، ޝަކުވާ، ޝަކުވާގެ ބަދަލުގައި ކޮންމެސް އޮއްޓަރު ހުރި ވާހަކައެއް ވެސް ޕީޕީއެމް އިން ދެއްކީމާ އެމީހުންގެ މީހުންވެސް ބަލައިގަންނާނީ،" އީވާ ވިދާޅުވި އެވެ.